Modern.az

Təxribatlara qarşı vahid mövqe nümayiş etdirmək lazımdır

Təxribatlara qarşı vahid mövqe nümayiş etdirmək lazımdır

Aktual

18 Fevral 2019, 14:33

BAXCP İdarə Heyəti: “Azərbaycanlılarla çeçenləri yüzillərin sınağından keçmiş dostluq münasibətləri, ortaq dəyərlər və ənənələrin birləşdirir”


Bu gün Bütöv Azərbaycan Xalq Cəbhəsi Partiyası (BAXCP) İdarə Heyətinin iclası keçirilib. İclasda ictimai-siyasi və cari məsələlər müzakirə olunub. İctimai-siyasi məsələlərin müzakirəsi çərçivəsində ötən həftə Rusiyanın paytaxtı Moskva şəhərində çeçen millətindən olan bir qrup şəxsin azərbaycanlıların ictimai-iaşə obyektinə hücumu nəticəsində yaranan qarşıdurmaya, bəzi qüvvələrin yaranmış vəziyyətdən sui-stifadə etmək cəhdlərinə də toxunulub.

 

Modern.az xəbər verir ki, İdarə Heyətinin iclasında Qafqazın aborigen xalqları olan azərbaycanlılarla çeçenləri yüzillərin sınağından keçmiş dostluq münasibətlərinin, ortaq dəyərlərin və ənənələrin birləşdirdiyi, ən çətin günlərdə bu iki xalqın nümayəndələrinin bir-birinə dəstək verdikləri vurğulanıb.

Qeyd olunub ki, hadisələrin inkişaf dinamikası, sosial şəbəkələrdə və bəzi digər internet resurslarında azərbaycanlı-çeçen qarşıdurmasına çağırışlar baş verənlərin öncədən hazırlanmış təxribat olduğuna şübhə yaradır:

“Çeçen xalqının ayrı-ayrı xarici ölkələrdə, o cümlədən Belçikada sığınacaq tapmış bəzi nümayəndələrinin azərbaycanlıların, eləcə də digər xalqlarının nümayəndələrinin kütləvi şəkildə qətlə yetirilməsi ilə bağlı çağırışları, çoxsaylı şikayətlərə baxmayaraq, bu qəbildən olan çağırışların hələ də YouTube və bu kimi digər sosial şəbəkələrdən silinməməsi prosesin arxasında Qafqaz xalqlarını qarşıdurmaya sövq etmək niyyəti güdən qüvvələrin dayandığını sübuta yetirir. BAXCP İdarə Heyəti hesab edir ki, açıq şəkildə terrora, insanları etnik mənsubiyyətinə görə qətlə yetirməyə və digər insanlıq əleyhinə cinayətlərə çağırış edən şəxslərin tapılaraq məsuliyyətə cəlb edilməsi istiqamətində təxirəsalınmaz tədbirlər görülməli, onların yaşadıqları ölkələrin müvafiq dövlət qurumları qarşısında belə şəxslərin cinayətkar əməllərinə son quyulması ilə bağlı vəsatət qaldırılmalıdır. 
BAXCP Rusiyada yaşayan azərbaycanlıları və çeçen diasporunun nümayəndələrini üçüncü qüvvələrin, o cümlədən Ermənistanın xüsusi xidmət orqanlarının təxribatlarına uymamağa, sayıq olmağa, təxribatlara qarşı vahid mövqe nümayiş etdirməyə çağırır”. 

Naxçıvanda ASAN Xidmət mərkəzləri açılsın

BAXCP İdarə Heyətinin müzakirəsinə çıxarılan digər məsələ xaricdə yaşayan Azərbaycan vətəndaşlarına müvafiq dövlət xidmətlərinin “Elektron hökumət” portalı vasitəsilə elektron qaydada göstərilməsi ilə bağlı olub. BAXCP İdarə Heyəti Diasporla İş üzrə Dövlət Komitəsi ilə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin bu istiqamətdə planlaşdırdıqları işləri təqdir etdiyini bildirib. 


Qeyd olunub ki, xarici ölkələrdə, o cümlədən qardaş Türkiyədə yaşayan Azərbaycan vətəndaşlarının müvafiq sənədlərlə, həmçinin şəxsiyyət vəsiqələri ilə təmin edilməsi onların hüquqularının qorunması baxımından mühüm əhəmiyyət kəsb edir. BAXCP İdarə Heyəti ümid edir ki, bu işbirliyi çərçivəsində Türkiyədə, əsasən İstanbul şəhərində kompakt şəkildə yaşayan, Naxçıvandan olan vətəndaşlarımızın da şəxsiyyət vəsiqələri və digər sənədlərlə təmin edilmələrinə imkan yaradılacaq.


BAXCP İdarə Heyəti Azərbaycan hökumətini iş tapmaq məqsədi ilə paytaxt Bakıya və ölkənin digər ərazilərinə köç edən Naxçıvan sakinlərinə, Naxçıvana gediş-gəlişin çətin olduğu nəzərə alınaraq, yaşadıqları ərazilərdə şəxsiyyət vəsiqəsi və digər sənədləri ala bilmələri üçün müvafiq tədbirlər həyata keçirməyə çağırıb. BAXCP İdarə Heyəti hesab edir ki, Naxçıvan Muxtar Respublikasının da müvafiq dövlət qurumları ASAN Xidmət sisteminə inteqrasiya edilməli və Muxtar Respublikanın ərazisində ASAN Xidmət Mərkəzləri açılmalıdır.

 

Whatsapp
Bizə yazın!
Keçid et
Sevastopolda Rusiyaya məxsus daha bir SU-35 vurulub