Azərbaycanın İsveçrədəki səfiri Xanım İbrahimova milli və beynəlxalq səviyyədə İsveçrənin ən böyük radiosu hesab edilən “RTS” radiosuna Ermənistanın Azərbaycana qarşı təcavüzü və hazırda gedən döyüşlər barədə müsahibə veribr. Müsahibə radionun “Əsas vaxt”ında efirə çıxıb.
Modern.az-ın məlumatına görə, müsahibədə öncə isveçrəli jurnalistin sualı əsasında Moskvada cari ilin 10 oktyabr tarixində əldə olunan humanitar atəşkəsə toxunulub. Səfir Azərbaycan ərazisinin 20 faizinin- Dağlıq Qarabağ və ətraf 7 rayonun- 30 ilə yaxındır ki, Ermənistanın işğalı altında olduğunu, bu münaqişədə Ermənistanın təcavüzkar və işğalçı dövlət kimi qəbul edilməsinin vacibliyini dinləyicilərə çatdırdıqdan sonra bildirib ki, Azərbaycan tərəfi Moskva görüşündə konstruktiv şəkildə iştirak etmiş, atəşkəsə hörmət edəcəyi ilə bağlı öhdəlik götürüb. Azərbaycanın ən qısa zamanda danışıqlara başlamağa hazır olduğunu bildirən səfir X.İbrahimova Ermənistanın tamamilə fərqli mövqe tutduğunu və əldə edilən humanitar atəşkəsdən bir neçə saat sonra ölkəmizin ikinci böyük şəhəri hesab edilən Gəncənin ballistik raketlə vurduğunu və nəticədə 10-dan çox mülki əhalinin qətlə yetirildiyini, çox sayda insanların yaralandığını bildirib. Oktyabrın 14-nə olan statistikaya əsasən yaşlılar və uşaqlar daxil olmaqla 43 mülki şəxs öldürülmüş, 214 nəfər müxtəlif xəsarətlərlə xəstəxanalara yerləşdirilib.
Səfir vurğulayıb ki, dinləyicilərin Ermənistanın işğalçı və təcavüzkar olmasını anlamaları çox vacibdir. Qeyd olunub ki, Azərbaycanın konstruktiv münasibətinə baxmayaraq Ermənistanın BMT Təhlükəsizlik Şurasının “Erməni silahlı qüvvələrinin işğal edilmiş Azərbaycan torpaqlarında tamamilə, dərhal və qeyd şərtsiz” çıxarılmasını tələb edən qətnamələrini, eləcə də əldə olunmuş atəşkəsi pozması məyusedicidir və Ermənistan beynəlxalq birlik tərəfindən ciddi şəkildə qınanılmalıdır. 30 ilə yaxın davam edən danışıqların, habelə beynəlxalq təşkilatlar tərəfindən qəbul edilən sənədlərin heç bir nəticə vermədiyini qeyd edən səfir Ermənistanın məqsədinin status-kvonu saxlamaq və işğalı etdirmək olduğunu diqqətə çatdırıb.
Azərbaycanın ATƏT-in Minsk Qrupu çərçivəsində aparılan danışıqlara həmişə sadiq qaldığını vurğulayan səfir X.İbrahimova Ermənistan rəhbərliyinin bu prosesi alt-üst etdiyini, Ermənistan ordusu tərəfindən cari ilin iyul, avqust və son olaraq sentyabr aylarında ölkəmizə qarşı təxribatların həyata keçirilməsi barədə ətraflı məlumat vermiş, eləcə də bu kontekstdə Azərbaycanın öz xalqını, ərazilərini qorumaq üçün əks-hücuma keçdiyini ifadə edib.
Müsahibə zamanı Türkiyənin müharibədə iştirakı ilə bağlı məqamın müzakirəsində səfir Türkiyənin müstəqilliyimizin möhkəmləndirilməsində, ərazi bütövlüyümüzün qorunmasında və iqtisadi potensialımızın həyata keçirilməsində əsas rol oynadığını diqqətə çatdıraraq, Türkiyədən heç bir hərbi yardımın alınmadığını və buna ehtiyacın da olmadığını qeyd edib. Qeyd olunub ki, Türkiyə sadəcə mənəvi, diplomatik və siyasi dəstək verir. Bu barədə yayılan məlumatların erməni təxribatlarından başqa bir şey olmadığını bildirilib.
Türkiyə vasitəsilə suriyalı muzdluların ölkəmizə göndərilməsi yalanlarını da canlı yayımda ifşa edən səfir İbrahimova bu iddianın hərbçilərimiz üçün təhqir olduğunu dilə gətirərək Azərbaycanın kifayət qədər güclü və təcrübəli ordusunun mövcudluğunu qeyd edib və Azərbaycan torpaqlarında nə Türk qoşunlarının, nə də hər növ muzdluların olmadığını bildirib. Bu xəbərlərin Ermənistan rəhbərliyi və diasporası tərəfindən yayılan uydurma, saxta xəbərlər olması vurğulanıb. Sonra Ermənistanın xarici muzdlulardan “könüllü döyüşçülər” adı altında istifadə etməsi qeyd olunaraq bu faktın sosial şəbəkələr vasitəsilə sübut edilə biləcəyi dinləyicilərin diqqətinə çatdırılıb.
Radio aparıcısının Azərbaycanın İsveçrədən indiki məqamda nə gözləməsi ilə sualına cavab olaraq səfir X.İbrahimova İsveçrənin Azərbaycanın ərazi bütövlüyünü dəstəkləməsini, işğal edilmiş ərazilərimizdə yaradılan “qondarma” rejimi tanımadığını vurğulayıb. Eyni zamanda dinləyicilərin diqqətinə çatdırılıb ki dünyanın heç bir dövləti “qondarma” rejimi tanımır. O bildirib ki, İsveçrə bir neçə dəfə sülh danışıqları üçün platforma təqdim edib və bu xüsusda, İsveçrənin oynaya biləcəyi rollardan biri də Ermənistana beynəlxalq hüquqa və Təhlükəsizlik Şurasının qərarlarına hörmət göstərilməsi ilə bağlı mövqenin çatdırılması olardı.
