st1:*{behavior:url(#ieooui) }
QADIN MƏSLƏHƏTXANALARINDA QADINLAR NECƏ "SOYULUR"? Analıq xöşbəxtliyinə nail olmaq qadınların demək olar ki, ən böyük arzusudur. Amma bu gün analıq sevincini yaşamaq o qədər baha başa gəlir ki…
Rüşvətin fəsadları
Dövlət səhiyyə müəssisələrində digər tibbi xidmətlərlə yanaşı, qadınların hamiləlik dövründə və ondan sonrakı müddətdə müayinəsi, uşağın dünyaya gətirilməsi qanunla pulsuz olsa da, bu prosedurları keçmək üçün rüşvət tələb olunur. Elə bu səbəbdən də qadınların çoxu hamiləlik dövründə qadın məsləhətxanalarına getmirlər. Tibb müəssisələrində rüşvət faktoru Azərbaycan ailələrində uşaqların xəstəlik və fiziki qüsurlarla doğulmasına da təsir göstərir. Gələcək anaların hamiləlik dövründə tibbi müayinədən keçməmələri sonradan problemlərin yaranmasına yol açır. BMT-nin Əhali Fondunun hesablamalarına görə, Azərbaycan qadınlarının 60-80 faizi hamilə olduqları müddətdə məsləhətxanalara getmirlər. Bu isə onların gələcək övladlarının fiziki və əqli qüsurlarla dünyaya gəlməsinə və ölümünə səbəb olur.
BMT-nin və başqa beynəlxalq qurumların məlumatına görə, Azərbaycanda dünyaya ana və körpə ölümünün səviyyəsi hələ də yüksək olaraq qalır.
BMT Əhali Fondu mütəxəssislərinin qənaətinə görə, ölkədə hamiləlik və doğuş zamanı baş verən neqativ halların qarşısını almaq üçün tədbirlərin görülməsinə ciddi ehtiyac var. Bunun üçün hamilə qadınlar mütləq tibbi və genetik müayinələrdən keçməlidirlər.
73 manat 40 qəpiyi hazırlayın
Görəsən hamilə qadınlarımızı qadın məsləhətxanalarından yan qaçmağa məcbur edən səbəb doğurdanmı rüşvət faktorudur?
Bu suala aydınlıq gətirmək məqsədilə üz tutduq bir neçə qadın məsləhətxanasına. Əvvəlcə yolumuzu Nərimanov rayonu ərazisindəki 7 saylı qadın məsləhətxanasından saldıq.
Burada ginekoloji kabinetlərin qarşısında gözləyən hamilə qadınlarla söhbətləşib, müayinələrdən keçmək üçün pul tələb olunub-olunmadığını öyrənməyə çalışdıq.
Südabə adlı xanımla söhbətdənı öyrəndik ki, əslində tibb müəssisəsi pulsuz xidmət göstərsə də, hər müayinənin öz haqqı var: "Hamiləsinizsə, ilk növbədə qandakı infeksiyaların təyini üçün analiz verməlisiniz. Bu laborator müayinənin qiyməti 32 manat 40 qəpikdir. Daha sonra xəstə qanda şəkərin, hemoqlobinin təyini üçün laborator müayinədən keçir. Bu analizlərə görə isə 4 manat tələb olunur. Qanda laxtalanmanın səviyyəsini dəqiqləşdirmək üçün isə 2 manat ödəmək lazımdır. Daha sonra hamilə qadın nəcisdən və sidikdən analizlər verməlidir. Qadın məsləhətxanalarının nəzdində fəaliyyət göstərən laborotoriyada 5 manat bu analizlərə görə alınır. Yaxmanın mikroskopiyasının qiyməti isə 10 manatdır. Hamilə qadının "Ultrasəs" (UZİ) müayinəsindən keçməsi üçün isə 7-10 manat arası pul tələb olunur".
Həmsöhbətimin dediyinə görə, bu yoxlamalardan keçdikdən sonra ana olmağa hazırlaşan qadın təkrar ginekoloqun yanına gedir. Laborator müayinələrin nəticələrinə görə, resept yazan həkimə ən azı 10 manat "hörmət" edilməlidir.
