Hər il istər dövlət təqaüdü, istər fərdi qaydada Azərbaycandan xarici ölkələrə yüzlərlə tələbə yollanır, bir o qədər də vətəndaşımız mötəbər ali təhsil ocaqlarını bitirərək, mütəxəssis kimi geri dönürlər. Bu gənclərin potensialından seçkilərdə istifadə etmək üçün Azəri Gənclər Alyansı “ Xaricdə təhsil alan gənclərin seçkilərdə fəallığının artırılması” mövzusunda növbəti - üçüncü tədbirini keçirib.
Avqustun 17-də “İrəli” Gənclər Mərkəzində təşkil edilən mərasim Prezident yanında Gənclər Fondunun maliyyə dəstəyi ilə keçirilib. Dəyirmi masaya millət vəkili Ceyhun Osmanlı, AR-nın Prezidenti yanında Gənclər Fondunun nümayəndəsi Vaqif Seyidbəyov , ekspertler, hazırda xaricdə təhsil alan və məzun olmuş onlarla fəal gənclər qatılıblar.
Azəri Gənclər Alyansının sədri Leyla Məmmədli seçkilərdə gənclərin fəallığının xüsusi əhəmiyyət kəsb etdiyini vurğulayaraq, dünyanın müxtəlif ölkələrində ali təhsil alan gənclərimizi seçkilərdə fəal iştirak etməyə və vətəndaş borcunu yerinə yetirməyə səsləyib
Millət vəkili Ceyhun Osmanlı bildirib ki, xaricdə təhsil alan azərbaycanlı gənclərin seçkilərdə fəal iştirakı vətəndaş cəmiyyətinin inkişafında xüsusi rol oynayır.
Prezident yanında Gənclər Fondunun nümayəndəsi Vaqif Seyidbəyov qeyd edib ki, seçki kampaniyalarında xarici ölkələrdə yüksək ali məktəblərdə təhsil alan və təhsilini bitirib geri dönən gənc mütəxəssislərin bilik və bacarıqlarından lazımınca istifadə edilməlidir.
”Gənclər cəmiyyətin təkanverici avanqard hissəsidir. Bu səbəbdən, xaricdə təhsil alan gənclər öz ailələri, dostları, icması və cəmiyyətlərində müsbət mənada söz sahibi olurlar. Onlar seçki prosesində fəal olmaqla digərlərinə nümunə göstərməlidirlər”.
Azəri Gənclər Aliyansının rəhbəri Leyla Məmmədli təklifləri dəstəkləyərək bildirib ki, xaricdə təhsil alan və məzun olmuş gənclərin potensial qüvvəsindən ölkəmizin tərəqqisi naminə daha çox istifadə olunması üçün bir sıra mühüm işlər görmək niyyətindədirlər.
Modern.az
