Yazdığı nəgmələrin əks-sədasını arzulayan, “Biz gedərik, qoca dünya qalandır” –deyib misralarını qoca dünyaya vəsiyyət edən bir şairin -XX əsr Azərbaycan ədəbiyyatının ən görkəmli, qüvvətli klassiklərindən olan ustad sənətkarın, Xalq şairi, Dövlət mükafatı laueratı Məmməd Rahimin 110 illik yubiley tədbirləri respublikada böyük cosqu ilə, təntənə ilə qeyd olunur.
Dərin lirika, hiss və duyğularla səciyyələndirilən M.Rahim Azərbaycan ədəbiyyatında daha çox lirik şair, epik əsərlərin ustadı, mahir bədii tərcüman, nəğməkar şair kimi tanınır, sevilir. Şairin ilham rübabı coşğun, təntənəli, əzəmətli olmaqla, onu lirika xəzinəmizin bələdçisinə çevirib. Sonsuz məhəbbətlə vətənini, torpağını, elini sevən ədib sözün əsl mənasında vətənpərvər şair kimi özünü təsdiq edə bilib. Akademik Məmməd Arif Dadaşzadə Rahim yaradıcılığına belə qiymət verib:,, Öz şeirləri, nəğmələri, poemaları ilə şeirimizə yeni hiss, duyğular, yeni motivlər gətirmişdir...
Bəli, bu yüksək yaradıcı keyfiyyətlərin sahibi olan Məmməd Rahim haqqında ən dəyərli fikirlər bu günlərdə “Könüllülər” Kitabxana İctimai Birliyinin təşkilatçılığı ilə Bakı Mühəndislik Universitetinin akt zalında gerçəkləşən şairin 110 illik yubileyinə həsr olunmuş Xatirə gecəsində səsləndirildi.
Tədbirin ssenaristi və aparıcısı, əməkdar jurnalist, pedaqogika üzrə fəlsəfə doktoru Qafar Əsgərzadə giriş nitqində ölməz söz ustadının sənətinin böyüklüyündən, onun Azərbaycan ədəbiyyatındakı yerindən söz açaraq, ədibin yaradıcılığına nəzər saldı. Şairin vətənpərvərlik və müharibə mövzusundakı əsərlərinə toxunan natiq bu əsərlərin gənc nəslin hərbi-vətənpərvərlik və milli məfkurə ruhunda tərbiyə olunmasındankı rolundan danışdı.
Respublika Təhsil Şurasının sədri pedaqogika elmləri doktoru , professor, şair Əjdər Ağayev Məmməd Rahimlə bağlı xatirələrindən söz açdı, onun şeirlərinin hikmətindən, uşaqların və gənclərin tərbiyəsindəki rolundan, onun ölməz sənət nümunələrinin orta məktəb dərsliklərinə salınmasının vacibliyini vurğuladı.
Bakı Mühəndislik Universitetinin baş müəllimi Rəhman Quliyev Məmməd Rahimin şeirlərinin onun həyatında buraxdığı izlərdən söz açdı, gənc nəsli onun və ümumiyyətlə, ədiblərin yaradıcılığına tez-tez müraciət etmələrinin vacibliyini önə çəkdi.
Gənc şair Günəş Hüseynov ustad sənətkara sevgisini onun şeirinə yazdığı bir nəzirə ilə tədbir iştirakçılarına çatdırdı.
Bakı şəhəri, Səbail rayonundakı Məmməd Rahim adına 7№ li tam orta məktəbin şagirdləri-Rahimçilər ustad sənətkara sevgilərini şairin şeirlərin söyləməklə bildirdilər.
Əməkdar artist Hüsniyyə Mürvətova və əməkdar jurnalist Qafar Əsgərzadə şairin gözəl sənət əsərlərindən nümunələri qiraət etdilər.
Şairin sözlərinə yazılmış mahnıların müğənnilərin ifasında canlı səslənməsi isə tədbirə daha da rəng qatdı. Əməkdar artist Mətanət İsgəndərli, müğənnilər Vasif Məhərrəmli, Vüsal Hacıyev, Elşən Cəfərzadə, Sərxan Bünyadzadə öz gözəl ifaları ilə ustad sənətkarın ruhunu ehtiramla yad etdilər.
Sonda Bakı Mühəndislik Universitetinin rektoru, professor Havar Məmmədov tədbirin əhəmiyyətini qeyd etdi, şairin Azərbaycan ədəbiyyatında və gənclərin həyatında oynadığı rolu vurğuladı və təşkilatçılarına öz minnətdarlığını bildirdi.
Xatirə gecəsi eksklyuziv olaraq, “Mədəniyyət” kanalı vasitəsilə bütövlükdə video lentə alındı.
Yubiley tədbirləri davam edir...
Niyaz Eyvazov
“Könüllülər” Kitabxana İctimai Birliyinin sədri,
“Tərəqqi” medalçısı
