Millət vəkili – jurnalist polemikası
Modern.az saytı və Parlament Jurnalistləri Birliyinin (PJB) layihəsi çərçivəsində parlament jurnalistlərinin Milli Məclisin komitə sədrləri ilə görüşləri davam edir. Jurnalistlər növbəti görüşü Milli Məclisin Regional məsələlər komitəsinin sədri Arif Rəhimzadə ilə keçiriblər.
Görüşdə PJB sədri Elşad Eyvazlı, “Üç nöqtə” qəzetinin əməkdaşı Elməddin Muradlı, APA-nın əməkdaşı Elbrus Seyfullayev, “Şərq” qəzetinin əməkdaşı Rəşad Baxşəliyev, “Yeni Müsavat” qəzetinin əməkdaşı Elşad Paşasoy iştirak edib.
Açıq diskussiya şəraitində keçən bu görüşdə də Milli Məclisin fəaliyyətindən tutmuş deputatın şəxsinə aid məsələlərdən söhbət açılıb.
Söhbət zamanı A.Rəhimzadə deyib ki, o, istirahətini yarımçıq qoyub parlament jurnalistləri ilə görüşə gəlib.
Elşad Eyvazlı:
- Arif müəllim, parlament seçkilri ərəfəsi olsa da, siyasi həyatda bir süstlük var. Bunu isti yay günləri ilə əlaqələndirmək olarmı?
Arif Rəhimzadə:
- Xeyr, içtimai həyat mən hesab edirəm ki, kifayət qədər fəaldır. Cənab Prezidentin görüşlərini nəzərə alsaq, görərik ki, nə qədər görüşlər olur, özü də mənalı, vacib tədbirlər... Avqust ayı ümumiyyətlə istirahət ayıdır və bu təbiidir ki, bir çox adamlar məzuniyyətə çıxır. Parlament də bütövlükdə tətildədir. Ancaq bu il bildiyimiz kimi, seçki ilidir. Mən başa düşürəm ki, deputatlarin əksəriyyəti hər halda seçkidə iştirak etmək niyətindədirlər. Deməzdim ki, istilər siyasi həyata çox təsir edir. Cəmiyyətdə bütövlükdə insanların müəyyən qədər fəallığı azalıbdır ki, bu da istidən irəli gəlir. Adətən isti bizdə 10-12 gün olurdu, amma bu il bir az başqa cür oldu.
Elşad Paşasoy:
- Belə fikirlər var ki, indi seşkilərin taleyi kabinetlərdə həll olunduğundan siyasi fəallıq yoxdur.
Arif Rəhimzadə:
- Xeyr, mən deməzdim ki, kabnetdə o məsələlər həll olunur. Hazırda deputat olan insanlar öz məqsədlərini bilirlər, qarşıda duran vəzifələrini bilirlər və təbiidir ki, bir partiyanın üzvü kimi yəqin ki, partiyanın buna münasibəti olacaq. Dünyanın hər yerində seçkilərdə partiyalar nəzərə alınır. Bilirsiniz, ola bilsin kimsə istəyir konkret bir rayondan namizədliyimi irəli sürsün, ancaq orda şanssızdır. Bu zaman məsləhət bilinəcək ki, ya başqa rayondan namizəd olsun, ya da ümumiyyətlə namizədliyini irəli sürməsin. Odur ki, belə məqamlar var. Ancaq deyək ki, seçkilər kabinetdə həll olunur, belə bir şey yoxdur. Məncə, bütün partiyalar namizədlərinin şanslı olmasını istəyərlər. Gərək elə namizəd olsun ki, həqiqətən o seşkiyə gedəndə yerini tuta bilsin, bax, bizdə bu da nəzərə alınır. Müəyyən deputatlarda ola bilsin ki, müəyyən tərəddüdlər ola bilər, ancaq bütövlükdə mən elə başa düşürəm ki, hərə öz işini bilir.
Elşad Paşasoy:
- Azərbaycan Respublikası Konstitusiyasında hər kəsin seçmək və seçilmək hüququ var, ancaq sizin dedikləriniz buna mane olur, axı...
