Modern.az saytının “Bir şəklin tarixçəsi” rubrikasının növbəti təqdimatı Azərbaycanın mərhum eks-prezidenti, Azərbaycan Xalq Cəbhəsi Partiyasının mərhum sədri Əbülfəz Elçibəylə bağlıdır.
Bu da səbəbsiz deyil. Bu gün - 24 iyun tarixi Əbülfəz Elçibəyin doğum günüdür.
Bu şəkli mərhum Elçibəyin yaxın silahdaşı olmuş Ədalət Tahirzadə təqdim edib. 1992-ci ilə aid olan şəklin tarixçəsini Ədalət bəy belə açıqlayır:
”Bu, müstəqil Azərbaycanda ilk şəxsiyyət vəsiqəsi sayıla bilər. Elçibəy prezident seçilən kimi bu vəsiqəni Türkiyədə bir firma hazırlamışdı ki, o, xarici ölkələrə bununla getsin. Bəy xaricə sovet gerbi olan pasportla getmək istəmirdi. Sənəd mənə Elçibəydən yadigardır”.
Əbülfəz Qədirqulu oğlu Əliyev (Elçibəy) 24 iyun 1938 -ci ildə Naxıvan MR-in Ordubad rayonunun Kələki kəndində anadan olub. 7 illik Unuskənd məktəbini bitirdikdən sonra Ordubad şəhər 1 saylı orta məktəbində təhsilini davam etdirib. 1957 -ci ildə Bakı Düvlət Universitetinin Şərqşünaslıq fakültəsinin ərəb filologiyası şöbəsinə daxil olub. Buranı bitirdikdən sonra (1962) təyinatla SSRİ Hidrolayihə İnstitutunun Bakı şöbəsində tərcüməçi işləyib. Misir Ərəb Respublikasına göndərilən Əbülfəz bəy Əsvan bəndinin tikintisində tərcüməçi kimi çalışıb (yanvar 1963 - oktyabr 1964).
Xarici ezamiyyətdən dönərək 1965 –ci ildə BDU-nun aspiranturasına daxil olub və aspirantura təhsilini 1968-ci ildə uğurla tamamlayıb.
1975-ci ilin yanvarında Azərbaycan Dövlət Təhlükəsizlik Komitəsi onu tələbələr arasında millətçi və antisovet təbliğatı aparmaq adıyla həbs edib və 17 iyul 1976-cı ilədək siyasi dustaq olaraq azadlıqdan məhrum olunub. Əsasən Qaradağ daş karxanasında ağır fiziki işlərə məhkum edilib.
Həbsdən buraxıldıqdan sonra Əbülfəz bəy bir müddət işsiz qalıb. 1976-cı ilin dekabrında Azərbaycan Milli Elmlər Akademiyası Əlyazmalar İnstitutunda kiçik elmi işçi kimi elmi fəaliyyətə başlayıb. Sonralar böyük elmi işçi, şöbə müdiri, aparıcı elmi işçi elmi rütbə və vəzifələrə qədər yüksəlib.
Elçibəy 1988-ci ildən sonra alovlanan milli-azadlıq hərəkatının önündə gedib.
1992-93-cü illərdə Azərbaycan Respublikasının prezidenti olub.
Elçibəy 22 avqust 2000 -ci ildə Türkiyədə vəfat edib. Bakıdakı Fəxri Xiyabanda dəfn olunub.
A.Qorxmaz
