Sabiq deputat Etibar Hüseynov eks-müdafiə naziri Rəhim Qazıyevin “Xural” qəzetinə müsahibəsində bəzi şəxslərin ünvanına ittihamlar səsləndirməsindən hiddətlənib. E.Hüseynov R.Qazıyevin susmaq əvəzinə danışmasını onun abır-həyadan uzaq olmasıyla əlaqələndib.
Modern.az-ın məlumatına görə, Etibar Hüseynov bu haqda belə deyib:
“Rəhim Qazıyev yenə də danışıb. Bu adam köhnə şarmanka kimi eyni bayatılarını söyləməklə hamının zəhləsini töküb. Yenə hamı satqın, xain, biqeyrətdi, bircə bu Rəhim süddən çıxmış qaşıqdı. Adamın üzündə bircə damcı abır-həya deyilən bir zad olsaydı gərəkdi ki, utana, ölə, yerə girə, camaatın içinə çıxmağa sifəti olmaya; amma bu hələm utanıb-qızarmadan danışır, ittiham da edir. Məsəl var deyirlər ki, "Abırlı abırına qısılıb danışmadı, abırsız da elə bildi haqlıdı". Nə isə... Müsahibəsində mənim də adımı təhqiramiz formada çəkir. Amma qoca çərənçiyə baş qoşub vaxt itirməyimə heyfim gəlir. İllər öncə müxtəlif adamlar vasitəsiylə mənə ismarıc yollayıb debata dəvət etsə də, getməmişdim. Səhv eləmirəmsə 2009-cu il idi. Özü zəng etdi. Dedi "kişiliyin, qeyrətin çatırsa gəl üzbəüz debata. Danışdıqlarımız da olduğu kimi videoya yazıb internetə yükləyəcəm". Getdim. Bunun pişiyini divara dırmaşdırıb, xoruzunu da qoltuğuna verib yola saldım. Amma öz xislətinə uyğun olaraq çəkilən videonu yayımlamadı. İndi ay Rəhim, mən də sənə elə öz xislətinə uyğun şəkildə də səslənirəm; "əgər azca da olsa kişiliyin, ləyaqətin, mənliyin, qeyrətin qalıbsa, həmən debatın videosunu tam şəkildə yayımla. Qoy camaat da sənin əsl sifətini görsün. Yoxsa başını yüz kərə kol dibinə soxmağa çalışsan da xeyri yoxdu".
E.Hüseynovun sözlərinə görə, o, bu mövzuda “Xural”ın rəhbəri Əvəz Zeynallı ilə telefonda danışıb.
“Dedi ki, həmin videonun bir surəti də ondadı və əgər mən istəyirəmsə tam şəkildə internetə yükləyə bilər. Əgər Əvəz bəy sözünün üstündə dursa, çox maraqlı bir söhbətin şahidi olacaqsınız”.
Modern.az
