Gəncə Şəhər Baş Polis İdarəsində 2012-ci ilin I rübünün yekunlarına dair hesabat yığıncağı keçirilib. Hesabatda bildirilib ki, hüquq mühafizə orqanları ictimai-siyasi sabitliyin qorunmasında, cinayətkarlıqla mübarizə və asayişin təmini istiqamətində üzərinə düşən vəzifələri yerinə yetiriblər.
Hesabat yığıncağında çıxış edən Gəncə Şəhər Baş Polis İdarəsinin rəisi Rasim Musayev bildirib ki, Gəncə polisinin fəaliyyəti sayəsində şəhərdə kriminogen vəziyyət sabitdir və cinayətlərin sayında azalma müşahidə olunur. Bunu göstəricilər də sübüt edir. Belə ki, aparılan qabaqlayıcı tədbirlərin nəticəsində cinayətlərin sayı 0,9 faiz azalıb. Ötən rüb ərzində Gəncə şəhərində 172 cinayət faktı qeydə alınıb. Bu cinayət işlərinin 95.4%-i yəni 164 faktın üstü isti izlərlə açılıb. Şəhərdə asayişin bərpasından danışan Rasim Musayev deyib ki, əsas diqqət ilk növbədə şəhər ərazisində baş verə biləcək cinayətlərin proflaktikasına, qeydə alınan cinayətlərin açılmasına, narkotiklərin dövriyyəsinin qarşısının alınması və qanunsuz silahların yığılmasına, cinayət törədərək məsuliyyətdən qaçan şəxslərin tapılaraq istintaq orqanlarına təhvil verilməsinə yönəldilib.
