Modern.az

Şəhid məzarları ilə qısa dialoq

Şəhid məzarları ilə qısa dialoq

26 Noyabr 2013, 17:03

Bu günlərdə şəhərə gəzməyə çıxmışdım. Evdən çıxmazdan əvvəl şəhərin hansı yerlərini gəzəcəyimi düşünürdüm. Təbi ki, gəzəcəyim yerlər arasında xalqımızın müqəddəs and yeri sayılan Şəhidlər Xiyabanı da var idi. Elə ilk əvvəl xalqımızın müqəddəs and yeri olan Şəhidlər Xiyabanına gəldim. Diqqətlə məzarlara baxa-baxa, asta-asta yeriməyə başladım. Beləcə mən vətənimizin azadlığı uğrunda canlarını fəda etmiş vətən oğullarının xatirəsini yad etməklə yanaşı, onlarla qısa dialoqda oldum. Hər dəfə məzarlara diqqətlə baxdıqca, dərin düşüncələrə dalıram.

Hər dəfə də onlarla öz dünyamda söhbət edirəm. Elə zənn edirəm ki, onların bizlərə deyiləsi çoxlu sözləri var, özü də lap çox. Məzarlar sanki dilə gəlib danışırdı mənimlə. Yenə də məzarlar narazı görünürdü. Ona görə ki, biz hələ də onlar kimi düşmənə gücümüzü göstərib, şanlı zəfər tarixini yaza bilməmişik. Onlar bizə belə öyrətməmişdi. Amma hələ də 20 faiz torpaqlarımız düşmən tapdağı altında inildəyir. Ona görə də burda uyuyan şəhidlərimizin ruhu hələ də dinclik tapmır. Vətənimizin azadlığı uğrunda canlarını fəda etmiş şəhidlərimizin ruhlarının hələ də dinclik tapa bilməməsi, hər bir vətəndaş üçün çox ağrılıdır. İndi bu məzarlarda uyuyan vətən fədailəri biz gənclərin üzərinə şərəfli bir vəzifə qoyublar. Vətən torpaqlarını mənfur düşməndən azad edib, onların ruhunu şad etmək. Sanki məzarlar dilə gəlirdi, dilə gəlib belə deyirdi. “Biz sizlərə qəhrəmanlıq örnəyi ola bilmədikmi? Əli yalın meydanlara çıxıb vətənimizin azad olmasını biz istəmədikmi? Vətən uğrunda sinəmizi gülləyə tuş etmədikmi? Bəs, siz nə edirsiniz? Şuşam, Laçınım, Qarabağım hələ də işğal altındadır deməklə torpaqmı azad olar? Bəs deyilmi 20 il bu həsrətə dözdük. Yetər... Bəlkə şəhid olmaqdan , ölməkdən qorxursunuz? Ölmək qorxulu deyil. Qorxulu Vətən üçün ölə bilməməkdədir. Qorxulu bizlər üçün Qarabağsız, Vətənsiz qalmaqdır”.

Bir an fikrə dalıram.

Düşünürəm ki, onların ruhunu şad etmək üçün, işğal altında inildəyən vətən torpaqlarını nəyin bahasına olursa-olsun işğaldan azad etməliyik. Elə bu fikirlərlə şəhid məzarlarının önündən yavaş-yavaş aralandım, şəhərin mənzərəsini seyr etdim. Onu da çox yaxşı anladım ki, nə vaxta qədər ki, Qarabağ düşmən tapdağı altında inildəyəcək , şəhid məzarları da o vaxta qədər rahat olmayacaq. Vaxt çoxdan yetişib. Əsl vətən sevgisinin nə qədər böyük ilahi sevgi olduğunu sübut etməyin vaxtıdır. Əbəs yerə deyilmir ki, “vətən anadır”. Anamızı azad və xoşbəxt görmək üçün , şəhid məzarlarında uyuyan vətən oğullarının ruhlarını şad etməliyik, vətən torpaqlarını azad etməklə . .

Abbas Qəmli

Whatsapp
Bizə yazın!
Keçid et
Ukrayna ordusu dəhşət saçdı: Rusiya ərazisi vuruldu