Dünyasını dəyişən Qazaxıstan Azərbaycanlıları Mədəniyyət Mərkəzinin sədri Vidadi Salahovun cənazəsi bu gün Azərbaycana gətiriləcək.
Bu barədə Modern.az-a Diaspor Fəaliyyətinə Jurnalistlərin Dəstəyi İctimai Birliynin sədri Fuad Hüseynzadə məlumat verib.
O bildirib ki, Vidadi Salahovun cənazəsi bu gün Bakı vaxtı ilə 22:00-da Heydər Əliyev adına Beynəlxalq Hava Limanına gətiriləcək. Mərhum Bərdə şəhərində atasının yanında dəfn olunacaq.
Qeyd edək ki, Vidadi Salahov oktyabrın 14-də dünyasını dəyişib.
Xatırladaq ki, Vidadi Salahov 1957-ci ildə Kəlbəcər rayonunun Bağlıpəyə kəndində doğulub.1978-1983-cü illərdə Voronej Dövlət Universitetinin tələbəsi olub. 1983-1987-ci illərdə Tselinoqradda 23 saylı orta məktəbin tarix müəllimi kimi çalışıb. Beynəlxalq Ekologiya və Energetika Akademiyasının müxbir üzvüdür. 1987-1992-ci illərdə Kemerov vilayəti Tastaqol rayonunun Kondama kənd orta məktəbində tarix müəllimi kimi fəaliyyət göstərib.1994-1997-ci illərdə Akmola vilayətinin Tselinoqrad rayonunun “Priziv” qəzetində müxbir vəzifəsində işləyib.1997-2004-cü illərdə “Akmola” Astana şəhərində fəaliyyət göstərən “Azamat”, “Times” qəzetlərinin müxbiri olub. 2004-cü ildə “Turan-exspress” qəzetinin baş redaktoru vəzifəsində çalışmağa başlayıb. Təxminən 10 il bu qəzeti çap etdirib.
Qazaxıstan Prezidentinin 2 minnətdarlıq məktubu, “Qızıl qartal” ordeni, saysız diplom və fəxri fərmanlar, 2011-ci il iyulun 4-də isə Azərbaycan Prezidenti tərəfindən “Tərəqqi” medalı ilə təltif olunub. Tarix elmləri doktoru, professor Vidadi Salahov 2016-cı ildə Qazaxıstan Prezidenti yanında Dövlət Tarixi İnstitutunun Tarix Akademiyasının akademiki dərəcəsinə layiq görülüb.
Mail Ağaxanov
