“Azərbaycan xalqına, Azərbaycan gənclərinə müraciət edərək ailəmizə üz vermiş ağır faciə - oğlum Ceyhun Qubadovun ölümü ilə əlaqədar kədərimizi bölüşdüyünüzə görə hər birinizə səmimi minnətdarlığımı bildirirəm”. Bu sözlər Daşkəsəndəki N saylı hərbi hissənin mərhum əsgəri Ceyhun Qubadovun anası Samirə Qubadovanın APA-ya gönədrdiyi ictimaiyyətə müraciətində əksini tapıb.
S. Qubadova müraciətində daha sonra yazır: “Mən Azərbaycan dövlətinə, onun prezidenti İlham Əliyev cənablarına inanıram və ümidvaram ki, oğlumun ölümü ilə əlaqədar başlanmış cinayət işi obyektiv araşdırılacaq və bu işdə təqsiri olan bütün şəxslər cinayət məsuliyyətinə cəlb olunmaqla layiqli cəzalarını alacaqlar.
Bu hadisə ilə əlaqədar müxtəlif vəzifəli şəxslər tərəfindən qəbul olunmuşam. Mənə və ailəmizə verdikləri mənəvi dəstəyə və kədərimizi bölüşdüklərinə görə həmin şəxslərə, eyni zamanda Milli Məclisin üzvlərinə dərin təşəkkürümü bildirirəm. Mənə və ailəmizə dövlətimizin və hökumətimizin dəstəyi yetərlidir.
Mənim kədərimdən, mənim qüssəmdən heç kəsin sui-istifadə etməsinə ixtiyarı yoxdur. Xahiş edirəm bu hadisədən siyasi məqsədlər üçün istifadə olunmasın və bununla bağlı hər hansı aksiyanın keçirilməsinin tamamilə əleyhinəyəm”.
Qeyd edək ki, sosial şəbəkələrdə bir qrup şəxs sabah saat 16.00-da "Əsgər ölümünə yox!" şüarı ilə Fəvvarələr meydanında etiraz aksiyası keçirəcəyini bəyan edib.
Daxili İşlər Nazirliyi bəyan edib ki, Bakı Şəhər İcra Hakimiyyəti ilə razılaşdırılmamış istənilən aksiya qanunsuz olduğundan onun qarşısı polis əməkdaşları tərəfindən alınacaq.
Modern.az
