Bu gün Milli Məclisin Səhiyyə Komitəsinin sədri, 65 saylı Saatlı-Sabirabad-Kürdəmir seçki dairəsindən deputat seçilmiş Əhliman Əmiraslanov Milli Məclisdə vətəndaşları növbəti dəfə qəbul edib.
Qəbulda səhhətindəki müxtəlif problemlərin həlli ilə bağlı Səhiyyə komitəsinə müraciət edən insanlarla yanaşı, Əhliman Əmiraslanovun deputat seçildiyi 65 saylı Saatlı-Sabirabad-Kürdəmir seçki dairəsindən olan seçicilər də iştirak edib.
Qəbulda müxtəlif xəstəliklərin müalicəsi, ağır cərrahi əməliyyatlar, süni mayalanma və orqan köçürülməsi ilə bağlı müraciətlər olub.
Seçicilər isə, əsasən sosial problemlər, işlə təmin olunma ilə bağlı şikayətlərini deputata çatdırıblar. Əhliman Əmiraslanov bütün müraciətləri ayrı-ayrılıqda dinləyərək qeyd edilən problemlərin həlli istiqamətində müvafiq addımlar atılacağını bildirdi.
Bununla yanaşı bəzi problemlərin aradan qaldırılması məqsədilə vətəndaşlardan sənədlər qəbul edilərək müvafiq orqanlara müraciətlərin hazırlanması üçün göstərişlər verildi.
