Modern.az

Eldar İbrahimov: "Naxçıvandakı ağır şərait bizi siyasiləşdirib"

Eldar İbrahimov: "Naxçıvandakı ağır şərait bizi siyasiləşdirib"

Reportaj

26 İyul 2010, 14:05

Millət vəkili jurnalist polemikası



Modern.az
saytı və Parlament Jurnalistləri Birliyinin (PJB) başladığı layihə çərçivəsində parlament jurnalistlərinin Milli Məclisin komitə sədrləri ilə görüşləri davam edir. İndiyədək parlamentin İnsan hüquqları komitəsinin sədri Rəbiyyət Aslanova, Mədəniyyət komitəsinin sədri Nizami Cəfərov və Sosial siyasət komitəsinin sədri Hadi Rəcəbli ilə görüşən PJB üzvlərini bu dəfə Aqrar siyasət komitəsinin sədri Eldar İbrahimov qəbul edib.
Görüşdə PJB sədri Elşad Eyvazlı, “Kaspi” qəzetinin əməkdaşı İlham Quliyev, “Ayna” qəzetinin əməkdaşı Fərəh Əliyeva, "Olaylar" agentliyinin əməkdaşı Alim Hüseynli, AzərTAc-ın əməkdaşı Xətayi Əzizov, Üç nöqtə” qəzetinin əməkdaşı Elməddin Muradlı, APA-nın əməkdaşı Elnur Məmmədli iştirak edib. 

Açıq diskussiya şəklində keçirilən bu görüşdə də üçüncü çağırış Milli Məclisin beş illik fəaliyyətinə komitə rəhbərinin münasibəti öyrənilib, komitənin gördüyü işlər, hazırladığı sənədlər barədə geniş məlumat əldə olunub, digər məsələlər barədə jurnalistləri maraqlandıran suallara cavab alınıb. Modern.az söhbəti bütünlüklə təqdim edir.

Eldar İbrahimov:

- Mətbuat günü münasibətilə hamınızı ürəkdən təbrik edirəm. Bu görüşümüz belə  gözəl vaxta, jurnalistlərin bayram gününə düşüb. Sizin simanızda milli mətbuatımızı, bütün jurnalistlərimizi təbrik edirəm. Əlbəttə, Azərbaycanda jurnalistika sahəsində çox təcrübəli, çox bacarıqlı jurnalislət var, elə sizin aranızda da var. Bayramla əlaqədar olaraq bizim möhtərəm Prezidentimiz də jurnalistləri “Əməkdar jurnalist” adı, “Əməkdar mədəniyyət işçisi” adı, bir də “Tərəqqi” medalı ilə təltif etdi. Mən də onun tərəfdarıyam ki, jurnlistlərin sosial məsələləri həll olunmalıdır, onlar yaxşı yaşamalıdır. Yəni jurnalistin heç nəyə ehtiyacı olmamalıdır. İndi deyirlər ki, “reket” qəzetlərimiz, jurnalistlərimiz var. Əgər onların imkanı olsa, yaxşı yaşasalar, niyə gedib o məsuliyyətinin altına girirlər? İndi çox şükürlər olsun ki, hamınızı tanımasam da, bəzilərinizi tanıyıram, müsahibə vermişəm və deyirəm ki, bizim jurnlaistikaya layiqli insanlarsınız. Sizin hamınızı bir daha ürəkdən təbrik edirəm. Sizə göstərdiyi qayğıya, hörmətə görə möhtərəm Prezidentimizə minnətdarlığımı bildirirəm. Əlbəttə biz demokratik cəmiyyətdə yaşayırıq, azadlıq, azad mətbuat olmalıdır və siz də bunları işıqlandırırsız.
Elə bir hal olmayıb  ki, bir jurnalist mənim haqqımda qərəzli yazı yazsın. Mən rast gəlməmişəm. Ola bilsin ki, jurnalistlər arasında qərəzli yazanı da var. Böyük bir ordusunuz, təbii ki, bunların içərisndə yaxşısı da, pisi də var. Allahdan arzu edirəm ki, belə deyək, qərəzlilər, pis adamlar sizlərə baxsın. Allah onlara ağıl versin, onlar da ağıllansınlar.

Elşad Eyvazlı:

- Eldar müəllim Azərbaycanın siyasi həyatında nə var, nə yox?

