27 sentyabr 2020-ci ildə başlanan , 10 noyabrda böyük qələbəmizlə bitən azadlıq savaşı Azərbaycan xalqı üçün olum və ya ölüm məsələsi idi. 44 günlük Vətən müharibəsində Azərbaycan dövləti və ordusu elə bir tarix yazdı, elə bir hünər göstərdi ki, bu günlər bütöv bir millətin ləyaqət rəmzi, milli qeyrət nümunəsi kimi Vətən tariximizə əbədi qızıl hərflərlə həkk olundu, “güclü Ermənistan” mifi darmadağın edildi.
İkinci Qarabağ savaşında Azərbaycan ordusunun böyük qələbəsi imkan verdi ki, 30 ildə əyilən qamətimizi düzəldək, itirdiyimiz maddi və mənəvi sərvətləri, milli dəyərləri, milli güvəni özümüzə qaytaraq, illərlə həsrətində olduğumuz torpaqlarımıza, yurd yerlərimizə qovuşaq. O yerlərə ki, ata-baba məzarlarımız düşmən girovluğunda , xan qızı Natəvanın ruhu səksəkədə idi, Xanın səsindən niskil yağırdı , Bülbülün ahu-zarı yerə-göyə sığmırdı. Minlərlə şəhid eloğlumuzun ahı yerdə qalmışdı…
İtirilmiş torpaq, Vətən dərdi ən ağır dərddir deyirlər.Və nə yaxşı ki, Prezident, Müzəffər Ali Baş Komandan İlham Əliyevin ətrafında sıx birləşən Azərbaycan xalqı 30 illik mərhumiyyətə 44 gün ərzində son qoymaqla tarixinin şərəf, zəfər səhifəsini qürurla yazmağı bacardı, əsgərlərimizin qanı və canı bahasına torpaqlarımız azad olundu. Azərbaycan əsgəri qoymadı ki, xalqı hansısa super güclərin təzyiqi altında boynübükük qalıb öz halalca haqqını minnətlə, həm də yarımçıq alsın. Qanını halal etdi yurddaşlarına, döyüşdü, ölümün gözünə baxa-baxa döyüş meydanında tarix yazdı, hərb meydanında Zəfər qazandı. Bəli, Vətən müharibəsindəki qələbəmizlə təkcə torpaqlarımız geri qayıtmadı, milli şərəf və ləyaqətimiz, özgüvənliyimiz, milli kimliyimiz də özümüzə qayıtdı…
…Tarixdəki bütün müharibələr gec ya tez sona çatır. Amma çox təəssüf ki, qalib ya məğlub-fərqi yoxdur-müharibə həmişə itkidir, ölümdür, göz yaşıdır…Bizim Zəfər bayramına da 3 min şəhidin müqəddəs qanı hopub, nakam taleyi yazılıb.. . Onlar 30 il öncə ayağı yalın, başı açıq öz torpaqlarından qovulan, hər şeyləri əlindən alınan atalarının, təhqir olunan ana-bacılarının, minlərlə şəhid sələflərinin qisasını qanları ilə aldılar. Prezident İlham Əliyevin sözləri ilə desək: “Bayrağı qaldıran, bayrağı düşmənin mövqeyinə sancan, azad edilmiş torpaqlara sancan əsgərdir, zabitdir. Bizim əsgər və zabitlərimiz aslan kimi vuruşdular”. Füzuli, Cəbrayıl, Zəngilan, Qubadlı rayonları, Hadrut və Suqovuşan qəsəbələri, Şuşa şəhəri döyüşlə azad olundu. Hərb meydanında əldə edilən qələbə imkan verdi ki, Ağdam rayonu, eyni zamanda, Kəlbəcər və Laçın rayonları bir güllə atmadan, bir şəhid vermədən işğaldan azad edilsin.
8 Noyabr tarixi Azərbaycan tarixinin şərəf nöqtəsidir deyərdim. Məhz Şuşa şəhəri düşmən tapdağından azad olunandan sonra sinə dolusu “Qarabağ Azərbaycandır” deyə bildik. “Xarı bülbül” festivalı, Vaqif poeziya günləri, Üzeyir bəyin adını daşıyan musiqi günləri artıq Şuşada keçirilir, dahi Bülbülün ev muzeyi öz qonaqlarını qarşılayır. Şuşada və digər azad olunan ərazilərimizdə-Zəngilanda, Füzulidə aparılan sürətli quruculuq işləri bizi Qarabağın bərpası ilə bağlı hədəflərimizə daha da yaxınlaşıdırır. O, hədəflər arasında uzun illərdir blokada şəratində yaşayan Naxçıvan Muxtar Respublikasının tarixi Vətənlə birləşdirilməsi məsələsi də var. Zəngəzur dəhlizinin işə düşməsini qarşıya mühüm məqsəd kimi qoyan Prezident İlham Əliyev bu hədəfə çatmaq üçün var gücü ilə çalışır.
Bir neçə gündən sonra elliklə Zəfər bayramının 1-ci ildönümünü böyük fəxarət və qürur hissi ilə qeyd edəcəyik. Bizim nəsil xoşbəxtdir ki, bu günlərin-böyük Qələbənin, ondan sonra başlanan sürətli quruculuq işlərinin canlı şahidləriyik, Zəfər şahidləriyik.
Zəfər şəhidləri, ruhunuz şad olsun, Zəfər şahidləri, bayramınız mübarək!
Esmira İsmayılova
Lənkəran Dövlət Universitetinin Mətbuat Xidmətinin rəhbəri
