Modern.az

İyulda Azərbaycanda 10-dan çox jurnalist hücuma məruz qalıb

İyulda Azərbaycanda 10-dan çox jurnalist hücuma məruz qalıb

11 Avqust 2010, 17:17

Media Hüququ İnstitutu Azərbaycanda medianın hüquqi durumu ilə bağlı növbəti hesabatını açıq­la­yıb. Hesabat 2010-cu ilin iyul ayında baş verən olayları əhatə edir.

Modern.az-a daxil olan hesabatda vurğulanır ki, ötən ay xüsusən tənqidçi qəzetlərin cinayət qanunvericiliyinin böhtan və təhqirə görə ağır cəzalar nəzərdə tutan müddəaları ilə məhkəməyə çəkilməsi intensivliyi səngiməyib. 4 jurnalistin məhz Cinayət Məcəlləsinin 147 və 148-ci maddələri ilə həbs olunması tələb olunub.

İyul ayında ümumilikdə media və jurnalistlərlə bağlı 27 məhkəmə prosesi davam edib. Həmin proseslərdə medianın əleyhinə 3 ağır qərar çıxarılıb. Sənəddə qeyd olunur ki, Avropa Məhkəməsinin qərarından sonra azadlığa buraxılacağı gümün olunan “Gündəlik Azərbaycan” və “Realnıy Azerbaydjan” qəzetlərinin həbsdə olan qurucusu və baş redaktoru Eynulla Fətullayevə daha bir ağır hökm oxunub. Qaradağ Məhkəməsi şübhəli narkotik ittihamını təsdiqləyərək 8 il 6 ay müddətinə azadlıqdan məhrum edilmiş jurnalistin cəzasını daha 30 ay artırıb. Jurnalistlər qarşı növbəti ağır məhkəmə qərarları “Xural” və “Yeni Müsavat” qəzetlərinə qarşı çıxarılıb. Nərimanov Məhkəməsi Azərbaycan Prezidenti Administrasiyasının rəhbəri Ramiz Mehdiyevin “Xural”a qarşı şərəf və ləyaqətin müdafiəsi və mənəvi ziyanın ödənilməsi ilə bağlı iddiasını təmin edərək qəzetin üzərinə iddiaçıdan üzr istəmək, yaydığı bilgiləri təkzibləmək və mənəvi zərər əvəzi olaraq 10 000 AZN məbləğində təzminat ödəmək vəzifəsi qoyan qərar qəbul edib. Nizami Məhkəməsi isə millət vəkili Cəlal Əliyevin “Yeni Müsavat” qəzetinə qarşı iddiasını qismən təmin edib. Tənqidçi qəzetin üzərinə mübahisə doğurmiş yazıları təkzib etmək, iddiaçıya mənəvi zərər əvəzi 1500 manat ödəmək vəzifəsi qoyulub.

Jurnalistlərin şikayətləri üzrə çıxarılan məhkəmə qərarları da onların əleyhinə olub. Qaradağ Məhkəməsi şübhəli xuliqanlıq ittihamı ilə həbs olunmuş gənc bloqçu Adnan Hacızadənin vaxtından əvvəl həbsdən azad edilməsi ilə bağlı iddianı təmin etməyib. Məhkəmə qərarını bloqçunun hələ tam islah edilməməsi ilə əsaslandırıb.

Mediadan güman olunan mənəvi zərər əvəzi olaraq istənilən, habelə məhkəmələrin medianın üzərinə qoyduğu ödənc yükünün məbləği normal olçülərə uyuşmur. Hesabata görə, ötən ay maddi durumu çox sıxıntılı olan tənqidçi mediadan ehtimal edilən maddi və mənəvi zərər əvəzi 95 000 AZN təzminat tələb olunub. Məhkəmələr medianın üzərinə məhz güman olunan mənəvi zərərə görə 11 500 AZN təzminat yükü qoyub. Normal ölçülərə uyğun olmayan məbləğdə təzminat ödənilməsini nəzərdə tutan qərarların heç birində ödəncin məbləği əsaslandırılmayıb, qəzetin ödənci vermək gücündə olub-olmadığı, həmin məbləğin qəzetin normal işləməsinə zərər vurub-vurmayacağı nəzərə alınmayıb.