Eldar İbrahimov:

- Azərbaycanın siyasi həyatında hər şey var. Bu gün bilirsiniz ki, siyasətimizdə yeganə problem olan Dağlıq Qarabağ məsələsidir. Bununla əlaqədar da işlər gedir. Bilirsiniz ki, prezidentlər, xarici işlər nazirləri görüşür. Bu yaxınlarda ATƏT Parlament Assambleyasının Osloda iclası vardı. Mən də orada idim, fikir mübadiləsi aparırıq. Yəni bu gün bizim siyasi aləmimizdə hesab edirəm ki, yeganə, ən vacib məsələlərdən biri təbii ki, Dağlıq Qarabağ problemidir. Bu sahədə ATƏT-in Minsk qrupu işləyir, müəyyən irəliləyişlər də var. Ancaq şəxsən məni - Eldar İbrahimovu bu qane etmir. Çünki 1992-ci ildə yaradılan ATƏT-in Minsk qrupu 18 ildir fəaliyyət göstərsə də, fəaliyyəti o qədər də gözə çarpan deyil. O baxımdan ki, nəticə olmalıdır. Amma bu gün o nəticə yoxdur, əlbəttə mən buna təəssüf edirəm. Azərbaycan siyasətində ikinci bir məsələ ABŞ-dan Azərbyacana səfir təyin olunan Metyu Brayzanın məsələsidir. O da çıxışında qeyd edib ki, “mən çalışacam ki, Dağlıq Qarabağ məsələsi sülh yolu ilə həll olunsun”. Çünki özü ATƏT-in Minsk qrupunun üzvü olub.

Elməddin Muradlı:

- Eldar müəllim, neçə ildir ki, ATƏT-in Minsk qrupunun həmsədri kimi Brayza irəliləyişə nail ola bilmədi, bəs səfir kimi irəliləyişə nail ola bilərmi?

Eldar İbrahimov:

- Səfir kimi, ATƏT-in Minsk qrupunun həmsədri kimi belə deyək, Azərbaycanı hər gün müdafiə etsin, bu, mümkün deyil. Onda olacaq bir tərəfli. Əsl həqiqətdə, pərdəarxası onlar erməniləri müdafiə edir. Bu var, biz bunu görürük, başa düşürük. O bunu edə bilməzdi. Amma o, ATƏT-in Minsk qrupunun həmsədri kimi, bu işlərin içərisində olan bizim çox-çox bilmədiyimiz məsələləri bilən bir adam kimi Amerikanın Azərbyacanda səfiri olandan sonra təbii ki, onun bizə xeyri dəyə bilər, nəinki ATƏT-in Minsk qrupunun həmsədri kimi. Nəzərə alsaq ki, həm də ailəsi türkdür. Buna görə ona irad da tuturlar. Ermənilər deyirlər ki, Azərbaycana kömək edəcək.

Kamil Həmzəoğlu:

- ATƏT PA-nın yeni prezidenti yunanstanlıdır. Bunula bağlı ATƏT-in özündə də  çox ciddi təpkilər var.  Sizcə, o, Dağlıq Qarabağla bağlı obyektiv mövqe sergiləyəcəkmi, konkret  hüququ qiymət verəcəkmi?

Eldar İbrahimov:

- Bu adam Yunanstandandır. Vaxtilə biz ikimiz də ATƏT PA-da İqtisadiyyat Komitəsinin sədr müvinliyinə namizədliyimizi irəli sürmüşdük. Orada mənim 15 il təcrübəm var. Amma o, 2004-cü ildən deputat olub. Ona qədər nazir olub. Mən öyrəndim ki, onun üstündə durublar, mən namizədliyimi geri götürdüm və çox razı qaldı. Hətta türk qardaşlar mənə dedi ki, “Eldar bəy, sən keçsəydin belə, səni bu qədər alqışlamayacaqdılar”. Mən  belə jest etdim. O gündən bu günə qədər biz onunla dostuq. Çox yaxşı münasibətlərimiz var. Dünyada siyasəti də, iqtisadiyyatı da formalaşdıran, həll edən ancaq və ancaq şəxsi münasibətlərdir. Fərdi münasibət olmayan yerdə heç nə etmək mümkün deyil. Bir-birimizə “qardaş” deyə mürtaciət edirik. Onun seçilməsində Azərbaycan nümayəndə heyəti çox yaxşı fəaliyyət göstərdi. Hətta tacik, qazax, türklərlə söhbət etdik ki, bu adama səs verilsin. Nə üçün?
Çünki, ATƏT PA-nın sədr müavinləri içərisində real gücə malik olan, hörməti olan bir adam 56 dövlətin parlament deputatları ilə iş aparmalıdır, əlbəttə ki, çətindir. Bu seçkidə qalib gəlmək, sədr olmaq çox çətindir. O, iki il bundan qabaq Vilnüsdə sədr müavini seçiləndə də belə yüksək səviyyə ilə seçildi. Biz ona səs verdik. 130 səsi o aldı, 64 səs kanadalı aldı. Avropa Şurasında da o bir-iki il iştirak edib. Yəni bacarıqlı, qabiliyyətli, savadlı bir şəxsiyyətdir. Azərbaycana qarşı yaxşı münasibətdə olan adamdır. Mənə dedi ki, “Eldar qardaş mən sentyabrda Bakıya gələcəm”. Dəqiq bilmirəm, gələcək, ya yox. Çünki işləri çox olur. Hər halda hesab edirəm ki, əvvəlkilərdən fərqli olaraq onun bizə münasibəti daha yaxşı olacaq. Mənim proqnozum budur.

