Millət vəkili, Böyük Quruluş Partiyasının sədri Fazil Mustafa DEVAMM-ın (Dini Etiqad və Vicdan Azadlıqlarının Müdafiə Mərkəzi) sədri İlqar İbrahimoğlunu Azərbaycanda İslam dininin dövlət dini kimi tanınmasına yönəlik çıxışını dəstəkləyib. Modern.az-ın məlumatına görə, deputat DEVAMM sədrini tənqid edənləri qınayıb.
“Tanınmış ictimai xadim İlqar İbrahimoğlunun İslamın dövlət dini kimi tanınmasına yönəlik açıqlamasına qarşı aqressiv reaksiyaları anlamaq olmur. Mən prinsip olaraq "dövlət dini" termininin işlədilməsinin əleyhinəyəm, çünki dinin hansısa dövlətə mənsubluğunun açılışını vermək xeyli mürəkkəb sualları doğura bilər. Necə ki, İslam dövləti adını Yaxın Şərqdə xüsusi despotik rejimlərə calaq edəndə nə qədər mənasız görüntü ortaya çıxır. Ancaq fikrimcə Konstitusiyamızın 18 və 48-ci maddələrində ölkəmizin vətəndaşlarının əksəriyyətinin İslam dininə etiqad etməsi faktı mütləq qeyd olunmalıdır. Çünki dövlət bayrağımızı şəkilləndirən prinsiplərə Konstitusiyada mütləq xatırlatma olmalıydı. Əvvəllər də qeyd etdiyim bir cəhəti yada salmaq istərdim: Bizdə insanların çoxu milli bayrağımızı üç rəngi ilə bütöv halda həzm edə bilmirlər. Ya bir, ya da iki rənginin mahiyyətini qəbul edirlər. Halbuki, hər üç rəngin mahiyyətinə bütöv olaraq sayğı duymaq, əsl Azərbaycançılıq sayıla bilir”-deyə F.Musfata qeyd edib.
Anar RÜSTƏMOV
