Yaxın vaxtlarda Ermənistanın kapitulyasıyasını elan edəcəyi sənədin imzalanması gözlənilir.
Modern.az xəbər verir ki, APA-nın diplomatik mənbələrə istinadən məlumatına görə, Azərbaycan, Türkiyə, Rusiya və Ermənistan arasında aparılacaq müzakirələrdən biri də regiona Rusiya və Türkiyə sülhməramlılarının yerləşdirilməsi ilə bağlı ola bilər.
Müzakirələr nəticəsi olaraq, erməni silahlı qüvvələri Ağdam, Kəlbəcər və Laçın rayonlarının heç bir hərbi əməliyyat olmadan, sülh şəraitində boşaldacaq və Azərbaycan bu ərazilərə nəzarəti bərpa edəcək.
***
“Caliber” “Telegram” kanalı da etibarlı mənbələrə istinadən Ermənistanın təslim olacağı barədə məlumat yayıb:
"Azərbaycan Ordusunun Şuşa şəhərini işğaldan azad etməsi ümumilikdə sentyabrın 27-dən başlanmış müharibənin aqibətini həll etdi. Bundan dərhal sonra bir gündə 72 yaşayış məntəqəsinin və səkkiz strateji yüksəkliyin azad olunması Ermənistan tərəfinin ağ bayraq qaldırmasına səbəb oldu.
Etibarlı mənbələrdən əldə etdiyimiz xəbərə görə, Şuşa məğlubiyyətindən sonra Nikol Paşinyan Azərbaycan Prezidentinin tələblərini qəbul etmək məcburiyyətində qalaraq kapitulyasiya elan etməyə hazırlaşır.
Məlumata görə, yaxın saatlarda Azərbaycan, Rusiya Prezidentlərinin və Ermənistanın baş nazirinin iştirakı ilə video-konfransın təşkil olunacağı və kapitulyasiyanın şərtlərinin razılaşdırılacağı, razılaşma sənədinin imzalanacağı gözlənilir.
İmzalanacaq sənəd cəbhədə döyüşlərin dayandırılmasını və atəşkəsin elan olunmasını, Azərbaycan Prezidentinin tələblərinə uyğun olaraq, Kəlbəcər, Laçın və Ağdamdakı erməni işğalçı qüvvələrinin ən qısa zamanda bu ərazilərdən qeyd-şərtsiz çıxarılmasını nəzərdə tutur.
Azərbaycan Ordusu isə bu günədək azad etdiyi mövqelərdə qalır.
Razılaşma Ermənistan ordusunun ərazilərdən çıxarılmasına paralel olaraq, Türkiyə və Rusiya sülhməramlılarının bölgədə yerləşdirilməsini də nəzərdə tutur.
Qarabağın statusu müzakirə mövzusu olmayacaq!
Beləliklə, qış fəslinin yaxınlaşdığını nəzərə alaraq, Azərbaycan heç bir itki vermədən Kəlbəcər kimi böyük və strateji rayonun, ciddi müdafiə istehkamları qurulmuş Ağdamın və Laçının azad edilməsinə nail olacaq".
