Prezident İlham Əliyevin bir neçə gün öncə imzaladığı sərəncamla Sahib Nurəddin oğlu Ələkbərov Azərbaycan Respublikası vergilər nazirinin müavini təyin edilib. Ələkbərov Sahib Nurəddin oğlu 1952-ci il yanvar ayının 10-da Samux rayonunda anadan olub.
1972-ci ildə Azərbaycan Neft və Kimya İnstitutunu, 1984-cü ildə Moskva İctimai Elmlər Akademiyasını bitirib.
Ordu sıralarında hərbi xidməti başa vurduqdan sonra, 1974-cü ildən Azərbaycan Dəmir yolu Biləcəri qovşağında mühəndis, 1975-ci ildən 1996-cı ilədək komsomol və partiya orqanlarında, 1996-cı ildən 2005-ci ilədək özəl sahələrdə müxtəlif vəzifələrdə işləyib. İki çağırış Azərbaycan SSR Ali Sovetinin deputatı, komissiya sədri olub.
2005-ci ildən 2009-cu ilədək Bakı şəhəri Səbail rayon İcra Hakimiyyətinin başçısı, 2009-cu ilin iyun ayından Azərbaycan Respublikası Dövlət Statistika Komitəsi sədrinin müavini vəzifələrində çalışıb.
2010-cu il iyul ayının 2-də Azərbaycan Respublikasının Prezidenti İlham Əliyevin 996 saylı sərəncamı ilə vergilər nazirinin müavini təyin edilib. Ailəlidir, üç övladı var. Modern.az