Arif Rəhimzadə:
- Bu, arzu məsələsi deyil, seçkiyə gedən insan istəyər ki, ona partiya tərəfindən dəstək olsun. Mən indi başqalarını deyə bilmərəm, partiya üzvləri istəyər ki, onlara mütləq dəstək olsun. Bundan ötrü partiya da həmin şəxsin vəziyyətini, şansını, onun imkanlarını öyrənir. Eyni zamanda, namizəd olmaq istəyənin özü də partiyanın rəhbərliyi ilə görüşür, burada daha real, daha konkret imkanlar müəyyənləşdirilir. Bu birinci məsələ. İkinci məsələ ondan ibarətdir ki, seçki kampaniyasının müddəti bir qədər sıxışdırılıb, iki ay müddətində olacaq, sentyabırın 7-dən başlayır, oktyabr inqilabı günündə seçki keçiriləcək.
Elşad Paşasoy:
- Namizədliklərini YAP-la razılaşdırmayan şəxslərin cəzalandırıla biləcəyi barədə anonslar, bəyanatlar normaldırmı?
Arif Rəhimzadə:
- Birincisi, partiyada bir nizam-intizam olmalıdır. Partiyaya zəhmətkeşlərin təşkil olunmuş bir qrupudur. Burada nizam-intizam olmalıdır, hərə öz dediyini irəli sürməməlidir, bu tamamilə təbii bir şeydir, əks halda, o partiya deyil, anarxiya olardı. Odur ki, partiyada mən dediyim olmalıdır, əlbəttə hər kəs müstəqil şəkildə öz namizədliyini verə bilər, ancaq orada heç bir cəzalandırmaq söhbəti yoxdur. Sadəcə, ona dəstək olmayacaq.
Elməddin Muradlı:
- Bayaq istilərdən söhbət düşdü. Hər seçki ərəfəsində partiyalar arasında müəyyən dialoqlar keçirilir. Bu seçki ərəfəsində də belə bir dialoq təşkil etmək olacaqmi?
Arif Rəhimzadə:
- Yeni Azərbaycan Partiyası heç vaxt dialoqdan qaçmayıb, həmişə dialoqlarda iştirak edib, mövqeyini deyib. Mən hesab edirəm ki, YAP-ın gözükölgəli bir işi yoxdur ki, belə debatlardan boyun qaçırsın və iştirak etməsin. Belə bir ciddi təklif olarsa, dialoqlar ola bilər.
Elməddin Muradlı:
- Bəzən sizin partiya yetkililəri belə fikirlər səsləndirirlər ki, oturub söhbət etmək üçün ciddi bir qüvvə yoxdur, müxalifəti çox zəif tərəf kimi qiymətləndirirlər. Doğurdanmı rəqib yoxdur?
Arif Rəhimzadə:
- Gəlin əvvəldən başlayaq, Cənab Prezidentin prezident seçkilərində həqiqətən rəqibi yox idi, öz namizədlərinin plakatlarını aparıb divara vurmaq iqtidarında belə, deyildi o adamlar. Bunu bacarmayan partiyanı necə ciddiyə alaq? Ancaq mən hesab etmirəm ki, rəqibin olmaması yaxşı cəhətdir. Rəqib olmalıdır.
Elşad Eyvazlı:
- Siz bir şeyi qeyd etdiniz ki, icazəsiz namizədliyini irəli sürənlərin cəzası partiyanın onları dəstəkləməməsi olacaq. Siz xeyli öncə namizədliyinizi irəli sürəcəyinizi bildirmisiniz. Amma hələ də partiyanız öz siyahısını açıqlamayıb. Bu məntiqlə məsələyə yanaşsaq nə demək olar?
Arif Rəhimzadə:
- Birinci bundan ötəri hələ vaxt var, sentyabırın 7-nə kimi hələ bir ay vaxt var. İkincisi də hər bir namizəd üçün partiya elan vermiyəcək ki...
Elşad Eyvazlı:
- YAP bölgələrdə sorğu keçirib, tanınmışların reytinqini öyrənib, məsələdən xəbəriniz varmı?
Arif Rəhimzadə:
- Xeyr, mənim o sorğudan xəbərim yoxdur, mən maraqlanmamışam sözün açığı.
Elşad Paşasoy:
- Heç olmasa, o sorğunun sizə aid olan hissəsindən də xəbəriniz yoxdur?
Arif Rəhimzadə:
- Xeyr, mən heç onunla da tanış deyiləm.
Elşad Eyvazlı:
- Bu gün YAP-ın partiya olaraq 5-10 il əvvəllə müqayisədə seşkilərdə oynadığı rol dəyişibmi?
Arif Rəhimzadə:
- Hesab edirəm 5 il əvvəllə müqayisədə partiya daha çox təşkilatlanıb, partiyanın daha çox təcrübəsi var.
