Modern.az

Mətbuat Şurasında veteran jurnalistin 85 yaşı qeyd olundu

Mətbuat Şurasında veteran jurnalistin 85 yaşı qeyd olundu

25 Sentyabr 2018, 13:49

Azərbaycan Mətbuat Şurasında qocaman jurnalist Oqtay Cəfərovla görüş keçirilib.

Modern.az xəbər verir ki, MŞ sədri, Milli Məclisin deputatı Əflatun Amaşov 85 illiyini qeyd edən veteran qələm sahibinin ölkə mətbuatının inkişafındakı xidmətlərindən söz açıb. O bildirib ki, rəhbərlik etdiyi qurumun tərkibindəki Ahıl Jurnalistlər Məclisinin Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə yardımı ilə reallaşdırdığı «Ahıl jurnalistlərə qayğı: keçmişimizə ehtiram gələcək üçün təcrübə qaynağımızdır» layihəsi ömrünü-gününü peşəyə sərf edən jurnalistlərin əməyinin dəyərləndirilməsi baxımından son dərəcə vacibdir. O.Cəfərov da keçdiyi ömür yolu peşə müstəvisində yüksək qiymətləndirilməli olan şəxslərdəndir. «Oqtay müəllim kimi insanlar daim diqqət mərkəzində saxlanılmalıdır. Çünki onlar peşəni həqiqətən də seviblər, ucaldıblar, hər zaman işlərinə, prinsiplərinə sadiq qalıblar. Eyni zamanda ziyalı kimi də cəmiyyətə nümunə olmağı bacarıblar», - deyən Ə.Amaşov O.Cəfərova Mətbuat Şurasının fəxri diplomunu təqdim edib.

 

Görüşdə çıxış edənlərdən MŞ-nin Ahıl Jurnalistlər Məclisinin sədri Məzahir Süleymanzadə, «Xalq qəzeti»nin baş redaktor müavini, əməkdar jurnalist Tahir Aydınoğlu, professor Tehman Əliyev, əməkdar mədəniyyət işçisi Rafiq Salmanov yubilyarı peşəkar jurnalist, cəsarətli qələm sahibi kimi səciyyələndiriblər. Onlar həmçinin O.Cəfərovun daim gənc jurnalistlərə dəstək olduğunu xüsusi məqam kimi vurğulayıblar.

 

Veteran jurnalist Oqtay Cəfərov əməyinin qiymətləndirilməsinə, barəsində söylənilən xoş sözlərə görə təşəkkürünü bildirib.

 

Qeyd edək ki, Oqtay Cəfərov 1952-ci ildə Bakı Dövlət Universitetinin jurnalistika şöbəsinin ikinci buraxılışının məzunu olub. Jurnalist fəaliyyəti müddətində Göyçay rayonunda çıxan yerli qəzetin, Sumqayıtın «Kimyaçı» qəzetinin, «İnşaatçı» qəzetinin, həmçinin «Müxbir» jurnalının baş redaktoru olub. Ömrünün 60 ili mətbuatda keçib.

 

Instagram
Gündəmdən xəbəriniz olsun!
Keçid et
Rusiyada ağır döyüşlər: Ukrayna partizanları əraziləri bombalayır