Azərbaycan Ordusu ölkəmizin ərazi bütövlüyünü, suverenliyini və təhlükəsizliyini təmin etmək missiyasını şərəflə yerinə yetirir. Xüsusilə qış mövsümündə sərt iqlim şəraitində xidmət edən hərbçilərimizin fədakarlığı xüsusi vurğulanmalıdır.
Kəlbəcər və Laçın kimi yüksək dağlıq ərazilərdə xidmət edən əsgərlərimiz soyuq hava və sərt relyef şəraitində vəzifələrini yerinə yetirir. Burada temperatur sıfırın altında düşür, güclü küləklər və yağıntılar müşahidə olunur. Bu səbəbdən hərbçilərimizin geyim təminatı, texnikanın işlək vəziyyətdə saxlanılması, kazarmaların və postların isidilməsi kimi məsələlər xüsusi nəzarətdə saxlanılır.
Ordumuzun döyüş qabiliyyətinin artırılması və hərbçilərin xidmət şəraitinin yaxşılaşdırılması istiqamətində dövlət tərəfindən ardıcıl tədbirlər görülür. Əsgərlərimizin sağlamlığı, təhlükəsizliyi və döyüş hazırlığı üçün lazımi şərait yaradılır, qış mövsümünə uyğun təchizat təmin edilir.
Bu mövzu ilə bağlı Modern.az-a danışan Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev bildirib ki, Kəlbəcər, Laçın kimi relyefi olan ərazilərdə hərbi hərbi xidmət keçmə hər zaman fərqli olub:
“Məlum məsələdir ki, buralar dağlıqdır və temperatur fərqlidir. Eyni zamanda burada fərqli olan hərbçilərin hərbi formasıdır. Dağlarda hündürlüyə, temperatura görə aparılan xidmətdə fərqli olur. Bunlar hamısı hərbi hissəslərdə nəzərə alınır və müvafiq olaraq hərbi hissənin iş qrafikinə uyğun olaraq əmrlər verilir. Təbii ki, Azərbaycanın ərazisində bir neçə iqlim qurşağı olduğuna görə yay geyimindən qış geyiminə keçilir. Texnikadan istifadə və onların isidilməsi, kazarmaları, postların isidilməsi məsələsində ciddi addımlar atılır. Yəni qış və yay xidmətinə uyğun olaraq, müvafiq plana uyğun onlar xidmətini keçir”.
A.Nağıyev söyləyib ki, çətin hava şəraitinə baxmayaraq, bu bölgələrdəki hərbi qulluqçular öz vəzifə borclarını ləyaqətli şəkildə həyata keçirir:
“Məlum məsələdir ki, bu hərbi qulluqdur və əmrlə tənzimlənir. Hər bir hərbçi başa düşür ki, onun arxasında dayananan Vətəndir. İstər sərhəd, istərsə də Qarabağ olsun. Hərbidə dözüm göstərmək məfhumu yoxdur. Bu əmrin yerinə yetirilməsidir və müvafiq hava şəraitinə uyğun olaraq tənzimlənir. Ordumuzun qulluqçuları çətin hava şəraitinə və coğrafi relyefə baxmayaraq, bu ərazilərdə hərbi qulluğunu böyük şücaət və ləyaqətlə icra edir”.
