2018-ci ilin başa çatmasına sayılı günlər qalır. Demək olar ki, hər kəs yeni ilin gəlməsini səbirsizliklə gözləyir. Çünki insanlar yeni ildən həmişə nələrsə gözləyir. Yola salmaqda olduğumuz köhnə ilimiz hər kəsin xatirəsində müxtəlif obrazlarda qalıb.
Maraqlıdır, bəs yola saldığımız il ölkənin ictimai-siyasi, mədəni həyatında hansı əlamətdar günlərlə yadda qaldı?
Qurumlarımız ili necə başa vurdu?
Modern.az saytı mövzunun aktuallığını nəzərə alaraq ayrı-ayrı qurumların 2018-ci illə bağlı hansı işləri necə görmələri ilə bağlı yazıları təqdim edir. Öncə ölkənin idman həyatına nəzər salaq.
Görək Gənclər və İdman Nazirliyi 2018-ci ili necə başa vurdu?
2018-ci il Azərbaycanda həm də siyasi ab-havanın yüksək olması illə yadda qaldı. Belə ki, aprelin 11-də ölkədə prezident seçkiləri keçirildi. İlham Əliyev növbəti 7 il üçün ölkə başçısı seçildi. Təbii ki, bundan sonra əsas diqqət Nazirlər Kabinetində aparılacaq kadr dəyişiklikləri ilə bağlı idi. Dəyişiklik nəticəsində hökumətin tərkibi yeni heyətlə ictimaiyyətin qarşısına çıxdı.
Azad Rəhimov növbəti dəfə nazir seçildi
2006-cı ildə gənclər və idman naziri təyin olunan Azad Rəhimov 2018-ci ildə də növbəti dəfə Nazirlər Kabinetinin tərkibində nazir postunda qaldı.
Azərbaycanın mötəbər idman yarışlarına uğurla ev sahibliyi etməsi, idmançılarımızın beynəlxalq turnirlərdə qazandığı parlaq qələbələr respublikamızın idman ölkəsi olduğunu bir daha təsdiqləyir.
Belə ki, yola salmaqda olduğumuz 2018-ci ildə ölkəmiz müxtəlif idman növlərini əhatə edən önəmli beynəlxalq idman yarışlarına və irimiqyaslı tədbirlərə ev sahibliyi edib edən əhəmiyyətli idman tədbirlərindən biri Formula-1 Azərbaycan Qran-Prisidir ki, bu yarış aprelin 27-29-da keçirilib.
Bundan başqa, iyunun 5-9-da ölkəmizdə Beynəlxalq Velosipedçilər İttifaqının velosiped idmanının "BMX Racing" növü üzrə dünya çempionatı təşkil olunub.
Həmçinin yola salmaqda olduğumuz 2018-ci ilin 15-18 martında idman gimnastikası üzrə dünya kuboku, 12-15 apreldə də batut gimnastikası, tamblinq və ikili mini batut üzrə Avropa çempionatına ölkəmiz ev sahibliyi edib. Eyni zamanda, aprelin 27-29-da Bakı şəhərində bədii gimnastika üzrə dünya kubokunun, iyunun 22-23-də isə yeniyetmələr arasında Olimpiya Oyunlarına idman gimnastikası üzrə təsnifat xarakterli yarışları keçirilib. Beynəlxalq Gimnastika Federasiyasının ali orqanı olan Konqresin 82-ci iclası dekabrda Azərbaycanın paytaxtı Bakıda baş tutub.
2018-ci ildə Bakıda keçirilən digər böyük idman yarışları sırasında mayda kapoeyra idman növü üzrə və sentyabrda cüdo üzrə dünya çempionatları da var.
2018-ci ildə ölkəmiz üçün gözlənilən ən mühüm idman tədbirlərindən biri də Gənclər və İdman Nazirliyinin dəstəyi ilə noyabrda keçirilən Ümumdünya Antidopinq Agentliyinin (ÜADA) İcraiyyə Komitəsi və Təsisçilərin Ümumi Yığıncağıdır.
İslam Əməkdaşlıq Təşkilatına üzv ölkələrin gənclər və idman nazirlərinin dördüncü sessiyasının apreldə Bakıda həyata keçirilməsi də bu il baş tutan tədbirlər sırasındadır.
Eyni zamanda, yola salmağa hazırlaşdığımız ildə Gənclər və idman nazirliyində Dayanıqlı İnkişaf Məqsədləri üzrə seçilmiş 17 Gənc Səfirin təqdimat və mükafatlandırılma mərasimi baş tutub.
Tədbirdə gənclər və idman naziri Azad Rəhimov və BMT Inkişaf Proqramının Rezident Nümayəndəsinin müavini Alessandro Frakasseti iştirak ediblər.
Gənc səfirlərlə görüş
Nazir Azad Rəhimov, 17 Gənc Səfiri təbrik edərək, onlara məsuliyyətli işdə uğurlar arzulayıb.