Kamil Həmzəoğlu:

- Eldar müəllim,  Azay Quliyev mətbuata açıqlama vermişdi. Bildirmişdi ki, bundan öncəki sədr Bahar Muradovaya Parlament Asambleyasının vitse-prezidentliyinə namizədliyini irəli sürmək təklifini edib. Neçə ildir ki, Azərbaycan bu qurumda təmsil olunur, amma onun rəhbər orqanlarında təmsil olumur. Bu nədən irəli gəlir?

Eldar Ibrahimov

- Bilirsiz Jao Soareş, Qoran Lenmarker Azərbaycana gələndə onları müşayət edən mən idim. Bütün danışıqlarda onlar bizə deyirdilər ki, artıq vaxt çatıb ki, Bahar xanım vitse-prezident, Eldar İbrahimov komitə sədrinin müavinliyinə öz namizədliyini versin. Onlar bizim ölkədə idi, indi bizim xətrimiz xoş olsun deyə belə deyirdilər. Amma burada çox böyük problemlər var. Çünki, mən neçə illərdi ordayam. Ermənistanla biz konfliktdə olan ölkələrik. Azərbaycanı seçsələr, gərək Ermənistanı da seçsinlər. Onlar bu məsələyə bu cür baxırlar. Amma bu dəfəki Parlamanet Asableyasının sessiyasında Qoran Lenmarkerin danışıqları düzü məni razı salmadı.

Kamil Həmzəoğlu:

- Nəyə görə?

Eldar İbrahimov:

 - Layihə hazırlamışdı. O layihədə söhbət Gürtcüstanın işğal olunmuş ərzilərindən gedirdi. Ancaq başlıqda Gürcüstanın adı yox idi. Biz təklif etdik ki, başlıqda Gürcüstanın adını yaz, tam Gürcüstana aid olsun. Ya da ki, sən əgər Gürcüstan qaçqınından, köçkünündən danışırsansa, axı Azərbaycanın da torpaqları işğal olunub, bir milyondan çox qaçqını var, onda Azərbaycanı da yaz. Təbii Azərbaycanı yazsa, Ermənistanı da yazmalı idi. Düzdür, bu, o qədər problemli məsələ deyildi. Əgər Gürcüstandan danışırsansa, başlığa Gürcüstan yazılsın ki, ona aiddir. Bu daha yaxşı olardı. O, özü də çıxış edəndə dedi ki, Eldar İbrahimova hörmətim var, təriflədi. O tərifin də dalında o idi ki, mənim qaldırdığım məsələni yerinə yetirməsin. Onun Azərbaycanla elə bir problemi yoxdur. Mənim səsimi səsə qoydular keçmədi, təbii ki, onlar əvvəlcədən danışmışdılar.

Xətayi Əzizov:

- Əcnəbilərdən əvvəlcə çox yaxşı dostluq münasibətləri görürük. İş bərkə düşəndə tamam başqa mövqe göstərirlər. Sizcə, ATƏT PA-nın sədri də belə bir dönüklük etməz ki?

Eldar İbrahimov: 

- Əlbəttə bu, siyasətdir. Bunlar da özbaşına sədr deyillər, idarə olunurlar. Açıq deyim, bu gün erməni lobbisi o qədər güclüdür ki, özbaşlarına layihə hazırlayıb verirlər, Parlament Asambleyasının sədri seçilib sənin, mənim dostumdur, Azərbaycana yaxşı münasibətləri var. Bu ancaq münasibətdi. Münasibət onda olur ki, konkret olaraq bir iş görə biləsən. Burada da açıq-aşkar iş görmək mümkün deyil. Tutaq ki, Azərbaycanın tərəfini tutsun, Ermənistana açıq-aşkar düşmənçilik etsin. Bunu edə bilməz.

Xətayi Əzizov:

- Bunların belə mövqeyi idarə olunduqlarına görədir, yoxsa eməni lobbisinin güclü olması ilə bağlıdır? Bəs Terri Devis niyə Azərbaycandan üzünü döndərmədi?

Eldar İbrahimov: 

- Burada Terri Devis haqqında söylədiniz. Terri Devis də ATƏT-də olub, xoş münasibətlərimiz olub. Terri Devis həqiqətən kişi adamdır. Kişi kimi qorxmadan da hər bir sözünü deyə bilən insandır. İndi Qoran Lenmarker bu məsələlərə cavabdeh adamdır. Ancaq onun danışıqlarında, görüşlərində mən hiss edirdim ki, müəyyən təsirlərdən ehtiyat edir, bəlkə də təsirlər olur. Ola bilsin ki, ona erməni lobbisi təsir edir. Bir dəfə ona sual verdim ki, ATƏT Avropa Təhlükəsizlik və Əməkdaşlıq Təşkilatıdır, yəni onun mənası budur. Dedim bəs niyə bura Amerikadan olan qara bir milliyyətçi sədrlik edir. Dedi, nə edək ki, Amerika dünyaya rəhbərlik edir. Dedim ki, indi Avropa ölkələrindən adam məgər yoxdu ki, Amerikadan kimsə ATƏT-ə rəhbərlik etsin. Çox təəssüf ki, dünyada bu cür ədalətsizliklər, lobbilər, güclər var.

