Qafqaz Müsəlmanları İdarəsi (QMİ) müvafiq qurumlarla məsləhətləşmələrdən sonra təsisçisi olduğu Bakı İslam Universitetinə bu il qəbul olunan şəxslərin Azərbaycan İlahiyyat İnstitutunda təhsil alması barədə qərar qəbul edib.

Modern.az xəbər verir ki, bunu AzEdu.az-a açıqlamasına Bakı İslam Universitetinin İctimai fənlər kafedrasının müdiri Elvin Talışınski deyib. Onun sözlərinə görə, universitet fəaliyyətini dayandırmayıb, sadəcə olaraq I kurslar başqa universitetlərə köçürülür:

"Universitetdə təhsil alan II, III və IV kurslarda hazırda dərslər davam etdirilir. Sadəcə olaraq I kurslar başqa universitetlərə köçürülür. Bakı İslam Universitetinə daxil olan şəxslərin Azərbaycan İlahiyyat İnstitutuna köçürülməsinin səbəbi isə orada eyni ixtisas üzrə pulsuz təhsilin olmasıdır. Proses Dövlət İmtahan Mərkəzi tərəfindən həyata keçirilir”.

Xatırladaq ki, Ali dini tədris müəssisəsi olan Bakı İslam Universiteti (BİU) SSRİ Nazirlər Soveti yanında Dini İşlər Şurasının 17.01.1989-cu il tarixli 2№-li protokoluna əsasən, Qafqaz Müsəlmanları İdarəsinin nəzdində Bakı İslam Mədrəsəsi kimi fəaliyyətə başlayıb. 2009-cu ildə Təhsil Nazirliyi Bakı İslam Universitetinin fəaliyyətinə xüsusi razılıq (lisenziya) verib.

Qeyd edək ki, təhsil eksperti Kamran Əsədov sosial şəbəkədə "Bakı İslam Universiteti fəaliyyətini dayandırır" yazıb.