“Yaxın vaxtlarda ATƏT-in Minsk qrupu həmsədrləri Bakı və Yerevana Dağlıq Qarabağ münaqişəsinin nizama salınmasının baza prinsiplərini nəzərdə tutan Madrid sənədinin yeniləşmiş variantını təqdim edəcəklər”. Modern.az-ın “İnterfaks” agentliyinə istinadən yaydığı məlumata görə, bu barədə Rusiya Xarici İşlər Nazirliyinin rəsmi nümayəndəsi Andrey Nesterenko Moskvada keçirdiyi bugünkü brifinqdə açıqlama verib. “Madrid sənədinin son 2 ildə Azərbaycan və Ermənistan prezidentləri arasında baş tutmuş müzakirələri nəzərə alınmaqla həmsədrlər Madrid sənədinin yeniləşmiş variantını işləyib hazırlayıblar, bu sənəd yaxın vaxtlarda tərəflərə təqdim olunacaq”-deyə Rusiya XİN rəsmisi bildirib.
O, xatırladıb ki, Madrid sənədində ATƏT-in Minsk qrupu həmsədrləri tərəfindən nizamlamanın baza prinsipləri əksini tapıb. Sənəd 2007-ci ilin noyabrında ATƏT-in Madrid sammitində Azərbaycan və Ermənistan nümayəndələrinə təqdim olunub.
“Əgər danıqlar prosesində cari ildə əldə olunmuş müsbət dinamika qorunub saxlanarsa, onda nizamlamanın baza prinsiplərinin kifayət qədər tezliklə və sonuncu razılaşdırılmasına, onların əsasında isə sülh sazişinin mətninin işlənib hazırlanmasına ümid etmək olar”-deyə Nesterenko bildirib.
Azərbaycan rəhbərliyinin Minsk qrupunun fəaliyyətindən narazılq etməsi barədə yayılan məlumatlara gəlincə, Nesterenko deyib: “Rusiya tərəfi Azərbaycan rəhbərliyinin Minsk qrupunun və onun həmsədrlərinin vasitəçilik fəaliyyətindən narazılğı ilə bağlı hər hansı siqnal almayıb. Ancaq həmsədrlərin fəaliyyətindən minnətdarlıq dəfələrlə ifadə olunub”.