Elşad Eyvazlı:

- Eldar müəllim, isti yay günləri keşir, qarşıdan da parlament seçkiləri gəlir. Amma siyasi həyatda bir tərpəniş yoxdur. Bu istilərə görədir, yoxsa necə?

Eldar İbrahimov: 

- İsti yəqin ki, təsir etmir. İstinin özünün də nisbiliyi var. Bilirsiniz, Seçki Məcəlləsinə baxdıq, müddəti azaldıb iki ay etdik. Yəni vaxta var. Vaxt sentyabrın 7-dən noyabrın 7-nə qədər olacaq. Mənim mülahizəm belədir ki, sentyabr ayından başlayacaq. Hələ vaxta var. İndi nə vacibdir ki, desinlər ki, kim hansısa dairədən deputat olacaq. Bunları açıqlamağa ehtiyac yoxdur və yeri də  yoxdur. Vaxtı gələndə deyəcəklər, kim haradan seşkiyə gedir. Təbii ki, mən Yeni Azərbaycan Partiyası üzrə deyirəm. Yeni Azərbaycan Partiyasının Siyasi Şurasının üzvü kimi buna bu gün bizim partiyada ehtiyac yoxdur. Məndən soruşsalar ki, sən namizədliyini irəli sürəcəksən, mən deyəcəm ki, bilmirəm. Çünki mənim partiyam var. Partiya məsləhət bilsə, namizədliyimi sürəcəm, məsləhət bilməsə sürməyəcəm.

Elməddin Muradlı:

- Əli Əhmədov, Mübariz Qurbanlının bu məsələ ilə bağlı sərt açıqlaması oldu.

Eldar İbrahimov: 

- Əlbəttə, Yeni Azərbaycan Partiyasından bir dairəyə bir namizəd verilirsə, Yeni Azərbaycan Partiyasından o namizədin üstündə durulursa, partiyadan ikinci adam gəlib özbaşına namizədliyini verəndə, başlayıb ara qarışdırır və yaxud YAP-ın özünə pislik edir.

Elməddin Muradlı:

- Belə namizədin cəzası nədir?

Eldar İbrahimov:

 - Onun cəzası odur ki, partiya deyir ki, get namizədliyini geri götür. O da geri götürür, əgər geri götürmürsə, keçə bilmir, biabır olur. Keçən ilki namizədlərdə belə hallar oldu. Geri götürməyənləri də partiyadan azad etdilər.

Kamil Həmzəoğlu:

- Bu demokratiyaya zidd deyil?

Eldar İbrahimov: 

- Niyə demokratiyaya zidd olur ki. Yeni Azərbaycan Partiyası daxilində bilinir ki, kimlər deputatlığa layiqdir. O layiq olan adamların da namizədliyi verilir.

Elşad Eyvazlı:

- Eldar müəllim, bu namizədləri kim müəyyənləşdirir? Kim öz namizədliyini verə bilər, kim verə bilməz?

Eldar İbrahimov:

 - Hər şey yaxın aylarda məlum olacaq.

Elməddin Muradlı:

 - Eldar müəllim, cəmiyyətimizdə maraqlı hadisələr baş verir. Seçki ərəfəsində aksiyalara artıq start verilib. Müxalifətdə birləşirlər, ayrılırlar, parçalanırlar. Bəs YAP-da nə baş verir?

Eldar İbrahimov: 

- YAP-da heç nə baş vermir. YAP bir partiya olaraq yumruq kimi birləşən partiyadır. Burada başqa cür söhbət ola da bilməz. Məsələn, biz hər bir namizədə verilən 200 manatı ona görə götürdük ki, bu 200 manatın həvəskarları var. Gəlir biri digər partiyadan namizədliyini irəli sürür, sonra əsas namizəd kimdir, onun yanına gedir ki, “mənə bir şey et, mən namizədliyimi geri götürüm”. Heç götürmə. Onsuz da mən bilirəm ki, sən seçilməyəcəksən.

Eməddin Muradlı:

- Keçən seçkidə belə namizədlər var idimi?

