|
“Trend” İnformasiya Agentliyinin konfrans zalında "Media kuboku-2010" mini-futbol turnirinin püşkatma mərasimi keçirilib. Turnirin Təşkilat Komitəsinin sədri, "Şərq" qəzetinin baş redaktoru Akif Aşırlı bildirib ki, artıq 7-ci ildir ki, "Şərq" qəzetinin təşkilatçılığı və təşəbbüsü ilə KİV komandaları arasında mərhum dövlət başçısı Heydər Əliyevin xatirəsini anım mahiyyəti daşıyan futbol turniri keçirilir. Həmişə olduğu kimi, bu il də ənənəvi turnirin keçirilməsi üçün lazım olan bütün tədbirlər, təşkilati işlər yekunlaşıb. Bakı Dövlət Universitetinin İdman Kompleksində keçiriləcək turnir AFFA-nın hakimlər korpusu tərəfindən idarə ediləcək. A.Aşırlının verdiyi məlumata görə, yarışın sponsorları arasında bu dəfə dəyişiklik edilib. "Media kuboku"nun son 5 ildə baş sponsoru olan "Bakcell" şirkətini bu dəfə "AKKORD" Şirkətlər Qrupu əvəzləyib. Yarışa həmişə maliyyə dəstəyi göstərən "Muğanbank" bu dəfə də ənənəsinə sadiq qalıb.
A.Aşırlı bildirib ki, "Media kuboku - 2010" uğrunda yarışda 10 komanda 2 qrupda mübarizə aparacaq. “İdman Azərbaycan” telekanalı, ATV, Space TV, Xəzər TV, İctimai Televiziya, "Yeni Azərbaycan", "525-ci qəzet" + "Ədalət" qəzetləri, mətbuat yayım firmalarından isə "Səma"nın komandası mübarizə aparacaq. Turnirin təşkilatçısı "Şərq" isə bu dəfə ANS telekanalının komandası ilə birgə meydana çıxacaq.
Sonra «AKKORD» Şirkətlər Qrupunun İctimaiyyətlə Əlaqələr şöbəsinin əməkdaşı Bəhruz Quliyev çıxış edərək bildirib ki, media nümayəndələri arasında keçirilən bu nüfuzlu yarışmaya tikinti sektorunun lideri olan şirkət tərəfindən biganə münasibət ola bilməz. Bu səbəbdən də «AKKORD» KİV komandalarının həmrəylik turnirini bir qədər də maraqlı etmək üçün öz maliyyə dəstəyini göstərəcək. Yarışmada I yeri tutan komanda 1000 manat, II yeri tutan 500 və III yerin sahibinə 300 manat mükafat veriləcək. Bundan başqa ən yaxşı qapıçı, müdafiəçi, yarımmüdafiəçi, hücumçu və bombardir mükafatlandırılacaq.
Sonra püşkatma mərasimi keçirilib. Təşkilat Komitəsinin sədr müavini Yusif Nəzərli yarışmanın Əsasnaməsi ilə bağlı məlumat verib. Onun sözlərinə görə, budəfəki yarışmada 10 komanda 2 qrupda mübarizə aparacaq. Təşkilatçı komanda və «media kuboku»nun ən çox qalibi olmuş Az TV qrup liderləri təyin ediliblər. Püşkün nəticələri belədir:
A qrupu: 1. «Şərq»+ANS. 2. Space TV. 3. "525-ci qəzet" + "Ədalət". 4. Səma. 5. İctimai Televiziya.
B qrupu: 1. “İdman Azərbaycan”. 2. ATV. 3. Xəzər TV. 4. «Yeni Azərbaycan» qəzeti. 5. «Muğanbank».
Turnirin bütün matçları Bakı Dövlət Universitetinin idman kompleksində keçiriləcək.
Modern.az