2018-ci il həm də Diaspor Gənclərinin I Yay Düşərgəsi ilə də yadda qalıb. Gənclər və idman naziri Azad Rəhimov Diaspor Gənclərinin I Yay Düşərgəsində çıxış edən Azad Rəhimov ölkəni dünyada tanıtmağın, həqiqi mənada lobbiçilik yaratmağın kifayət qədər əhəmiyyətli və vacib olduğunu bildirib.
“Düşünürəm ki, belə tədbirlər ölkə üçün çox vacibdir. Bu sahədə biz bir çox xarici ölkədə təhsil alan tələbələrlə birgə fəaliyyət göstərmişik. Diasporla İş üzrə Dövlət Komitəsi, Təhsil Nazirliyi, Gənclər və İdman Nazirliyi birlikdə bu işi bərpa edəcək. Necə ki, keçmişdə Vyana, Brüssel, Moskva və başqa ölkələrdə bu cür tədbirlər keçirilib, bundan sonra da işlər davam etdiriləcək".
Ərdoğanın təbrik etdiyi azərbaycanlı
2018-ci ildə Atletika üzrə Avropa Çempionatında qızıl medal qazanan, Türkiyə millisində çıxış edən azərbaycanlı atlet Ramil Quliyev üçün də uğurlu il olub.
Belə ki, Ramil Quliyevin qızıl medal qazanmasını Türkiyə prezidenti Rəcəb Tayyib Ərdoğan da təbrik edib. Ərdoğan telefon danışığı zamanı qızıl medalla bütün Türkiyəni qürurlandıran Ramili təbrik edərək uğurlarının davamlı olmasını diləyib.
Ramil Quliyev Berlində keçirilən yarışda 200 metr məsafəyə qaçışda 19,76 saniyəlik göstəricisi ilə qızıl medal qazanıb.
Qalmaqallı şahmatçımızın sponsor dərdi
Həmçinin yola salmaqda olduğumuz 2018-ci il dünya şöhrətli şahmatçımız Şəhriyar Məmmədyarov üçün bir qədər təzadlı il oldu. Facebook səhifəsində FIDE reytinqində 3-cü pillədə qərarlaşan 33 yaşlı qrossmeyster sponsorunun olmamasından şikayətlənib. O, qazanc məqsədi ilə çoxlu sayda oyun keçirmək məcburiyyətində qaldığını yazıb:
“Əlbəttə, bu qədər ard-arda oynamaq biabırçılıqdır. Bu gün jurnalist sual verdi ki, nədir səni bu qədər oynamağa məcbur edən? Utandım “pul” deməyə. Deyə bilmədim ki, mənim kimi peşəkar oyunçunun sponsoru yoxdur. Bütün yarışlara öz hesabıma gəlirəm. Buradakı bütün insanların sponsoru var. Amma sabah yenə oyunum var və gərək hazırlaşam. Çox heyf, amma şahmat belə, məni bezdirir. Yorulmuşam. Sabah yenə oynamaq lazımdır. Arada fikirləşirəm - bu ölkədə məndən güclü nə qədər idmançı var ki, mənə bir sponsor tapılmadı? Azərbaycana sevgim sonsuzdur, amma heyf, mənim gücüm sonsuz deyil. Bir gün mən o Şəhriyar Məmmədyarov olmayacağam. Onda isə bu söhbətlər sadəcə, mənasız olacaq”.
Şəhriyar Məmmədyarovun dediklərinə az keçmədi ki, Gənclər və İdman Nazirliyinin mətbuat xidməti reaksiya verdi. Nazilriyin mətbuat katibi Samayə Məmmədova bildirib ki, heç bir şahmatçı qatılıdığı beynəlxalq və yerli turnirlərə öz hesabına qatılmır.
“Hamısı nazirlik tərəfindən hərtərəfli təmin edilir və ediləcək də. Qarşıda bizi Batumidə keçiriləcək şahmat üzrə olimpiada gözləyir. Əminik ki, Şəhriyar orada da Azərbaycanı layiqincə təmsil edəcək. Unutmaq lazım deyil ki, cənab prezidentin ən çox diqqət ayırdığı idman növlərindən biri də şahmatdır.
Şahmatçıların qarşılanması, onların həyat şəraitinin günbəgün yaxşılaşması üçün cənab prezident tərəfindən hər zaman diqqət ayrılır. Şəhriyara uğurlar arzulayır və onunla qürur hissi duyuruq.
Şəhriyarın yarışlara getməsinə gəldikdə isə Gənclər və İdman Nazirliyi tərəfindən 2017-ci ildə təqdim olunan tədbirlər planına əsasən, 250 min manat, 2018-ci ildə isə 200 min manat vəsait ayrılıb. Bu vəsait şahmatçıların yarışa getməsi, yolpulu və qidalanma, səfərləri üçün nəzərdə tutulur. Qeyd edim ki, əlavə xərclər də ödənilib”.
