Ləğv edilmiş Milli Təhlükəsizlik Nazirliyinin yüksək rütbəli şəxsləri ilə bağlı cinayət işində zərərçəkmiş kimi tanınan və külli miqdarda dələduzluqda təqsirləndirilən Ulduzə Səfərzadənin cinayət işi üzrə ibtidai istintaq başa çatıb.
Modern.az-ın məlumatına görə, istintaq orqanı U.Səfərzadə barəsində olan cinayət işini baxılması üçün Bakı Ağır Cinayətlər Məhkəməsinə göndərib. Cinayət işi hakim Mirzə Xankişiyevin icraatına verilib.
U.Səfərzadə iki nəfərə qarşı dələduzluqda təqsirləndirilir və o Cinayət Məcəlləsinin 178.3.2-ci (dələduzluq, külli miqdarda ziyan vurmaqla törədildikdə) maddəsi ilə ittiham edilib.
Qeyd edək ki, U.Səfərzadə ləğv edilmiş Milli Təhlükəsizlik Nazirliyinin sabiq idarə rəisləri - general-mayor Sübahir Qurbanov, general-mayor Teymur Quliyev və general-mayor Natavan Mürvətovanın barəsində olan cinayət işində zərərçəkmiş şəxs qismində tanınıb.