İyulda medianın xeyrinə cəmi 1 məhkəmə qərarı şıxarılıb. Nizami Məhkəməsi “İdeal” qəzetinin baş redaktoru Nazim Quliyev və “Binə” Ticarət Mərkəzinin direktoru Dilşad Əmirovanın “Yeni Müsavat” qəzetinin baş redaktorunun müavini Azər Ayxana qarşı şikayətini rədd edib. Xüsusi ittihamçılar jurnalistin Cinayət Məcəlləsinin böhtan və təhqirə görə məsuliyyət nəzərdə tutan bədnam maddələri ilə həbs edilməsini tələb edirdilər.

Hesabata görə, ötən ay jurnalistlərə qarşı basqı halları dayanmayıb. İyulda 6 belə fakt baş verib, nəticədə peşə fəaliyyətini yerinə yetirən 10-dan artıq jurnalist təzyiqlə üzləşib. Ötən ay ən kəskin və qalmaqallı fiziki basqı tənqidçi xəbər mediasının – “Yeni Müsavat” qəzetinin reportyoru Elmin Bədəlovun başına gəlib. Elmin Bədəlov bir-birinin ardınca bir neçə dəfə təzyiqlə üzləşib.
Peşə fəaliyyətini yerinə yetirən jurnalist öncə Biləsuvar rayonunda polis tərəfindən saxlanıb. Rayonda keçirilən yürüşdən roportaj hazırlayan jurnalist təhqir olunub, fotoaparat və telefonu əlindən alınaraq saxlanılıb. E. Bədəlov növbəti dəfə pia.az xəbər portalının redaktoru Anar Gəraylı ilə birgə Şüvəlan qəsəbəsində, bu dəfə daha ağır fiziki basqıya məruz qalıb. Zəngin məmurların yaşadığı deyilən məhəllədən reportaj hazırlayan jurnalist vəhşicəsinə döyülüb. Kimlikləri hələ də tam dəqiqləşməsə də yüksək rütbəli məmurların yaxınları olduğu deyilən şəxslər hər iki jurnalisti tikilməkdə olan villaya apararaq 2 saat ərzində döyüblər, təhqir ediblər, hədələyiblər. Onların peşə alətləri də yararsız hala salınıb. Hüquq mühafizə orqanları faktla bağlı araşdırmalara başlayıb. Ancaq döyülən jurnalistlər araşdırmaların obyektiv aparılmadığı barədə açıqlama veriblər.

“Azad Azərbaycan” telekanalının (ATV) əməkdaşı Yasamal rayonunun hərbi komissarlığında çəkiliş apararkən vəhşicəsinə döyülüb. Hərbi komissarlığın kapitan rütbəli işçisi reportyor Ramin Şahbazova zor tətbiq edib. Aldığı zərbələrdən jurnalistin sifəti tanınmaz hala düşüb. Basqı faktı ilə bağlı Yasamal Polis İdarəsinə şikayət edilib. Araşdırmaların nəticəsi barədə hələ ictimaiyyətə bilgi verilməyib.

“Turan” İnformasiya Agentliyinin əməkdaşı Cavid Qurbanov, mediaforum.az xəbər saytının əməkdaşı Erkin Xəlilov, “Azadlıq” Radiosunun əməkdaşı Abbas Atilay, “Bizim yol” qəzetinin əməkdaşı Hacı Zeynalov, Reportyorların Azadlıq və Təhlükəsizlik İnstitutunun əməkdaşı Mehman Hüseynov kütləvi aksiyalardan reportaj hazırlayarkən fiziki basqıyla üzləşiblər. Jurnalistlər saxlanılıb, onların foto və video kameralara köçürdükləri görüntülər silinib.

Modern.az

Instagram
Gündəmdən xəbəriniz olsun!
Keçid et
Ukrayna ordusu dəhşət saçdı: Rusiya ərazisi vuruldu