Elşad Eyvazlı:
- YAP yolunda əsl mücadilə edənlərə münasibət necədir?
Arif Rəhimzadə:
- Kimlərin münasibətləri?
Elşad Eyvazlı:
- Ümumi cəmiyyətin...
Arif Rəhimzadə:
- Cəmiyyəti siz deyə bilərsiniz...
Elməddin Muradlı:
- YAP-ı qurub yaradan insanlar kənarda və pərdə arxasında qalıblar, yəni 91-lər...
Arif Rəhimzadə:
- Bu sualı çox veriblər, “91-lər” də var, “91-lər”dən ayrı adamlar da. Bu siyahıya ayrı adamlar da düşə bilərdilər, şərt deyil ki, ora düşənlər ancaq bunlar ola bilərdilər. Şəxsən mən “91-lər”in içərisində yoxam. Mən ora düşə də bilərdim. Düşməyə də bilərdim. Ancaq siyahıya düşmək o demək deyil ki, ömrünün axırına kimi partiyada bəslənməlisən. Səndən hərəkət, məndən bərəkət prinsipi olmalıdır. Mən başa düşürəm hansısa bir vaxtda belə insanlar böyük bir məhsuliyyət götürüblər. Ancaq onunla iş bitmir axı. Gərək o hər gün fəaliyyət göstərsin ki, partiya da onu yararlı bir insan kimi qəbul etsin.
Elşad Paşasoy:
- Arif müəllim bayaq rəqibin zəifliyindən danışdınız. Dediniz ki, bu normal hal deyil, amma fakt budur ki YAP yeni yaradıldığı illərdə bir neçə yüz min nəfərlik aksiyalar keçirdi, hətta parlamentin qarşısında da. Amma bu gün Azərbaycanın istənilən bir yerində müxalifətin bir araya gəlmək, sözün demək imkanı yoxdur, metrodan çıxan kimi onları həbs edib, aparırlar Qobustanın səhralarına. Bu, real haldırmı? Rəqib zəifdirsə, niyə şərait yaradılmır ki, onlar zəifliklərini paytaxtın mərkəzində, “Azadlıq” meydanında göstərsinlər...
Arif Rəhimzadə:
- O vaxtları indi lə müqayisə etmək olmaz. Onda hərc-mərclik idi. Heç bir dövlətçilik prinsipləri yox idi. Heç bir qanun-qayda yox idi. Kim nə istiyirdi, onu edirdi. Azərbaycan dövlətçiliyi yox idi. İndi dövlətçilik var. İndi demirlər ki, siz bu mitinqi keçirməyin. Deyirlər ki, mitinq üçün yer ayrılıb, gedin tədbirinizi orada keçirin. Siz niyə bundan istifadə etmirsiniz, o vaxt özbaşnalıq var idi, hamı da ondan istifadə edirdi. Parlamentin qarşısında o zaman mitinq keçiriləndə heç YAP yox idi. Ancaq Hacı Əbdül adında bir adam var idi, böyündə piştolet, bir-iki Bakı lotuları da yanında. Onlar bu metoddan istifadə edirdilər. İndi deyirsən iqtidar da bu yolla getsin, axı indi qanun- qayda var. Qanun qayda bax budur. Bunlara hamı riayət etməlidir.
Elşad Eyvazlı:
- Cəmiyyətdə siz YAP-ı quranlardan biri kim tanınırsınız, amma dəbdəbədən uzaqsınız. Bu, nədən irəli gəlir?
Arif Rəhimzadə:
- Mən hesab edirəm ki, yaşamaq üçün bir hədd lazımdır. Ondan keçməq nanəciblikdir və düzgün deyil. Mən demirəm ki, acından ölürəm. Ancaq istəyərdim maşınım olsun, mənim maşınım yoxdur, mən dövlət maşınından istifadə edirəm. Mən istəyərdim ki, hamıda bu həddə olsun. Amma müxtəlif cür insanlar var, müxtəlif cür fikirləşənlər var. Bizdə 80 manat pensiya alan var, bizim camaat 80 manat pensiya alırsa, mən hesab edirəm ki, həddindən artıq var-dövlət əldə etmək düzgün deyil. Əhalinin səviyyəsi yüksək olsaydı, yəqin mən də daha çox fikirləşərdim. Məvaciblər hamısı yüksək olsaydı, mən də fikirləşərdim. Düzdür, bizdə dinamika var, artım var, ancaq eyni zamanda bir çox adamların pensiyası 80-85 manatdır. Bu fonda hansısa bir cahi-cəlal nümayiş etdirmək mənəviyyatsızlıqdır.
