Azərbaycan turizm növlərinin müxtəlifliyi ilə seçilir. Biznes, istirahət, sağlamlıq, idman turizmlərini buna misal göstərmək olar. Odur ki, kifayət qədər turizm potensialı olan Azərbaycan bu sahədə dünyanın aparıcı ölkələri ilə rəqabətə girməyə və öz imkanlarını nümayiş etdirməyə qadirdir. Artıq beynəlxalq tədbirlərin keçirildiyi məkana çevrilən Azərbaycanda turizm sərgilərinin təşkili bu sahəyə olan marağın göstəricisidir.
Bəs bu il Azərbaycana gələn turistlərin sayında artım müşahidə olunurmu? Eyni zamanda daha çox hansı ölkələrdən turistlər gəlir?
Azərbaycan Turizm Assosiasiyası sədrinin müşaviri Müzəffər Ağakərimov bununla bağlı Modern.az saytına açıqlama verib. O bildirib ki, nəinki bu il, o cümlədən 2018-ci ildə də turistlərin sayı artacaq. Eyni zamanda, o, bu artımı üç amillə əsaslandırıb:
“Azərbaycanda turistlərin sayı ildən-ilə artacaq”
“Ümumiyyətlə Azərbaycana gələn turistlərin sayı ildən-ilə artır. Bu il də gələn turistlərin sayı ötən ilə nisbətən daha çox olacaq. 2018-ci ilin proqnozuna görə, 2017-ci ilə nisbətdə turistlərin sayında irəliləyiş müşahidə ediləcək. Bu, bir sıra amillərlə əlaqədardır.
Öncə, bildiyiniz kimi Azərbaycan sabit ölkədir. Avropa, Şərq ölkələrində, Türkiyədə baş verən hadisələr göstərir ki, turistlər sabitlik olan ölkələrə daha çox üz tuturlar.
İkinci amil Azərbaycan xalqının qonaqpərvər olmasıdır. Qonağı yaxın adamı kimi qəbul etməyə həmişə hazırdırlar. Halbuki, başqa ölkələrdə turistlər bir az soyuqqanlı qarşılanır.
Üçüncü amil Azərbaycanda son illərdə turizmin inkişafı üçün infrastrukturun yüksək səviyyədə qurulmasıdır. Bu, təkcə Bakıya deyil, rayonlara və regionlara da aiddir. Muzeylərin bərpası, yolların çəkilişi, kommunal xidmətinin təchizatı və.s turistləri cəlb edir və xidmət səviyyəsi getdikcə yaxşılaşır. Azərbaycanda yeni otellərin inşasına başlanılıb. Bir neçə il bundan qabaq ölkədə hostellər yox idi. İndi Bakı şəhərində hostellər fəaliyyət göstərir və aztəminatlı insanları, turistləri qəbul etməyə hazırdır. Regionlarda da belə olsa, yaxşı olar. Yəni bu kimi məntiqi amillər turistləri cəlb etdiyinə görə istər-istəməz Azərbaycanda turistlərin sayı ildən-ilə artacaq”.
Müzəffər Ağakərimlinin sözlərinə görə, turistlər Azərbayacana yalnız gəzmək üçün gəlmir:
“Eyni zamanda, Azərbaycanda müxtəlif turizm növləri də inkişaf edib. Bunların sırasında qış-yay turizmi, sağlamlıq, biznes turizmi var. Azərbaycana üz tutan insanlar təkcə gəzmək üçün deyil, həm də sağlamlıqlarını bərpa etmək üçün Naftalana, Naxçıvanda duz dağına, Qalaaltına üz tuturlar.
Ümumi deyə bilərəm ki, Azərbaycan Turizm Assosiasiyasının apardığı monitorinqlər turistlərin sayının artdığını göstərir”.
“İran, Rusiya, Qazaxıstan...”
Müsahibimiz Azərbaycana daha çox hansı ölkələrdən turist gəldiyindən də söz açıb:
“Azərbaycana ən çox Fars körfəzində yerləşən ərəb ölkələri, İran, son bir iki-ildə isə Rusiyadan daha çox turist cəlb edilir. Qazaxıstandan sağlamlıq turizmi ilə əlaqədar gəlirlər. Təbii ki, bizneslə əlaqədar Türkiyə və digər dövlətlərdən də gələnlər olur”.
“Otel menecerləri düzgün marketinq siyasəti yerinə yetirmirlər”
M.Ağakərimli turistlərin gəlməsinin qiymətlərə təsirindən də söz açıb:
“Turistlərin gəlməsi qiymətlərə təsir etmir. İki devalvasiyadan sonra da qiymətlər sabit qalmışdı. Xaricdən gələn turistlər üçün də qiymətlər münasib və müvafiqdir. Yəni dolların məzənnəsinin dəyişməsi turistlər üçün daha əlverişlidir. Eyni zamanda, Azərbaycanda fəaliyyət göstərən otellər qiymətləri qaldırmayıb. Bu da daha çox turistin cəlb edilməsi üçün şərait yaradıb.
Lakin digər amili qeyd etmək istəyirəm. Bu, mənim şəxsi mövqeyimdir. Otellərin menecerləri, sahibkarları bəzən marketinq siyasətini düzgün yerinə yetirmirlər. Bayram günləri süni surətdə qiymət qaldırırlar. Bu onu göstərir ki, onlar səriştəsizdirlər və peşəkar deyillər. Peşəkar menecer süni qiymət artımına yol verməz. Gəlir əldə etmək üçün turistlərə daha çox xidmət etmək lazımdır. Ən asan yola əl atanlar özünü ağıllı menecer hesab edirlər. Mən o meneceri, sahibkarı ağıllı saymıram.
Bu menecer ən sadə yolu seçir və qiymət qaldırır. Soruşmaq lazımdır ki, nəyə görə?. Bura gələn turist Azərbaycandakı qiymətlərin İsveçrə, Fransa kimi ölkələrlə bərabər olduğunu fikirləşib yenidən gəlməkdən imtina edir. Menecerlər ya bilməzlikdən, ya da bilərəkdən belə nəticələrə səbəb olurlar. Qiymət həm bayram, həm də adi günlərdə qaldırılmamalı və stabil qalmalıdır.
Mən bir turizm işçisi kimi bunun əleyhinəyəm. Yaxşı işləmək əvəzinə, qiymət qaldırırlar. Mən o insanların birini də işdə saxlamazdım”.
Günay RƏSULQIZI
