8 noyabrda saat 12.00-də (Bakı vaxtı ilə saat 14.00-də) Kişinyovda Azərbaycanın Səfirliyinin qarşısındakı Azərbaycan guşəsində 8 noyabr Zəfər gününə həsr olunmuş barelyefin təntənəli açılış mərasimi keçiriləcək.
Bu barədə Modern.az-a Azərbaycanın Moldovadakı səfirliyindən məlumat verilib.
Bildirilib ki, barelyefin üzərində zəfərin rəmzi olan “Dəmir yumruq” və sülhün rəmzi olan - “Xarı bül-bül” əks olunub. Həmçinin barelyefdə üç dildə-azərbaycan, rumın və ingilis dillərində Azərbaycan Respublikasının Prezidenti İlham Əliyevin “Qarabağ- Azərbaycandır. Biz bundan sonra qalib ölkə və müzəffər xalq kimi əbədi yaşayacağıq” sözləri yazılıb. Bundan başqa “Dəmir yumruğun” altında üç dildə “Bizim birliyimiz-bizim gücümüzdür” şüarı əks olunub.
Açılışda rəsmi şəxslərin, Moldovada akkreditə olunmuş diplomatik nümayəndəliklərin rəhbərlərinin, ictimaiyyət nümayəndələrinin, mədəniyyət xadimlərinin, Azərbaycan diasporunun üzvlərinin və yerli KİV nümayəndələrinin iştirakı gözlənilir.