Elşad Eyvazlı:
- Arif müəllim, bu məsələyə görə sizin doğmalarınız, yaxınlarınız demirlər ki, biz də yaxşı yaşamaq istəyirik. Bu mənada qohum-əqrabadan sizə qınaq olurmu?
Arif Rəhimzadə:
- Xeyr, elə mənim qohumlarım da təqribən bu səviyədədir.
Elşad Eyvazlı:
- Gənclər yaxşı yaşamaq istəyirlər axı. Necə ola bilər ki, adamın Arif Rəhimzadə kimi atası olsun, amma onun 150 min manatlıq maşını olmasin?
....
Elbrus Seyfullayev:
- Hər bir insanın cəmiyətdə razılaşdığı-razılaşmadığı, xoşu gələn, xoşu gəlməyən şeylər var. Sizin fikrinizi bilmək istəyirəm? Nədən narazısınız, nədir sizi incidən?
Arif Rəhimzadə:
- Məni ən çox narahat edən, cəmiyyətdəki vəziyyətdir. Misal üçün qonşu haqqında düşünməmək, yalnız özün haqqında düşünmək, səliqəsizlik, görürsən 4-cü mərtəbədən yerə zibil atırlar, heç düşünmürlər. Çox isti bir hava var. Bir qonşum evini təmir etdirib, gətirib tikinti materiallarını töküb küçəyə, içində də çoxlu plastik zad var, sonra da isti vaxtı həmin zibilə od vurub. Belə şey olar, bax, belə şeylər məni daha çox narahat edir.
Elbrus Seyfullayev:
- Siz harada yaşayırsınız ki?
Arif Rəhimzadə:
- Mən 8-ci kilometirdə yaşayıram.
Elbrus Seyfullayev:
- Bazarın qarşısından keçib gedirsiniz hər gün?
Arif Rəhimzadə:
- Xeyr, mən Nobel prospektindən keçib gedirəm.
Elbrus Seyfullayev:
- Bina evində yaşayırsınız?
Arif Rəhimzadə:
- Xeyr, xüsusi evdə yaşayıram.
Elbrus Seyfullayev:
- Övladlarınız sizinlə yaşayırlar?
Arif Rəhimzadə:
- Bəli.
Elbrus Seyfullayev:
- Nə işlə məşğul olurlar?
Arif Rəhimzadə:
- Hökümət işi ilə məşğul olmurlar.
Elbrus Seyfullayev:
- İş tapa bilmədiniz, yoxsa nəsə başqa bir səbəb oldu?
Arif Rəhimzadə:
- Xeyr, ozlərinin meyilləri olmadı. İşləyirlər, özlərini dolandırırlar.
Elşad Eyvazlı:
- Arif müəllim, sizin kimi deputatlarımız çoxdur?
Arif Rəhimzadə:
- Var, çoxdur.
Elşad Eyvazlı:
- Neçə deputatın şəxsi avtomibili yoxdur?
Arif Rəhimzadə:
- Mən ona baxmamışam, amma belə deputatlar var.
Elməddin Muradlı:
- Arif müəllim, Milli Məclisin sədrinin birinci müavini vəzifəsindən komitə sədirinə düşmək sizin üçün agır gəlmədi ki?
Arif Rəhimzadə:
- Xeyr, ağır gəlmədi, çünkü o vaxt elə oldu ki, sədr dəyişdirildi, sözün doğrusu, mənə heç deyən də yox idi o postdan gedim. Cavanlaşdırma aparırdılar, elə mən də tərafdarıyam elə şeyin. Mən də komitə sədri seçildim.
Elşad Eyvazli:
- Deməli, növbəti parlamentdə sıravi deputat kimi fəaliyyət göstərməyə də hazırsınız?
Arif Rəhimzadə:
- Mən çalışacam komitə sədri olum.
Elşad Eyvazlı:
- Axı parlamentin tərkibi yenə də cavanlaşacaq.
Arif Rəhimzadə:
- Xeyr, mən heç özümü orada da yaşlı hiss etmirdim. Mən meyli gördüm, dedim yəqin təzələnməyə ehtiyac var.
Elşad Paşasoy:
- Siz yaşda deputatların, parlamentdən kənarda qalması barədə, versiyalar varmı? Parlamentin gəncləşdirilməsini normal hesab edirsinizmi? Yoxsa təcrübə əsas götürülməlidir?
