İrəvanda Türkiyə və Ermənistan jurnalistlərinin iştirakı ilə görüş keçirilir. Modern.az-ın “Novosti Armeniya” agentliyinə istinadən yaydığı məlumata əsasən, görüş “Avrasia-əməkdaşlıq” Fondu tərəfindən təşkil olunub. Bu gün başlayan və 3 gün davam edəcək görüşdə Türkiyənin aparıcı KİV-ləri - CNN Turk, “Milliyet”, “Sabah”, “Hurriet”, “NTV”, “Cumhuriyet”, “Aksam” qəzetlərinin nümayəndələri iştirak edir. Tədbiri keçirməkdə məqsəd əlaqələrin qurulması və iki ölkənin münasibətlərinin KİV-də daha şəffaf və qərəzsiz işıqlandırılması yolu ilə qarşılıqlı etimadın yüksəldilməsinə nail olmaqdır.
Xatırladaq ki, bu cür görüş oktyabrın 13-14-də Bursada keçirilib. Bu görüşdə Ermənistan - Türkiyə münasibətlərinin indiki vəziyyəti, normallaşma prosesi müzakirə olunub. Toplantıda KİV-in proseslərə müsbət təsir imkanları araşdırılıb.