SOCAR “Azneft" İB-nin N.Nərimanov adına Neft Qaz Çıxarma İdarəsinin 3 saylı Neft Yığım Məntəqəsində 10 nəfər neftçinin həyatını itirməsilə nəticələnən qəzaya səbəb olan şəxslərə töhmət verməklə kifayətlənib.
Bu haqda Modern.az-a saytına Neftçilərin Hüquqlarının Müdafiə Komitəsinin sədri Mirvari Qəhrəmanlı məlumat verib.
Belə ki, faciənin qarşısının alınması üçün götürdükləri öhdəlikləri yerinə yetirmədiklərinə görə, Texniki-istehsalat şöbəsinin rəisi Şükürov Ramazan Knyaz oğluna, Neft-mədən hidrotexniki qurğularının istismarı, təmiri və korroziyaya qarşı mübarizə üzrə istehsalat şöbəsinin rəisi Ramazanov Ramiz Elxan oğluna, MMTX-nin rəisi Qəmbərli Mahmud Ağəsəf oğluna, MMTX-nin rəis müavini Bağırov Vüqar Əkrəm oğluna, NQÇS-nin rəis müavini Xamıyev Zamin Yusub oğluna Azərbaycan Respublikası Əmək Məcəlləsinin 186-cı maddəsinin 2-ci hissəsinin “b” bəndinə əsasən sonuncu xəbərdarlıqla şiddətli töhmət verilsin.
Xatırladaq ki, 15 dekabr 2016-cı ildə səhər saat 05:00 radələrində Xəzər dənizində 41 metr/saniyə sürəti ilə əsən güclü külək "Azneft" İB-nin N.Nərimanov adına Neft Qaz Çıxarma İdarəsinin 3 saylı Neft Yığım Məntəqəsinin sağ və sol hissəsində yerləşən estakadanın uzunluğu təqribən 150 metr olan hissəsi və ona bitişik olan meydançanı, həmçinin üzərindəki yaşayış budkasını da uçurub.
Hadisə nəticəsində Neft Yığım Məntəqəsinin növbədə olan 5 nəfər və yaşayış budkasında olan 5 nəfər (cəmi 10 nəfər) əməkdaşı itkin düşüb. Onlardan İlham Qafarov, Həsənağa Hacıəliyevin meyitləri tapılaraq ailələrinə təhvil verilib.
Gülşən RAUFQIZI
