Milli Məclisin üzvü Əli Məsimli parlament seçkilərində iştirak etmək qərarını verib. Bu barədə məlumatı Modern.az-a millət vəkili özü verib. Əli Məsimli  yenidən öz namizədliyini 113 saylı Şəki şəhər seçki dairəsindən  irəli sürəcək.

Ötən seçkiləri xatırladan millət vəkili əməkdaşımızla söhbətdə bildirib ki, 2005-ci ildə onun namizəd olduğu dairədə həm müxalifətin, həm də hakimiyyətin çoxlu namizədləri olub.

“Buna baxmayaraq qalib gəldim. O vaxtdan etibarən keçmiş həmkarlarım daim mənə qarşı “qara piar”dan istifadə ediblər. Mənim seçki prosesində iştirakımın guya elm sahəsində karyera qurmağıma kömək etdiyi barədə yalanlar uydururdular. Bu bədxahlara demək istəyirəm ki,  mən gənc vaxtlarımda öz elm karyeramı dayandırıb milli-azadlıq hərəkatına qoşulmuşam. Bütün sağlamlığımı bu yolda qoymuşam. O zaman bu adamlar  kol dibində gizlənmişdilər, ya da rus kəşfiyyatına işləyirdilər. Çalışaram mənə qarşı aparılan bu “qara piar”ı onların öz başına çırpım”-deyə Ə.Məsimli vurğulayıb.

Modern.az