Bu gün Beynəlxalq Mətbuat Mərkəzində “Aşıq Şəmşir Mədəniyyət Ocağı” İctimai Birliyinin təşkilatçılığı ilə tanınmış jurnalist Elxan Salahovun yenicə çapdan çıxmış “Qanlı kaha” kitabının təqdimat mərasimi keçirilib.
Modern.az xəbər verir ki, tədbirdə Milli Məclisin deputatları, tanınmış ziyalılar, ictimaiyyət nümayəndələri, məcburi köçkünlər iştirak ediblər.
“Qanlı kaha” kitabı 1993-cü ildə Kəlbəcər rayonunun işğalı zamanı Başlıbel kəndinin yurd-yuvasını tərk etməyən, 4 ay ərzində kahalara sığınmış 76 sakininin mühasirə həyatından bəhs edir.
Sənədli-publisistik povestdə işğal zamanı dağlara çəkilərək kahalara (mağaralara) sığınan və tez-tez mövqeyini dəyişmək məcburiyyətində qalan dinc sakinlərin ağır və dözülməz mühasirə günləri, erməni quldurlarının törətdiyi dəhşətli qətliamlar, vandalizm hərəkətləri əksini tapır.
Kitab həmin hadisələri gözləri ilə görmüş və məşəqqətləri yaşamış şahidlərin xatirələri əsasında qələmə alınıb.
