Parlament seçkilərini işıqlandırmaq üçün Mərkəzi Seçki Komissiyasında 20-yə yaxın xarici KİV-in 43 əməkdaşı akkreditiə olunub.
Bu barədə Modern.az-a Mərkəzi Seçki Komissiyasından (MSK) məlumat verilib.
MSK bildirib ki, səsvermə prosesi ilə bağlı ictimaiyyətin vaxtaşırı məlumatlandırılması məqsədilə KİV-lərin seçki məntəqələrindən material hazırlaması üçün bütün şərait yaradılıb.

“Röyters”, BBC, “Əl-Cəzirə”, TRT, “Associated Press”, “Frans Press”, EPA, “Anadolu”,  “İhlas” Haber Ajansı, “Doğan” Haber Ajansı, “Daily İttehad” da daxil olmaqla 20-yə yaxın xarici kütləvi informasiya vasitələrindən 43 beynəlxalq KİV təmsilçisi seçkiləri işıqlandırmaq məqsədilə MSK tərəfindən akreditə olunub.

2008-ci ildən başlayaraq tətbiq olunan və seçki məntəqələrindən kənarda internet vasitəsilə səsvermə prosesini canlı izləmə imkanı verən veb-kameralardan istifadə təcrübəsi bu seçkilərdə də davam etdiriləcək. Respublikadakı seçki məntəqələrinin 500-də (təxminən 10%-də) veb-kameralarla bağlı texniki hazırlıq yekunlaşdırılıb və bu məsələyə MSK-nın iclasında baxılıb müvafiq qərar qəbul edilərək veb-kameralar quraşdırılmış məntəqələrin siyahısı təsdiq olunub.

Bu veb-karmeralar vasitəsilə internet istifadəçiləri istər ölkə daxilindən, istərsə xaricindən MSK-nın internet səhifəsinə daxil olaraq səsvermə prosesini, səslərin sayılması və nəticələrin müəyyənləşdirilməsini arasıkəsilmədən canlı müşahidə etmək imkanı əldə edirlər.

Modern.az