Arif Rəhimzadə:
- Belədə hesab edirəm ki, hər ikisi olmalıdır. Gənclə iş bitmir ki, təcrübə də olmalıdır.
Elşad Paşasoy:
- Parlament sədrinin fəaliyyətini bəs necə dəyərlədirirsiniz?
Arif Rəhimzadə:
- Bilirsiniz, bu 5 il ərzində sədr öz səlahiyyətlərinin öhdəsindən layiqincə gəlibsə, yaxşı işləyibdir demək. Qanunvericilik sahəsində bizim işimiz axsamayıbdır. Milli Məclisin bax bu gördüyünüz kompleksi, ümumiyyətlə, maddi-texniki bazasının yaradılmasında onun çox böyük rolu olub. Açığı deyim mən olsaydım bunu edə bilməzdim.
Elməddin Muradlı:
- Arif müəllim, bu isti yay günlərində komitə nə işlə məşğul olur? Nə yenilik var?
Arif Rəhimzadə:
- İyulun 15-dən hamı tətildədir. Mən də sizin zənginizə görə gəlmişəm bura, sizin suallarınıza cavab verməyə.
Elbrus Seyfullayev:
- Sizin burada əyləşdiyiniz yer normaldır, dəniz görünür, ancaq bu biri tərəfdə olanlar üçün yəqin çətindir, çünkü, qarşısını binalar kəsir, normal haldırmı bu cür tikililər şəhərdə?
Arif Rəhimzadə:
- Bilirsiniz, insanlar həmişə tikiləndə də narazıdır, tikilməyəndə də narazıdır. İnsanların zövqü də eyni deyil. Mən hesab edirəm ki, belə hündür yerlərdə binalar tikilə bilər. Bu heç də o demək, deyil ki, parlamentin qarşısını alır. Ancaq Azərbaycanın elə yerləri var ki, orada bina tikmək düzgün deyil. Buna misal üçün İçərişəhəri gotürək. İçərişəhər qorunur. Düzdür, orada da vaxtı ilə müəyyən şeylər olub, amma, indi qorunur.
Elməddin Muradlı:
- İçərişəhərdə bəzi səfirlik və ofis var, bəs bu necə?
Arif Rəhimzadə:
- Hər halda yenə ofis tikmək olar. Ancaq yaşayış binası olmaz.
Elbrus Seyfullayev:
- Arif müəllim, sizin komitəniz barədə danışaq. Sizin komitənizin təqdimatı ilə Azərbaycanın bir çox rayonunun adı dəyişdirilib, bu da cəmiyyətdə müsbət qarşılanıb, yəni bir növ özünə qayıdıb, milliləşib. Fikirlər var ki, Nərimanovun da adı dəyişilməlidir, Əzizbəyovun, bir də Gədəbəyin adı dəyişilməlidir. Yəni bu barədə iş nə yerdədir? Bu olacaqmı?
Arif Rəhimzadə:
- İş burasındadır ki, bu dəyişdirmələri gərək əhali istəsin. Həqiqətən də əhali istiyirsə, bu dəyişmə gedir. Əhali məsələni qaldırandan sonra təkliflər toplanır və Prezident Administrasiyasına çatdırılır. Əgər təkliflər müdafiə edilirsə, onda bizə müraciət olunur və sonra qərar qəbul olunur. Bu sadalanan yerlərin hamısının adını birdən dəyişdirmək olmaz. Gədəbəy tamam başqa bir şeydir. Bunu gərək əhali də başa düşsün ki, hamısını birdən etmək olmaz.
Elməddin Muradlı:
- Mən bələdiyələr haqqında sual vermək istiyirəm, bu sessiyada bələdiyələrin sayı xeyli azaldıldı, birləşmə getdi. Bəzi məlumatlara görə, yenə birləşmə olacaq. Sizcə bələdiyələrin azaldılmasında mənfi bir cəhət varmı?
Arif Rəhimzadə:
- Azərbaycanda 3000-dən artiq bələdiyyə var idi, birləşmə yolu ilə onların sayı azaldıldı, 1718-ə düşdü. Onlar öz potensialını istifadə etməyiblər, onlar öz potensialını istifadə etsələr, onlara verilən səlahiyyətləri tam istifadə etsələr, ondan sonra görünər ki, bu məsələyə ehtiyac var, ya yox. Hazırda bələdiyyələrə verilən o səlahiyətlər istifadə olunmur. Bunların birləşməyə ehtiyacı var.
