İspaniya La Liqasının 28-ci turunda "Real Sosyedad"la keçirilən oyunda (6:1) "Barselona"nın kapitanı Lionel Messi daha bir rekorda imza atıb.
Modern.az xəbər verir ki, La Liqada 511-ci matçına çıxan argentinalı hücumçu "Real"ın sabiq qapıçısı İker Kasilyasın rekorunu qırıb. İspaniyalı qolkiper çempionatda 510 oyun keçirib.
Messi bu göstərici ilə 7-ci sıraya yüksəlib. İlk pillədə "Barselona"nın keçmiş qapıçısı Andoni Subisarreta qərarlaşıb.
Xatırladaq ki, Messi sözügedən görüşdə "Barsa"nın heyətində 768-ci oyununa çıxmaqla komandanın keçmiş kapitanı Xavi Ernandesin rekordunu da qırıb.
***
Lionel Messi penaltilər çıxmaq şərti ilə karyerasında vurduğu qolların sayını 637-ə çatdırıb.
O, buna La Liqanın 28-ci turunda "Real Sosyedad"la matçda (6:1) dubl edərək nail olub. Argentinalı hücumçu bu göstəricidə "Yuventus"un forvardı Kriştiano Ronaldonu geridə qoyub. Portuqaliyalı futbolçu penaltilər çıxmaq şərti ilə ümumilikdə 635 qol vurub.
Qeyd edək ki, Messi karyerası ərzində 97 dəfə penaltidən fərqlənib (ümumilikdə 734 qol), Ronaldo isə 11 metrlik cərimə zərbəsini 135 dəfə dəqiq yerinə yetirib. (ümumilikdə 770 qol).
