Yeni dərs ilinin başlamasına az qalır, həmin günün ayrılmaz simvolu gül buketləridir. Bir sinifdə orta hesabla 20 şagird olsa, təvazökar hesabla, 300 manat gül buketlərinə veriləcək və o buketlər yarım saat içində rutinləşib ertəsi gün istifadəsiz olacaq. Bu hesabla gün ərzində yalnız Bakıda onminlərlə manat vəsait müvəqqəti simvolizm üçün xərclənəcək. Modern.az xəbər verir ki, bunu Kult.az-a fizik Yalçın İslamzadə bildirib.

O qeyd edib ki, buket əvəzinə hər valideyin kitab alsa, o kitablar məktəbin kitabxanasında qalacaq, yüzlərlə şagird illərlə onlardan faydalanacaq:

“Gül əvəzinə kitab almaqdan utanmaq lazım deyil, indiki dövrdə şagirdlər, onlardan da çox müəllimlər mütaliə etməlidirlər. Bir kitab bir buketdən daha ucuzdur, simvolik yox, bilgi dəyərinə sahibdir, illərlə faydalı olacaq. Dərs başlayandan üç gün sonra güllərdən iz qalmaz, ancaq bir məktəbin kitabxanasında “Filsof uşaq”, “Biləndər uşaq”, “Uşaqlarla fəlsəfə”, “Homo sapiens”, “Homo deus”, “Qağayı”, “Zamanın daha qısa tarixi”, “Mənim gözümdən dünya”, “Uşaqlar üçün təkamül”, “Mentosori təlimi”, məntiq və riyaziyyat sualları olan “Uçmaca seriyası”, müxtəlif ensiklopediyalar, uşaq psixologiyasına, etiket qaydalarına, uşaq ədəbiyyatına, təhsilə, elmə dair, tanınmış insanların həyatları haqqında və adı çəkilməyən daha bir çox kitab şagirdlərin dünyagörüşlərini artırmağa davam edəcək. Həmçinin nəşriyyatlara da motivasiya olacaq”.