Millət vəkili Qənirə Paşayeva Beynəlxalq Mülkü Müdafiə Təşkilatının medalına və mülki müdafiə sahəsindəki xidmətlərinə görə Beynəlxalq Mülki Müdafiə Təşkilatının sertifikatına layiq görülüb. Bu gün Fövqaladə Hallar Nazirliyində keçirilən tədbir zamanı nazirliyin bir qrup qadın əməkdaşı ilə bərabər, Qənirə Paşayevaya da mükafat Beynəlxalq Mülkü Müdafiə Təşkilatının Baş katibinin müavini Vladimir Quvşinov tərəfindən təqdim olunub.
Bu medalı həyatındakı dəyərli mükafatlardan hesab edən millət vəkili təşkilatın rəhbərliyinə minnətdarlığını bildirib. Fövqaladə Hallar Nazirliyinin cəmi bir neçə il əvvəl yaranmasına baxmayaraq bu gün Azərbaycanın hüdudlarından kənarda da uğurlu fəaliyyət göstərdiyini deyən Qənirə Paşayeva bir neçə gün əvvəl qardaş Türkiyənin bir sıra  bölgələrində səfərdə olduğunu və görüşdüyü bütün insanların Azərbaycanın yardımı üçün Prezident  İlham Əliyevə və yüksək səviyyədə çalışan xilasedicilər qrupuna görə nazirliyə təşəkkür etdiklərini söyləyib.
O, Fövqəladə Hallar Nazirliyi və onun Mülki Müdafiə qurumunda çalışan qadınların sayının artmasını müsbət hal kimi dəyərləndirib və getdikcə qadınların sayının bu qurumda daha da artacağına inandığını deyib.
Millət vəkili Qənirə Paşayeva bu çətin və şərəfli peşədə kişilərlə çiyin-çiyinə yüksək peşəkarlıqla çalışan qadınların sayının artmasını müsbət dəyərləndirib və bildirib ki, qadınlarımızın ölkənin bütün sahələrində rollarının daha da artması Azərbaycanın inkişafına öz müsbət töhfəsini verir. O, Azərbaycan qadınlarının ölkənin bütün sahələrində rollarının daha da artması istiqamətində Prezident İlham Əliyevin və ölkənin birinci xanımı, Heydər Əliyev Fondunun prezidenti Mehriban Əliyevanın gördüyü işlərdən də danışıb və vurğulayıb ki, Azərbaycan qadının böyük potensialı var və qadınların bütün sahələrdə təmsilçiliyinin artması ölkəmizin və millətimizin gələcəyi üçün də vacib amildir.

Modern.az