İyunun 7-də Yasamal rayonunda məcburi köçkünlərin məskunlaşdığı yataqxana binasında baş verən yanğının nəticələri tam olaraq aradan qaldırılıb.
Bu barədə Modern.az-a Qaçqınların və Məcburi Köçkünlərin İşləri üzrə Dövlət Komitəsinin mətbuat katibi Elçin Qədimov məlumat verib.
Komitə rəsmisinin sözlərinə görə, yanmış binadakı mənzillər tam təmir olunub:
“Mənzillər əvvəlkindən qat-qat yaxşı vəziyyətdədir, təmir başa çatıb. Vətəndaşlar artıq öz evlərindədirlər”.
E.Qədimov deyib ki, dəymiş ziyana görə məcburi köçkünlərə birdəfəlik maddi yardım edilib:
“Yanğından sonra mənzilləri təmir olunan müddətdə onlara kirayə və müvəqqəti olaraq çörəkpulu təyin olunmuşdu. Həmçinin, yanmış ev əşyalarını yeniləmək üçün birdəfəlik maddi yardım verilib”.
Qeyd edək ki, yanğın zamanı 9 mənzil qismən, 1 mənzil isə tamamilə yanmışdı. Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov yanğın baş verdikdən sonra yataqxanda olmuş, məcburi köçkünlərlə görüşmüşdü.
Gülşən RAUFQIZI