Eldar İbrahimov: 

- Bəli, vardı. İndi tənzimlənir. Ona görə Mübariz Qurbanlı o cür deyib ki, başqa cür hərəkət olmayacaq. Təbii ki,  yaradılmış atmosfer onlara imkan verməyəcək ki, kimsə gəlsin, özbaşına namizədliyi versin, sabah da alver eləmək üçün gəlsin. Sən özünə arxayınsan ki, deputatlığa namizəd kimi hörmətin var, seçicilərin etimadını qazana bilirsən, qoy kim nə edir-etsin. Mən niyə qorxmalıyam ki? Mənim keçən dəfəki seçkidə alternativlərim var idi. Dedim ki, heç kimə dəyməyin, namizədliklərini verirlər, versinlər. ATƏT-dən iki nəfər var idi. Deyirdilər, Eldar İbrahimov təbliğat məsələlərini yaxşı qurub, şəkil, filan, bəs digərləri niyə təbliğat aparmırlar?
Ona cavab verilib ki, bu adam 20 ildir deputatdır, qanunu, qaydaları, təbliğatını bilir. Gəlsinlər, o birilər də aparsınlar, kim nə deyir ki...
Məsələn, buradan fərqli olaraq Naxçıvanda kimsə şəklini pəncərəyə, küçəyə yapışdırsın, belə şey yoxdur. Vahid yerlər müəyyənləşdirilir, hamının orada şəkilləri lövhələrə yapışdırılır.

Fərəh Sabirqızı:

- Dediniz ki, alternativlər olub. Alver üçün yanınıza gələnlər oldumu? Seçkidən sonra onlara münasibət necədi?

Eldar İbrahimov: 

- Mən seçkidən sonra onların təqribən bir-ikisini üzündən tanıdım. Heç onlarla mənim salamım sonra da olmayıb. Alver üçün yanıma gələn olmadı. Bilirlər ki, Eldar İbrahimov Naxçıvanda ən böyük vəzifələrdə işləyib. Hüquq-mühafizə orqanlarında işləməmişəm ki, kimisə tutam, pislik edəm. Həmişə hörmət edən adam olmuşam. Naxçıvalılar da məni yaxşı tanıyır. Biz yeddi qardaşı olmuşuq. Hamımız Naxçıvanda hörmətli adam olmuşuq. Onlar hamısı bunları bilirlər, ona görə kim mənə etiraz edəcəkdi.

Elməddin Muradlı:

Zaman-zaman Ana Vətən Partiyasının YAP-a birləşməsi məsələsi gündəmə gətirilir.  Bu, mümkün variantdırmı?

Eldar İbrahimov: 

- Şəxsən mən hansısa bir partiyanın bizim partiyaya yapışmağına ehtiyac görmürəm.  Artıq o kley yoxdur. Yeni Azərbaycan Partiyasının 500 minlik ordusu var. Kimsənin bizə birləşməyinə nə ehtiyac var. Bəlkə ehtiyac olsa, birləşərik, amma mənə elə gəlir ki, heç buna ehtiyac da yoxdur. Biz demokratik cəmiyyətdə yaşayırıq. Xalq Cəbhəsidir, Müsavatdı, kimdi, mən bunu həmişə demişəm. Məsələn, onun inamı Əbülfəz Elçibəyə idi, mənim inamım Heydər Əliyevə. O da inamını itirmir, dəyişmir, kişi adamdır, mən də inamımı dəyişmirəm, mən də kişi adamam. Hansı partiyadan kimsə qopub, gəlib bizə yapışırsa, şəxsən mən Eldar İbrahimov kimi onu qəbul etmirəm. Çünki o nə vaxtsa, yenə qopacaq. Onu yapışdıran kley yoxdur. Onun ürəyi köhnə partiyasındadır.

Eməddin Muradlı:

Yəqin ki, mətbuatı izləyirsiniz. Yeni iqtidar partiyasının yaranması ilə bağlı məlumatlar dolaşır...

Eldar İbrahimov: 

- Yeni iqtidar partiyası elə Yeni Azərbaycan Partiyasıdır. Adımız da Yeni Azərbaycandır. Allah ulu öndərə rəhmət etsin. O vaxt Naxçıvanda biz bu partiyanın adını seçəndə heç də elə-belə seçmədik. Onun üstündə nə qədər mülahizələr, mübahisələr getdi. Ulu öndər onda dedi ki, bu partiyanın adı Yeni Azərbaycan olmalıdır və biz Yeni Azərbaycan cəmiyyəti yaratmalıyıq, yəni Sovet Azərbaycanından əsər-əlamət qalmamalıdır. Bu, yeniləşmiş bir Azərbaycan olmalıdır. Prezidentimiz, bu partiyanın ətrafında sıx birləşən adamlar yeni, müstəqil, müasir, yeniləşmiş bir Azərbaycan qurmuşuq.
İndi kim deyir yeni bir partiya yaradılacaq, mən şəxsən buna inanmıram. Belə şeylərə də o qədər də əhəmiyyət vermirəm. Çünki yeniləşmiş, əsası Heydər Əliyev tərəfindən qoyulan, lideri Heydər Əliyev olan Yeni Azərbaycan Partiyası var. Bu gün də möhtərəm Prezidentimiz üçün dayaq olan partiyadır.

Elməddin Muradlı:

- YAP-ın bu gün parlamentdə təmsil olunan heyətindən növbəti parlamentdə neçə faiz qala bilər?

