AMEA Mərkəzi Elmi Kitabxanasına (MEK) erməni terrorizmindən bəhs edən “Erməni terrorçularının və erməni bandit qruplaşmalarının insanlıq əleyhinə cinayətləri (XIX-XXI əsrlər)” adlı yeni kitab daxil olub.
Kitabın ideya müəllifi AMEA İnsan Hüquqları İnstitutunun mərhum direktoru, siyasi elmlər doktoru Rövşən Mustafayevdir. Beynəlxalq terrorizm qurbanlarının xatirəsinə ithaf olunmuş kitabı Azərbaycan və Türkiyə türklərinə qarşı erməni terrorizminin qısa xronoloji ensiklopediyası adlandırmaq mümkündür. Kitabda XIX əsrdən başlayaraq bu günə qədər davam edən erməni vandalizmi, Cənubi Qafqazda və Anadoluda ermənilər tərəfindən türklərə qarşı törədilmiş soyqırımların miqyası və statistikası haqqında sənədlər və məlumatlar təqdim edilib. İngilis və rus dillərində nəşr edilən kitab beynəlxalq terrorizmə qarşı mübarizədə ciddi əhəmiyyətə malikdir.
MEK-in Milli Rəqəmsal Yaddaş (MRY) bazasına daxil edilmiş kitab kitabxananın Sərgi salonunda, Akademiklər zalında və yeməkxanasında təşkil edilən “Açıq kitabxana” layihəsi çərçivəsində nümayiş etdirilərək oxuculara da paylanılıb. Nəşrin MEK tərəfindən xarici ölkələrin Azərbaycanda təmsil olunan diplomatik korpuslarına və Azərbaycanın xaricdəki səfirliklərinə, diaspora təşkilatlarına göndərilməsi də nəzərdə tutulub.