Beləliklə hamilə qadın bir dəfə tibbi müayinədən keçməyə görə 73 manat 40 qəpik pul xərcləyir. “Reaktivə pul veririk”
Nəsimi rayonundakı 1 saylı qadın məsləhətxanasında da hamilə qadınlar müayinələrə görə pul tələb olunduğunu gizlətmədilər. "Başına ələn başmaqçı olar" deyən Gülmirə adlı qadın artıq ikinci dəfədir ki, qadın məsləhətxanalarında tibbi personala pul payladığını bildirdi: "Qiymətləri əzbərləmişəm. Pul verməsən də keçinmək olmur. Bu elə bir məsələdir ki, söhbət uşağın gələcək taleyindən gedir. Analizə pul verməsən dilləri ilə deyirlər ki, səhv çıxaracağıq. "UZİ" həkiminə hörmət etməsən, uşağın başının, çəkisinin ölçüsünü demir. Naəlac qalıb istəyənə "hörmət" edirik ki, əziyyətimiz heçə çıxmasın. Amma elə qadınlar tanıyıram ki, pulu olmadığına görə, qadın məsləhətxansına gəlib vaxtı-vaxtında yoxlana bilmir. Belələrinin də bətnindəki körpə ya 9 aya çatmır, yaxud da ölü doğulur".
Bu Qadın məsləhətxanasında qanda infeksiyaların təyini üçün nə qədər pul alındığını öyrənmək məqsədilə pasiyent kimi müraciət etdik. Tibb müəssisəsindən bizə bildirdilər ki,
Rubella 1 G
Nerres Simrlex 1 G
Nerres Simrlex 1 M
Nerres Simrlex 2 G
Nerres Simrlex 2 M
Sitomeqalovirus G
Sitomeqalovirus G
Toksorlazmoz G
Toksorlazmoz M
Listerioz
Xlamidoz G
Xlamidoz M
Bruselyoz
infeksiyalarına görə müayinə üçün 33 manat pul ödənilməlidir. Müayinələrin pulsuz olduğunu söylədikdə isə, tibb işçisi bizə "analizi aparmaq üçün reaktivlərə bir ətək pul veririk, ona görə də pasiyentlərdən pul alınır" cavabını verdi.
Qeyd edək ki, qadın məsləhətxanalarının hər birində analiz üçün pul tələb olunmasının səbəbini, tibb müəssisəsinin öz pulu ilə reaktiv alması ilə izah etdilər.
Qeydiyyat əngəli
Hamilə qadınlarla söhbət zamanı onu da öyrəndik ki, müayinələr üçün pul vermədikləri təqdirdə qeydiyyata almırlar. Aynur adlı xanımın sözlərinə görə, belə halda hamilə qadını məcbur edirlər ki, pasport qeydiyyatında olduğu ünvanda qeydiyyata düşsün. Bu isə çox vaxt mümkün olmur. Bəzilərinin Bakıda qeydiyyatı yoxdur, ona görə də, məcbur olub müayinə, qan analizləri üçün tələb olunan məbləği ödəyirlər.
"Özəl"ə göndəriş
Beləliklə bir hamilə qadının lazımi tibbi müayinələrdən keçməsi üçün nə qədər pul tələb olunduğunu kiçik araşdırma zamanı üzə çıxartdıq. Amma xatırladaq ki, "Hamiləliyin Təqib Proqramı"nın tələblərinə görə, hamilə qadın hamiləliyi təyin olunduğu gündən başlayaraq, bu dövrün başa çatdığı zamana qədər müayinələrə cəlb olunmalıdır. Beynəlxalq standartlara görə, hamilə qadınların bu müddətdə müayinələrdən keçməsi üçün həkimə müraciət sayının ən azı 9 dəfə olmasını nəzərə alsaq, xərc 9 dəfə böyüyür. Yuxarıdakı məbləğlə 9 dəfə müayinə üçün həkimə müraciət edən hamilə qadın bu dövr ərzində 820 manat 40 qəpik xərcləməlidir.
Amma bu məbləğ yalnız dövlət səhiyyə sisteminin müəssisələrində laborator analizlərə tələb olunur. Məlumdur ki, çox vaxt ginekoloqlar xəstələrini sözügedən laborator testləri vermək üçün özəl tibb müəssisələrinə də göndərir.
