Respublikada koronovirus (COVİD-19) pandemiyasının yayılmasının qarşısının alınması, insanların sağlamlığının qorunması istiqamətində ardıcıl və məqsədyönlü tədbirlər həyata keçirilir. Məlum olduğu kimi, koronavirus əsasən insanların sıx toplaşdığı, bir-biri ilə yaxın təmasda olduğu yerlərdə surətlə yayılır. Bu cür yerlərdən biri də yas mərasimləridir. Ölkədə koronavirus infeksiyasının yayılmasının qarşısının alınması ilə əlaqədar Nazirlər Kabineti yanında Operativ Qərargah tərəfindən qabaqlayıcı tədbirlər görüldüyü, sosial izolyasiya tədbirlərinin həyata keçirildiyi bir ilə yaxın müddət ərzində yas mərasimlərinə də nəzarət daha da artırılıb.
Modern.az-ın məlumatına görə, Füzuli rayonu ərazisində də yas mərasimlərinə ciddi nəzarət həyata keçirilir. Belə ki, dəfn mərasimləri istisna olmaqla, mərasim zallarında, çadırlarda və digər qapalı məkanlarda yas mərasimlərinin keçirilməsi məhdudlaşdırılıb.
Füzuli Rayon İcra Hakimiyyətinin mətbuat xidməti bildirib ki, dəfn mərasimləri karantin qaydalarına riayət olunmaqla həyata keçirilir.
Xatırladaq ki, Füzuli rayonu ərazisində ictimai müzakirələrin nəticəsi olaraq 2014-cü ildən etibarən bütün yaşayış məntəqələrində yas mərasimləri, ehsan süfrələri təmtəraqdan uzaq, sadə və israfsız, islami qaydalara uyğun keçirilir. Son yeddi ildə keçirilən yas mərasimlərində, ehsan süfrələrində çay, qənd, halva, xurma, su və limon verilməsi məqsədəuyğun hesab edilib, nəticədə orta hesabla rayonda 10-12 milyon manatdan artıq vəsaitə qənaət olunub. Rayonun məcburi köçkün olan əhalisi həmin vəsaiti digər sosial problemlərinin həllinə sərf ediblər. Əgər əvvəllər yas sahibi 3, 7, 40 və cümə axşamları üçün orta hesabla 9-10 min manat pul xərcləməli olurdusa, hazırda ehsan məclislərini orta hesabla 500-1000 manatla başa çatdırılır.
Rayon sakinləri bildirirlər ki, ehsan süfrələrinin sadə, təmtəraqdan uzaq keçirilməsi həm onların sağlamlığının qorunmasına - koronovirus və digər yolucucu xəstəliklərə yoluxmalarının qarşısını alır, həm də onlara maddi zərər vurmur, banklara, kredit təşkilatlarına borclu qalmalarına səbəb olmur. Rayonda ehsan məclislərindən toplanan vəsaitlə vətəndaşlar həm yas mərasimlərini yola verir, həm də mərhumun dəfn oluması, qəbrüstü abidəsinin düzəldilməsi və digər işləri yerinə yetirirlər.
