Tanınmış jurnalist, Azərbaycan Yazıçılar Birliyinin üzvü Akif Cabbarlının sayca beşinci kitabında müəllifin son illər qələmə aldığı publisistik yazıları, resenziyaları və hekayələri toplanıb.
Müəllif Modern.az-a açıqlamasında bildirib ki, “Şuşa” nəşriyyatında işıq üzü görən kitabda gənclərin hərbi-vətənpərvərlik tərbiyəsinə, medianın, telejurnalistikanın uğur və problemlərinə, yaradıcılığına və şəxsiyyətinə böyük hörmət bəslədiyi söz adamlarının yeni kitabları barədə qeydlərinə, həyatda rastlaşdığı çeşidli hadisələrin ədəbi təsvirinə geniş yer ayırıb.
Akif Cabbarlı yeni kitabının məziyyətləri barədə danışmağı qələm dostlarının və ədəbiyyat tənqidçilərinin öhdəsinə buraxıb. Bildirib ki, onların səmimi sözləri və əlbəttə iradları xoş olacaq, gələcək yaradıcılıq fəaliyyətində köməyinə çatacaq.
“Səngər uverturası” kitabına öz sözü yazıçı-publisist, respublikanın Əməkdar jurnalisti Flora Xəlilzadə yazıb. Kitabın redaktoru Gülnar Süleymanovadır.
Geniş oxucu kütləsi üçün nəzərdə tutulan kitabdan gənc jurnalistlər və tələbələr də faydalana bilərlər.
