“Bu proseslə başladığımız andan müəllimlər üçün ən əlverişli şəraiti yaratmağa çalışmışıq. Bu imtahan infrastrukturu ilə bağlı olan məsələdir”.
Modern.az xəbər verir ki, bu barədə "Təhsil TV"yə açıqlamasında Məktəbəqədər və Ümumi Təhsil üzrə Dövlət Agentliyinin (MÜTDA) Ümumi təhsilin təşkili şöbəsinin müdir müavini Nurlan İsmayılbəyli deyib.
Onun sözlərinə görə, cari ildə ölkənin 19 müxtəlif şəhərində imtahan mərkəzləri təşkil ediləcək:
“Müəllimlər işə qəbulu imtahanlarına baxsaq, namizədlərin mütləq paytaxta gəlməsi, burada yaradılmış infrasrukturdan istifadəsinə zərurət var idisə, indi ölkənin 19 müxtəlif şəhərində bu imkanı yaratmışıq. Ötən il ilk dəfə olaraq Naxçıvan Muxtar Respublikasında da infrastuktur yaradılıb və onlar da sertifikatlaşdırma prosesində iştirak ediblər”.
Nurlan İsmayılbəyli qeyd edib ki, bu proses tamamilə elektron formada həyata keçirilir:
“Müəllimlər imtahanı bitirdikləri anda öz nəticələrini görə bilirlər. İmtahan başa çatdıqdan sonra isə həm yanlış, həm doğru cavabları ilə tanış ola bilirlər. Müəllimləri daha çox narahat edən suallarla bağlı açıqlamalar da öz əksini tapır. Prosesdən sonrakı apellyasiya mərhələsi də elektron formada təşkil olunur, müəllimlərin hərhansı bir ünvana getməsi, kağız daşıyıcılar vasitəsilə ərizə yazmasına ehtiyac yoxdur. Onlar imtahan məlumatları ilə tanış olduqları sistem vasitəsilə də apellyasiya müraciətlərini edə bilərlər. Apellyasiya müraciətlərinin emalı da qısa müddətdə həyata keçirilir. Həmkarlarımız həmin istiqamətdə çox çalışır, amma hansısa suallarda yanlışlıq olsa belə həmin nəticələr müəllimlərimizin xeyrinə hesablanır. Müəllimlərimizə bir daha müraciət edirik ki, prosesdən öncə və sonra dələduzların bu tələlərinə aldanmasınlar. Ötən illərdəki proseslərlə bağlı müvafiq dövlət qurumları tərəfindən bu məsələlər araşdırılır. Bu nöqsanlara yol vermiış şəxslər barəsində də tədbirlər görülüb. Müəllimlərimizdən əsas xahişimiz ondan ibarətdir ki, onlar öz diqqətlərini öz imtahanları və bacara bildiklləri qədər yüksək nəticə əldə etməyə sərf etsinlər”.
