- Ağez, salam.
- Salam.
- Bu uşağın xeyir işi nə oldu a..?
- Bəs bilmədin? Ölənlərin rəhmətlik. Gəlinin 90 yaşında nənəsi rəhmətə getdi. Ona görə toyu təxirə saldıq.
- Allah rəhmət eləsin. Amma xeyir işi çox da uzatmazlar.
- Bilirəm. Arvadın 40-ının çıxmasını gözləyirik.
- Düz edirsiz. Ölüyə hörmət qoymaq lazımdır. Əvvəllər ilin gözləyirdilər. İndi 40-ı çıxsa bəsdir.
- Əlbəttə ki... Nə olsun qocadır. Hamımız öləcəyik. Bir də ki, bu bizimçün deyil a... Cavanlar da ibrət götürməlidir. Biz öləndə də bu cür hörmətimizi saxlamalıdırlar.
- Düz deyirsən qırx qırxdır. Ölüyə sonuncu hörmətimizdir.
ƏDALƏT ƏSGƏROĞLUGİLİN MƏHLƏSİNDƏ
- Xəbərin var?
- Nədən?
- Ədalət Əsgəroğlu rəhmətə gedib.
- Vay. Nədən? Cavan idi ki...
- İnfarktdan. 56 yaşında.
- Allah rəhmət eləsin.Nə işləyirdi?
- Şair idi. Amma vəzifəsi çox böyük idi. Azərbaycan Yazıçılar Birliyində mətbuat katibi idi.
- Bunun nəyi böyük vəzifədir ki. Yazıçılar Birliyində hamısı yazan-pozan. Özləri katibdirlər də... Bunlara nə katib? Dilləri yoxdur ki, özlərini müdafiə etsinlər? Bütün günü saytda, qəzetdədirlər də...
- Elə demə çox böyük vəzifədir. Nə olurdusa bu yazığı verirdilər qabağa. O da boğula-boğula, qarala-qarala ondan yuxarı vəzifəlilərin sözün deyirdi. Buna görə çox dostlarıyla üz-göz, düşmən də olmuşdu.
- Amma nə deyirsən de, mətbuat katibi böyük vəzifə deyil...
- Çox böyük vəzifədir.
- Anardan da? Fikrət Qocadan da? Çingiz Abdullayevdən də?
- Hə... hə...
- Sübut elə.
- Bax katiblərdən kimsə ölsə Allah eləməmiş, birinci 40 –nın çıxmağın gözləyəcəklər. Sonra da bir-iki ilə qurultay çağırıb yerinə adam qoyacaqlar. Amma Ədalət Əsgəroğlunun vəzifəsi o qədər vacib bir postdur ki, 7-si çıxan kimi, 2-ci cümə axşamında yerinə adam təyin etdilər. Özü də qəzet, sayt qalmadı... car çəkdilər.
- Bəs mentalitet? Adət-ənənə. 40-ın çıxmağı. Ölüyə hörmət? Ölüyə yox e... sənətkara, şairə hörmət?
- Ay rəhmətliyin qızı, nə qoyub, nə axtarırsan?
- Əgər yazıçılarımız belə şeylərə hörmət qoymurlarsa, onda xalq nə etsin?
- Az danış. Ölən ölməsin. “Allah Ədalət Əsgəroğluna rəhmət eləsin” de. Yaxşı adam idi.
- Həm də ki, Azərbaycanın düşünən başlarının, yazan əllərinin danışan dili idi... rəhmətlik.
- Canı qurtardı bu həyatdan. Ev qalmaqallarından. Fikrət Qoca Şərif Ağayar davalarından, uşağı yaşında yazarlarla katiblər arasındakı qovğalardan. Daha nələrdən... Daha nələrdən...
- Allah o dünyasın versin. Yəqin ki Cənnətdədir. Axirət Dünyası Azərbaycan Yazıçılar Birliyinin sədri Qabil çox istəyirdi onu. Gözündən uzağa buraxmaz. Yəqin ora çatan kimi mətbuat katibi təyin edib.
- Yox, heç vaxt. Sənin ağlın burdakılara getməsin. Ordakıların qələmləri də var, düşünən başları da, özlərini müdafiə etməyə dilləri də. Mətbuat katibinə ehtiyacları yoxdur.
- Nə isə... çox qəliz danışdın Dur ATV-ni aç. Zaurun verilişi başlayır. Bir az şoka düşək. Axşam da “Möhtəşəm yüz il” serialı var. Yadından çıxarma..