Eldar İbrahimov: 

- Məndən olsa, deyərdim ki, hamısı qalsın. Yeni Azərbaycan Partiyasından seçilən bu dəfəki deputatlar hamısı özlərini çox yüksək səviyyədə aparıblar. Yeni Azərbaycan Partiyası müdafiə etdiyi məsələnin kimsə əleyhinə çıxmayıb. Bu da partiyanın birliyidir. Ona görə mən niyə deməliyəm kimsə seçilsin, kimsə seçilməsin. Elə hamısı seçilsin. Hələ bir az da üstünə gəlsin, artsın. Bu gün partiyamız parlamentdə 61 nəfərdi. Əvvəlki parlamentlərdə daha çox idi. Mən hesab edirəm ki, deputatlarımız qarşıdakı parlament seçkilərində  də artmalıdır. İki il bundan əvvəl prezident seçkiləri keçirilibdir. Bütün Azərbaycan xalqı, bizim elektorat var, yəni Prezidentə səsə verən Prezidentin partiyasına da səs verəcək. O elektorat varsa, Prezidentimizə səsə veribsə, Yeni Azərbaycan Partiyasının nümayəndələrinə də səs verəcək və beləliklə hesab edirəm ki, Yeni Azərbaycan Partiyasından seçilən deputatlar daha çox olacaq. Bu, mənim şəxsi fikriimdi. Heç kim o rəqəmi dəqiq deyə bilməz.

Xətayi Əzizov:

- Eldar müəllim 7 milyon əhalimiz olanda da 125 deputatımız vardı, 9 milyon yarım olanda da. Deputatların sayının artırılmasına necə baxırsız?

Eldar İbrahimov: 

- Prezidentin səlahiyyətinin də 7 ilə qalxmasının müəllifi mən olmuşam. Konsitutisiyadan “iki dəfə” sözünün çıxarılmasının da müəllifi mən olmuşam. 125 nəfərin artmasının da müəllifi mən, Murtuz Ələsgərov, bir çox deputatlar olub. Bəzən mənə deyirlər ki, “təklif vermisən proporsianal seçki ilə bağlı, indi də qaçırsan”.
Fikirləşirsən ki, doğurdan da bu mojaritar elədir ki, bütün rayonlarda əhalini təmin edə bilirsən. Amma proporsionalda partiyadan seçilirsən, partiyanın içində gedirsən, onda çox deputatları tanımırlar. O partiyaya həyatında sənin fəaliyyətinə görə sənin adını salıblar, amma insanlar sənin nüfuzunu tanımır axı. Bu demokratik insititutun ən vacib sahələrindən biri ondan ibarətdir ki, proporsional seçki sisitemində partiyalar iştirak edir. Mojaritar olsa da, partiyalar öz namizədlərini irəli sürür.
Götür-qoy edəndən sonra, səmimi deyirəm fikirləşdim ki, elə 125 deputat da bəsimizdi.

Elşad Eyvazlı:

- Bayaq Naxçıvandan danışdınız, Naxçıvanlı olmaq çox şey verə bilirmi adama?

Eldar İbrahimov: 

- Baxır adama. Elə adam var ki, çox şey verir, elə adam da var ki, əksinə. Müxalifət də Naxçıvandan çıxıb, Yeni Azərbaycan Partiyası da Naxçıvanda yaradılıb, ulu öndər də Naxçıvandan hakimiyyətə gəlib. Özümə gəlincə, belə deyək, çox şeylərdə abrıma qısılmışam, istədiyim sözü deyə bilməmişəm. İstədiyimi dilimə gətirə bilməmişəm, halbuki, bu mənim haqqım olub. Partiya yaradıcılarından biri kimi, ulu öndərimizə, Prezidentimə sadiq insan kimi bəzən ürəyimdən keçir ki, mənim də filankəs kimi bir imkanım olsun, amma utanıram, deyirəm ki, mənə olmaz. Mən bu sözü deyə bilmərəm, mən bu sözü desəm, özümü alçaldaram. Bəzən qısılıram bunu edə bilmirəm.

Elşad Eyvazlı:

- Qeyd etdiniz, Azərbaycan siyasətini müəyənləşdirən adamlar hamısı Naxçıvandan çıxırlar. Orada siyasi məktəbimi var, yoxsa bu nədən irəli gəlir?

