Modern.az saytı “Tanıdığınız tanışlar” adlı daha bir rubrikanın təqdimatına başlayır.
Yeni rubrikada böyük əksəriyyətin tanıdığı şəxsin uşaqlıq və ya gənclik şəkli təqdim olunur.
Hamınıza bugünkü siması ilə tanış olan həmin şəxsin nadir şəkli yəqin ki, sizlərdə hansısa təəssüratlar yaradacaq.
Rubrikamızın ilk təqdimatı yazıçı, filoloq alim, Nazirlər Kabinetinin mətbuat xidmətinin rəhbəri, 2-ci dərəcəli dövlət müşaviri Akif Əlidəndir.
Xəbər lentindəki şəkli yazıya baxmadan tanıya bildiniz?
Arayış: Akif Əli ilə bağlı təqdimat təsadüfdən onun ad gününə düşdü. Bu gün doğum tarixini qeyd edən Akif Əli 22 fevral 1952-ci ildə Azərbaycanın Şuşa şəhərində dünyaya gəlib.
Atası Əli Məhərrəmov (1924 – 1977) hüquqşünas kimi uzun illər respublikanın prokurorluq və məhkəmə orqanlarında çalışıb. Anası Şəhla Məhərrəmova, evdar qadın olub(1928-2008) .
Akif Əli Bakı şəhərindəki 16 №-li orta məktəbi (1970), M.F.Axundov adına Azərbaycan Pedaqoji Rus dili və Ədəbiyyatı İnstitutunu (1974), Bakı Ali Partiya Məktəbini (1989) bitirib.
“Azərbaycanfilm” kinostudiyasında prof. Adil İsgəndərovun rəhbərlik etdiyi iki illik Kinoaktyorluq kurlarında oxuyub (1972-74); sonra bir neçə bədii filmdə baş rollara çəkilib:
-“Uzun müharibədə qısa görüşlər” (“Tacikfilm” və “Lenfilm” k/st. birgə istehsalı, 1974) – Rüstəm;
– “Tütək səsi” (“Azərbaycanfilm” kst., 1975) – Tapdıq;
– “Əgər biz bir yerdəyiksə” (Moskva Mərkəzi TV, 1976) – Məmməd;
– “Arxadan vurulan zərbə” (“Azərbaycanfilm” kst., 1977) – Fazil müəllim
və b. obrazları yaradıb.
1978-1987-ci illərdə Azərbaycan Dövlət Televiziya və Radio Verilişləri Komitəsində müxtəlif vəzifələrdə çalışıb:
– Radionun “Satira və yumor” şöbəsinin müdiri işləyərkən (1981-1983) bir neçə populyar radio verilişinin (“Sabahınız xeyir”, “Molla Nəsrəddin”, “Gülüş axşamı”);
– Televiziyanın “Gənclər üçün proqramlar baş redaksiyası”nın Baş redaktoru vəzifəsində çalışarkən isə bir sıra populyar televiziya proqramlarının (“Zəriflik”, “Aygün”, “İdrak”, “Tələbə dünyası”, “7 sual, 7 cavab” televiktorinası, “Teleteatrda gənclər gecəsi”, “Çay, çay, çay!”, “Mənəvi dünyamız”) – yaradıcısı, müəllifi, yaxud redaktoru olub.
Azərbaycan Jurnalistlər Birliyinin üzvüdür (1981).
Azərbaycan EA Ədəbiyyat institutunda dissertant olaraq, “Mirzə Ələkbər Sabirin satira sənətkarlığı” mövzusunda dissertasiya müdafiə edib (elmi rəhbər-prof.Yaşar Qarayev).
Filologiya elmləri üzrə Fəlsəfə Doktoru (1988), dosentdir (2000).
Akif Əli 1990-cı ildə Azərbaycanda ilk müstəqil demokratik mətbu orqanlardan olan “Vətən səsi” qəzetinin yaradılmasında bilavasitə iştirak edib. 1991-93-cü illərdə həmin qəzetin baş redaktoru olub.
Mətbuatda demokratikləşmə prosesləri, müstəqillik uğrunda mübarizələr, Ermənistanın Azərbaycana hərbi təcavüzü, Qarabağ həqiqətləri, qaçqın soydaşlarımızın problemləri, klassik irsimiz, kulturologiya, maarifçilik və digər mövzularda çoxlu sayda məqalələri dərc olunub.
Eyni zamanda elmi-pedaqoji fəaliyyətlə məşğul olaraq Bakı Sosial İdarəetmə və Politologiya institutunda (indiki DİA) “Kulturologiya” kafedrasının müdiri (1992-94) işləyib; müxtəlif ali məktəblərdə “Dünya mədəniyyətinin tarixi və nəzəriyyəsi”, “Azərbaycan mədəniyyətinin tarixi” kurslarından mühazirələr oxuyub.
1994-cü il oktyabrın 10-dan Azərbaycan Respublikası Nazirlər Kabinetinin Mətbuat xidmətinin rəhbəri vəzifəsində işləyir.
2-ci dərəcə Dövlət müşaviridir.
“Dövlət qulluğunda fərqlənməyə görə” medalı ilə təltif edilib.
“Əməkdar jurnalist” fəxri adına layiq görülüb.
“Qızıl qələm” mükafatı laureatı, çoxlu sayda elmi, publisistik məqalənin, tele-radio ssenarilərinin, dram və nəsr əsərlərinin müəllifidir
“Mozalan” satirik kino-ssenarilərinin (“Zərbə”- № 79, 1983; “Üzr istəyirəm”- № 99, 1985; “Tərsinə” – № 121, 1987; “Mükafat”- № 123, 1988; “Qonşular”- № 132, 1989; “Kreslo”- №144, 1989; “Müavin”- № 144, 1989; “Hacı Qara”- №172, 1998);
-Tərcümə əsərlərinin (A.Gertsen – “Olmuşlar, düşüncələr”, V.Mayakovski – “Taxtabiti”, M.Zoşşenko – “Nəhs günü”, J.B.Molyer – “Meşşanın zadəganlığı”, A.Soljenitsin – “Matryonanın ocağı”, A.Çexov – “Hekayələr”, X.Şahani – “Qasırğa”, Qrimm qardaşları – “Bremen musiqiçiləri”, Mitsuko Takaxasi – “Kəpənək mövsümü”, Mark Gelprin – “Şam yanırdı”, Covanni Verqa – “Dişi canavar və b.) müəllifidir.
“Ağır daşlar altında” (Məmməd Arazla söhbət) əsərinə görə “Kaspi” qəzetinin (2013); Mayk Gelprin (ABŞ) “Şam yanırdı” əsərinin tərcüməsinə görə Azərbaycan Tərcümə Mərkəzinin (“Dəf(i)nə yarpağı”-2015) keçirdiyi ədəbi müsabiqələrin qalibidir.
AzTV-nin “Mədəniyyət” kanalında “Zaman və Məkan”, İTV-də isə “Vətənin səsi” televiziya proqramlarının müəllifi və aparıcısı olub.
A.Qorxmaz