Elməddin Muradlı:
- Bələdiyələr nəyə görə öz səlahiyyətlərindən istifadə edə bilmir? Öz səlahiyyətlərini bilmirlərmi, yoxsa buna gücləri çatmır?
Arif Rəhimzadə:
- Bu, kompleks məsələdir, bir sözlə desək, cəmiyyətdə olan vəziyyətlə əlaqədardı. İndi burada 7 nəfər toplaşmışıq, bələdiyyələrə daşınmaz əmlak haqqında vergi verilməlidir. Burada kim vergi verir? Heç kim.Torpaq vergisi bələdiyələrə verilməlidir.
Elbrus Seyfullayev:
- Bəs, nə vaxt görəcəyik ki, bələdiyələr sərbəstdirlər, icra hakimiyyətindən asıli deyillər?
Arif Rəhimzadə:
- Mən hesab edirəm ki, kənd yerlərində elə bələdiyyələr var, çoxdur. Hər bir işini görür, camaatın nüfuzunu da qazanıblar.
Elbrus Seyfullayev:
- Arif müəllim, nəyə görə 2007-ci ildən bəri torpaq satmağa imkan vermirlər bələdiyyələrə?
Arif Rəhimzadə:
- Onların sərancamında olan torpaqların əksəriyyəti satılıb, bölünüb. İndi bunlar təzə torpaq istəyirlər. Elə torpaq da yoxdur, bilirsiniz ki, Azərbaycan ərazisi məhdud olan bir ölkədir.
Elşad Paşasoy:
- Bir fakt da var ki, 2009-cu il seçkilərində konkret adlar var idi. İcra başçıları kimlərin namizəd olacağını da müəyyənləşdirirdilər. Sonradan da deyilənlər düz çıxdı.
Arif Rəhimzadə:
- Ona görə bir çox bələdiyyələrdə seçkilər baş tutmadı. Bəziləri prokurorluğa verildi.
Elşad Eyvazlı:
- Arif müəllim uzun müddətdir deyilir ki, Baki şəhərinin meri seçilsin, siz bu məsələyə necə baxırsınız?
Arif Rəhimzadə:
- Mer məsələsi Bakı kimi şəhərdə çətin bir şeydir. Azərbaycanın təsəvvür edin ki, 90%-dən çoxu Bakiya gəlir. Düzdür, bunun səbəbləri var, kənd istehsalçı ola-ola onun əməyi sayəsində yetişən məhsulun böyük bir hissəsi gəlib Bakıya çıxır. Başqa şeylər də var, məsələn: dəmir yoludur, elektirikdir, qazdır, neftdir bunların hamısı gəlir Bakıda birləşir. Bakı merliyi yaradılandan sonra, mer səviyəsində olandan sonra, bu vəsaitlərə iddialar olacaq. Ona görə də bəzi şeylər özəlləşdirilməlidir.
Elşad Paşasoy:
- Paytaxtdan danışdıq, paytaxtin köçürülməsi və yeni paytaxt salınması ilə bağlı konkret fikir varmı?
Arif Rəhimzadə:
- Birincisi, paytaxtın baş planı var, onun müddəti bitibdi və hazırda yeni paş plan işlənilir.
Elşad Eyvazlı:
- Bakı şəhərinin hazırki icra başçısı hec bir millət vəkilin eşitmir. Siz bu mənada problem yaşamamısınız ki?
Arif Rəhimzadə:
- Xeyr...
Elməddin Muradlı:
- Qarabag problemi ilə bağlı sizin fikirləriniz bilmək istəyərdik?
Arif Rəhimzadə:
- Bu haqda kifayət qədər məlumat var, Madrid pirinsipləri əsasında danışıqlar gedir. Ermənilər də guya razılaşıblar, ancaq son həddə gələndə, ermənilər dedi “yox, biz bunu başqa cür başa düşürük”. Milli Məcilisdə o vaxt qərar qəbul olunacaq ki, deyəcəklər torpaqlar qaytarıldı.
Elbrus Seyfullayev:
- “Qarabağ” klubunun son qələbəsini necə qiymətləndirisiniz?
Arif Rəhimzadə:
- Oyuna baxdım, özü də çox ləzzətlə. Mənə ən çox ləzzət edən o oldu ki, o komandanın adı “Qarbağ”dır. “Qarabağ”ın belə yaxşı bir oyun göstərməsi çox böyük uğurdur.
 |
|
|
|
|
|
|
|
|