Eldar İbrahimov:

- Ulu öndər Heydər Əliyev Naxçıvanda doğulub, dünya səviyyəsində tanınıb. Naxçıvan çox ağır şəraitdə, həmişə bolkadada olan bir yer olub. Naxçıvanda camaat çox ağır vəziyyətdə yaşayırlar.
Məsələn bir epizod deyəcəm. Biz 7 qardaş, bir bacı olmuşuq. Mənim 13 yaşım olanda atam rəhmətə gedib. Mən səkkizinci sinfə qədər əlaçı olmuşam. Amma səkkizinci sinifdən sonra demişəm, atam yoxdu, məni kim oxudacaq. Sonra oxumağa o qədər də fikir verməmişəm. Gümüş medala düşməmişəm. Atam olsaydı belə, mən oxusaydım da yenə də gümüş medal ala bilməyəcəkdim. Çünki hər yerdə ədalətsizliklər olur. Ağır, öndərin siyasəti Naxçıvanda bir siyasi məktəbdir. Çtin şərait insanları məcbur edir ki, sən hər şeyə gedirsən.
Mən məsələn, sürücülərin yanında köməkçi işləmişəm, maşın sürməyi öyrənmişəm. Gecələr kinomexanikin yanında kino verməyi öyrənmişəm və bunlar da mənim əlimdən tutub. Məsələn, mən Naxçıvanda 70-ci illərdə insitutda təlimin texniki vasitələrindən dərs demişəm. Çilingər, mühəndis, baş mühəndis işləmişəm, bunların hamısı mənə iqtisadiyyati bilməkdə kömək olub. Həm də o zaman ağır vaxtlar sanki bizi siyasiləşdirirdi. Bunu deyəndə mənə gülürlər. Mən uşaq idim, qapımız kəndin içinə açılırdı. Mən məhlədə böyüməmişəm, kənddə böyümüşəm. Çıxırdım görürdüm ki, çayxanada oturublar, mən də uşaq idim, baxırdım, kişilər söhbət edirdi. Məsəl üçün, biri o birisinə deyirdi, “görəsən Amerikanın prezidenti nə yeyir?” O birisi də deyirdi, “nə yeyəcək, teyxa piy”.
Mən uşaq idim, gülürdüm ki, sən öz dərdini çəkmirsən, deyirsən Amerikanın prezidenti nə yeyir. Sənə nə dəxli var, nə yeyir. Yəni o , insanların siyasiləşməyi idi. Naxçıvan kasıb yer olduğuna görə daha siyası yer olub. Varlı, imkanlı adam özü üçün yaşayır, keyf edir. Onun nə vecinə. Amma indi yaxşı yaşayışa görə Naxçıvan öndə gedir. Naxçıvandakı ağır şəraitdən biz siyasiləşmişik.

Fərəh Sabirqızı:

- Seçicilərlə görüşünüzmü?

Elfar İbrahimov:

- Bura da çoxlu seçicilərim gəlir. Əlbəttə imkanım çatan adamlara kömək edirəm. Deyim ki, hamıya ucdan tutma kömək edirəm, yox. Amma bu gün başqa rayonlarla müqayisədə mən deyim ki, mənə ayda bir ərizə gələr, ya gəlməz. Gələn kimi də Naxçıvanın icra başcısına göndərirəm. Özüm də çalışıram. İnanın ki, bu işlər o qədər operativ həll olunur ki, deputata şikayət etməyə ehtiyac olmur. Naxçıvan camaatının siyasiləşməsi ondan ibarətdir ki, Naxçıvan camaatı yaxşı bilir ki, deputat yol, su çəkən deyil. Mən onları təmsil edən deputat kimi, bu gün Azərbaycanı təmsil edirəm. Naxçıvanın problemlərini deyirik, hardasa biz gedib iş görək, Naxçıvanın Ali Məclisinin sədri Vasif müəllim də buna heç  razı olmur. Ona görə ki, Naxçıvanın özünün büdcəsi də, gücü də, imkanı da var. Özləri o işləri həll edirlər. Yəni deputatın Naxçıvan üçün köməyi nədən ibarətdir. Məsələn, təyyarə bileti məsələsində bir az qarışıqlıq olmuşdu. Ermənistanda Naxçıvaının əleyhinə “Naxçıvan qardaşları” siyasi cəmiyyət yaradıblar. Biz bunula əlaqədar ermənilərin cavablarını veririk. Yeri gələndə, hər yerdə danışırıq. Deputat bundan ötrüdür. Naxçıvanda hər şey dövlət proqramı üzrə gedir.

Elməddin Muradlı:

- İndi necədi Naxçıvanda vəziyyət. Vasib Talıbovun insanları incitdiyi bildirilir.

Eldar İbrahimov:

- Bunların hamısı qərəzli yazılardı. Mənə bir dəfə zəng etdilər ki, Vasif Talıbov antenaları Naxçıvandan yığışdırır. Dedim çox düz edir, qanun-qayda yaradır. Təyyarədə gedəndə görürdün ki, altmış mənzilli binada altmış çanaq antenası var. İndi kabelləşmə gedir, kim istəyir türk, kim istəyir rus kanallarını izləyir. Bunun nəyi pisdir ki. Küçələrdə bu binadan o binaya ip atıb paltar sərirdilər. Necə düzgündünr ki, qadın alt paltarlarını küçədən assın, gəlib-gedən kişilər də ona tamaşa etsin. 
Nə edir ki, Vasif müəllim naxçıvanlılıq, müsəlmançılıq bunu tələb edir. Deyirlər ki, bəs qadınlar paltarı haradan assınılar. Eyvandan içəridə assınlar. Bir tərbiyə olmalıdır.  Zəng edib deyirlər ki, taksi sürücülərini incidirlər. Niyə incidirlər, deyirlər ki, sayğac qoy, forma geyin, qalstuk tax. Bu mədəniyyətdir. Kim gedir Naxçıvana yaxşı mənada heyran olur ora. Mən arzu edərdim ki, Bakıda da, digər rayonlarda da bu cür olsun. Naxçıvanda əsl bazar iqtisadiyyatı var və bu tənzimlənir.