Onların hamilə qadınları göndərdikləri tibb müəssisələri əsasən "Baku Medical Center", "Vital", "New Med", "Caz", "LAB" dır. Biz qadın məsləhətxanalarında olarkən bir neçə belə faktla rastlaşdıq. Müvafiq analizlərin qeyd olunduğu göndəriş vərəqəsində həkimin adını və soyadı göstərilmişdi. Bu isə ginekoloqların həmin tibb müəssisələri ilə əlbir işlədiyindən xəbər verir. Hətta qadın məsləhətxanasındakı həkimlərin özəl klinikalardan göndərdikləri xəstələrin sayına uyğun olaraq aylıq faiz də aldıqları deyilir.
Qeyd edək ki, bəzi özəl tibb müəssisələrində qan analizləri istisna olmaqla, yerdə qalan müayinələrin qiymətlərində elə ciddi fərq yoxdur. Məsələn, ən ucuz özəl tibb müəssisəsi sayılan "Nəbz" klinikasında qanın ümumi analizinin qiyməti 87 manatdır. Amma hamilə qadının “UZİ” müayinəsindən keçirilməsi üçün 21 manat tələb olunur.
Nəcis, sidik və yaxmanın analizlərinin qiyməti isə 5-8 manat arasında dəyişir. Klinikada rastlaşdığımız hamilə qadınların əksəriyyəti buraya həkimin göndərişi ilə gəldiklərini söylədilər. Amma aralarında dövlət laboratoriyalarında göstərilən xidmətin keyfiyyətinin aşağı olması üzündən özəl klinikalara müraciət etdiklərini deyənlər də tapıldı. Klinikada növbə gözləyən Kəmalə adlı xanım bildirdi ki, özəl klinikalarada qiymətlər dövlət tibb müəssisələri ilə müqayisədə baha olsa da, insanın ürəyi sakit olur: "Burada xərclədiyimdən bir qədər az dövlət xəstəxanalarında alırlar. Hələ ürəyində analizin düzgün olub-olmadığı barədə şübhə də qalır. Ona görə də, bir qədər artıq xərcləyib özəl klinikada müayinədən keçməyə üstünlük vermişəm".
Müayinə və analizlər pulsuzdur
Səhiyyə Nazirliyindən isə bildirirlər ki, dövlət tibb müəssisələrində bütün xidmətlər, eləcə də hamilə qadınların tibbi müayinəsi bütün qadın məsləhətxanalarında pulsuz aparılmalıdır. Nazirliyin mətbuat xidmətinin rəhbər Anar Qədirli bizə bildirdi ki, bu, qanunda da xüsusi qeyd olunub: "Əhalinin sağlamlığının qorunması haqqında" qanunun 17-ci maddəsində" deyilir: Hər bir qadın hamiləlik dövründə, doğuş və doğuşdan sonrakı dövrdə dövlət səhiyyə sisteminin müəssisələrində ixtisaslaşdırılımış tibbi yardımla pulsuz təmin olunur".
Nazirliyinin tabeçiliyində olan bütün səhiyyə ocaqlarında hamiləlik müddətində və doğuş zamanı pulsuz yardım göstərilməlidir. Hamiləliyin təyini, laborotor təhlillər və diaqnostik müayinələr, doğuşa hazırlıq məqsədilə istifadə olunan dərman və tibbi sərflər, keysəriyyə əməliyyatı və ağrısız doğuş zamanı cərrahın, mama-ginekoloqun, həkim neonatoloqun və bu prosesdə iştirak edəcək tibbi personalın əmək haqları, bu proqrama daxildir".
Rekativlərin dövlət tibb müəssisələri tərəfindən pulla alınmasına gəlincə, A.Qədirli bu faktı da təkzib etdi. Analizlər üçün reaktivlərin bütün dövlət tibb müəssisələrinə pulsuz verildiyini söylədi. Bu da Səhiyyə Nazirliyindən verilən cavab. Sözdə belə deyilir, əməldə olanları isə yolu səhiyyə müəssisələrinədn düşən hər bir kəs bilir…
Vüsalə Şabanova