Modern.az elektron mediada ilk dəfə olaraq müasir Cənubi Azərbaycan ədəbiyyatının təqdimatı gerçəkləşdiri. Azərbaycan Yazıçılar Birliyinin Cənub ədəbiyyatı şöbəsi ilə birgə, ortaq layihə çərçivəsində oxucular cənublu yazarların yeni nəsli ilə tanış olmaq imkanı qazanır. O tayla bu tay arasında qarşılıqlı ədəbi körpü yaradacaq bu layihədə növbəti qonağımız güneyli şairə Türkan Urmuludur.
Türkan Urmulu 1985-cı ildə Azərbaycanın ən əski mədəniyyət ocaqlarının biri olan Urmuda anadan olub. 2005-ci ildə Urmuda “Yaz” nəşriyyatı tərəfindən “Gördüm” adlı ilk şeir kitabı nəşr edilib. Hüquq üzrə bakalavr təhsilini Urmuda tamamladıqdan Türkiyəyə gedib və Ankara Universitetində beynəlxalq özəl hüquq üzrə yüksək “master” səviyyəsinə yüksəlib.
2011-ci ildə “Özgə Toz” adlı ikinci şeir kitabı Bakıda “Qanun” nəşriyyatında nəşr edilib.
Türkan Urmulu hazırda şeir yazmaqla yanaşı, Türkiyədə Güney Azərbaycan ədəbiyyatı ilə bağlı dərgi üzərində də çalışır. Həm də ədəbiyyat əsərlərinin tərcüməsi ilə məşğuldur.
Həyat yoldaşı Ramin Cabbarlı ilə birlikdə çevirdikləri əsərlər 2013-cü ildən etibarən Türkiyənin “Kayak” nəşriyyatı tərəfindən işıq üzü görməyə başlayıb. Təxminən 20 cilddə çap olunacaq kitablar sırasına Səməd Behrənginin ədəbi və tənqidi əsərləri, Abdulla Şaiqin, uşaq ədəbiyyatına aid əsərlər və bir sıra başqa əsərlər daxildir.
Türkan xanım həm də Türkiyədə yayımlanan “Ban” dərgisinin yazı işləri müdiridir. “Ban” çağdaş Güney Azərbaycan ədəbiyyatını Güneyin xaricində tanıtmaq məqsədi ilə fəaliyyət göstərir. Bu dərginin redaksiya heyətində Hadi Qaraçay, Ramin Cabbarlı və Toğrul Atabay şeir, məqalə və hekayə bölümlərinə cavabdeh şəxslərdir.
Türkan xanım həm də Güney Azərbaycanda qadın məsələləri ilə bağlı fəaliyyət göstərməkdədir.
Hazırda Türkan Urmulu həyat yoldaşı Ramin Cabbarlı ilə birlikdə Türkiyədə siyasi mühacir olaraq yaşayır.
Türkan Urmulunun bəzi şeirlərini sizlərə təqdim edirik:
1.
Nə bir kağaz imzaladıq birlikdə
nə bir ayə oxundu
o kutsal kitabın hökmlərindən
məhrəmiyyətimizə dair
şahidlərin məhzərində
adım yazılmadı
ərkəklik kimliyinin namus səhifələrində
bilirəm
ağıllı qadınam hə
sezirəm
görürəm
mən sənin heç bir zaman
heç bir kəsin olmadım
olmayacağımı da
çox yaxşı bilirəm!
yalnız
sevgimi?
sevdamı?
Tutduğum o çılğın şeyin adı?
Bilməyirəm ...
düşdü gözlərindən canıma
dəp dəli bir doluluq!
deyirlər yanlış
sonu boşluq!
duymayıram ...
çünki həyatımın tək gərçək sözcüyü
sən!
Görən suçlasın məni
dışlasınlar
daşlasınlar
razıyam
axı səndən vaz keçmənin yollarını mən
nə bilirəm
nə də bilmək istəyirəm ...
2.
Soruşmayın
Səsszilikdir yanlız bu hikayənin adı
Məndən də çarəsizdir çünkü
əlindən siqarası düşməyən
o ucaboylu adamın
kədərli sevdası
soruşmayın
sonsuzluqdur yalnız bu hikayənin adı
məndən də çarəsizdir çünkü
gözlərinin hüznünə dalıb getdiyim
o çılğın
o yorğun
o sevda soylu adamın
sehirli sevdası
3.
Sevgi toxumunu üreyimə
bir baxışınla əkdin
sonrada getdin
gəbə qaldı yalnız ürəyim
bilmədin!
yeriklədim dodaqlarına
yeriklədim əllərinə
yeriklədim gülüşünə
baxışına
səsinə
yeriklədim
yeriklədim
yeriklədim
gecələr boyu erkək qoxuna
nəfəsinə ...
bilmədin!
dəfələrcə qusdum
bulandım
yoruldum
gündən günə ağırlaşdım
hərdən də bir yıxıldım
amma qalxdım
çünkü söküb ata bilmədim ürəyimdən
qıya bilmədim ona
o ən məsum yasağıma!
nəysə qərarlıyam mən
toxunmayacayam ona
qalsın dursun elə orda
mənə haram olsa da
onu doğammasam
qucağıma alammasam da...
4.
Nə əsrinizin filosofunun
ən yeni kitabını sunun
mənim bu qorxunc yanlızlığıma!
Nədə rəngli qədəhlərlə şaqqıldayan
Təntənəli bir eyləncəyə çağırın
Yorulmuşam
Həm bütün dərin görünən anlamları anlamaqdan
Həm də anlamsızlıqlara anlam verməyə çalışan
Bom boş ışıltılardan
Özləmişəm yanlız
yenə şairliyim ön pilanda
Məni sevən varsa aranızda
Bir baxış gözlərindən günəş gətirin lütfən
Bir sətir də yağış
Səsindən
Sözlərindən
Bir toxunuş da torpaq
əllərindən
Möhtəşəm yetər
Artıq yaşaram mən ...
5.
İnamlarımla dolu çantam hazır
Geymişəm
Yolların daşlarından, tikanlarından qorxmayan
başmaqlarımı
Tut artıq əllərimi
Sevdaliyam
Sevdaliyam ...
Gözlərindəki ışığa inandırdın məni
Mən səninlə
Yola çıxmağa
Qərarlıyam
Qərarlıyam ...
Hazırladı : Elmin Nuri