Azərbaycan Respublikasının Ailə, Qadın və Uşaq Problemləri üzrə Dövlət Komitəsi tərəfindən 15 may Beynəlxalq Ailə günü (BMT-nin Baş Assambleyasının 20 sentyabr 1993-cü il qətnaməsinə əsasən) münasibəti ilə may ayının 5-dən 15-dək silsilə tədbirlər və 15 may tarixində isə İsmayıllı rayon İcra Hakimiyyəti ilə birgə İsmayıllı rayonunda yerləşən Heydər Əliyev adına parkda mərasim keçirilib.
Bu bayram artıq 5 ildir ki, komitə tərəfindən regionlarda keçirilir. Tədbirlər planına əsasən, 10 günlük dekada çərçivəsində respublikanın şəhər və rayonlarında milli –mənəvi dəyərlərin qorunub saxlanılması ,gənc nəslin tərbiyəsi, sağlam həyat tərzinin təbliğinə istiqamətləndirilmiş müxtəlif tədbirlər həyata keçirilib və nəticədə kulinariya (17 ailə), əl işləri (15 ailə), yaradıcı ailə (13 ailə), nümunəvi ailə (32 ailə) nominasiyaları üzrə rayonlarda keçirilən müsabiqələrdə qalib gələn ailələr (ata, ana və 2 uşaq) öz bacarıqlarını yekun bayram tədbirində nümayiş etdirib. Yekun tədbirlərində eyni zamanda qonaq qismində ictimaiyyətin tanınmış xadimləri, beynəlxalq təşkilatların nümayəndələri də iştirak ediblər. Dəvət alan qonaqlar ailələrin əl işləri, foto-sərgi və milli koloritləri özündə təcəssüm etdirən xalça və kilimlərlə yaxından tanış olublar. Bayram şənliyində iştirak edən ailələrə Komitə tərəfindən diplom və qiymətli hədiyyələr, eyni zamanda maarifləndirmə məqsədilə çap materialları təqdim edilib.