Xətayi Əzizov:

- Eldar müəllim komitədəki fəaliyyətiniz və qanunvericliklə bağlı məlumat istərdik.

- Son 5 ildə tütün, heyvandarlıq sahəsi haqqında qanun qəbul etmişik. Hər iki qanun Dünya Ticarət Təşkilatının bəyəndiyi qanunlardı. Mən keçən dəfə Amerika səfirliyində rəhbərliklə görüşdüm və çox razı qaldılar. “Atçılıq haqqında” qanun qəbul etmişik, artıq işləyir. Arıçıılıq, pambıqçılıq haqqında qanun qəbul etmişik. Pambıqçılıqla bağlı Dövlət Proqramı hazırlanır. 1 milyon ton pambıq istehsal edən Azərbaycanda indi 20-30 min ton pambıq istehsal olunur. Niyə belə olmalıdır? Buna görə də biz bu qanunu qəbul etdik. Ümumilikdə 7 qanun qəbul etmişik. Mən 15 ildir ki, Aqrar komitənin sədriyəm. “Torpaqların dövlət ehtiyacları üçün alınması haqqında” qanun Prezident Administrasiyasından bizə gəlib. Onun da üstündə 6 aydan artıq işləmişik. Qalan bütün qanunlar bizim komitədə hazırlanır. 15 ildə bu komitədə hardasa 57-58 qanun qəbul olunub. İndi bizim aqrar sahədə qəbul edəcəyimiz qanun qalmayıb, çünki bütün qanunvericiliyimiz var. İndi o qanunlara əlavə və dəyişikliklər edirik. İndi biz “Kənd təsərrüfatı koorpersiyası haqqında” qanun hazırlayırıq. Onu da deyim ki, iki qanunumuz dayanıb. Hətta “Bağ təsərrüfatı haqqında” çox yaxşı qanun var. Üçüncü oxunuşdan sonra o qanuna veto qoyuldu. Mən hesab edirəm ki, çox yaxşı qanun idi. İndi veto qoyuldu, bunu müzakirə etməyə mənim ixtiyarım yoxdu. Yəni bu, Prezidentin səlahiyyətidir. Komitə sədri kimi razıyam, düzgün edilib veto qoyulub. İkinci bir qanun “Dövlət torpaqları haqqında”dır, biz qanunu birinci oxunuşdan keçirdik. Çox məsləhətləşmələrdən sonra biz onu saxladıq. Demirik ki, ya qəbul edirik, ya da etmirik. Amma saxlamışıq. Zamanı gözləyirik. Başqa komitələrdən fərqli olaraq bizim özümüzdə bu qanunlar hazırlanır. Biz qanunlar üzərində çox işləyirik. O qədər yaxşı qanunlar hazırlayırıq ki, Milli Məclisdə heç bir mane olmur.

Alim Hüseynli:          

- Zaman-zaman sizin kənd təsərrüfatı naziri olacağınız barəsə xəbər qəzetlərdə yer alır.

Eldar İbrahimov:

- Mətbuatda olur belə şeylər. Bunu “Azadlıq” qəzeti də verib. Əhəmiyyət verməmişəm. Bunlar hamısı o qəzetdə işləyən adamların və yaxud kimlərinsə jurnalistlərə təsiri ilə dərc olunur. Mən belə xırdaçılıqlara getmirəm və uymuram da. Ola bilsin ki, qarşıdurma yaradır. Eldar İbrahimov sovet hökuməti dövründə Naxçıvanda kənd təsərrüfatının ən  zirvəsində olan adam olub.  Mənim heç bir vəzifəyə ehtiyacım yoxdur. Mənim bir vəzifəyə ehtiyacım olub. Bunu o vaxt mənə mənim ulu öndərim məsləhət bilib ki, deputat olum və Aqrar siyasət komitəsinin sədri olum. Partiya məsləhət bilsə, namizədliyimi verəcəm, bilməsə də yenə də Yeni Azərbaycan Partiyasının yaradıcılarından  biri kimi ona sadiq qalaraq qulluq edəcəm.



Hazırladı Təhminə Paşayeva

Twitter
Sizə yeni tvit var
Keçid et
Ukraynadan Rusiyaya ardıcıl zərbələr: Vəziyyət kritikdir