“İsrail və Fələstində diplomatik nümayəndəlik açmaq məsələsi çoxdan gündəmdə idi”.

 

Bunu Modern.az-a açıqlamasında sabiq xarici işlər naziri Elmar Məmmədyarov deyib. Eks-nazir hələ vəzifədə olduğu dövrdə Azərbaycanın İsraildə səfirlik açması məsələsinin müzakirə mövzusu olduğunu xatırladıb:

 

“Mənim İsrailə səfərlərimdə bu məsələyə toxunmuşduq. Səfər zamanı Fələstinin Ramalla şəhərini də ziyarət etmişdim. O zaman cənab Prezidentin tapşırığı əsasında müsəlman ölkənin xarici işlər naziri ilə görüşə getmişdim. Biz səfirlik açılması ilə bağlı razılıq almışdıq. Bu gün sadəcə həmin razılığın məqamı yetdi deyə bilərik”.

 

E.Məmmədyarov hesab edir ki, səfirliyin açılması İsrail ilə Azərbaycan əlaqələrini daha da yüksəldəcək:

 

“İsrailin Azərbaycanda səfirliyi var idi. Bizim İsraildə səfirliyimizin açılması çox yaxşı qərar oldu. İsraildə diplomatik nümayəndəliyin olması hər iki ölkə arasında əlaqələri gücləndirəcək. Bu, bir mənalıdır. Onu da deyim ki, bu addım İrana qarşı atılmayıb. Belə yanaşma tamamilə yanlışdır. Səfirlik sadəcə olaraq Azərbaycanın milli maraqlarına uyğun olduğu üçün açılır. İran Ermənistanda səfirliyini Azərbaycan torpaqları işğal altında olan vaxtda açıb və Ermənistana hələ o vaxtdan siyasi hərbi yardım göstərib. Yəni bu gün İsraildə səfirliyin açılmasını İrana qarşı addımla bağlamaq olmaz”.

 

Bundan əlavə, sabiq XİN başçısı İsraildən fərqli olaraq Fələstində Təmsilçilik Ofisinin açılmasına da toxunub:

 

“Yəqin ki, bu, ilk addımdır. Azərbaycanın orada diplomatik nümayəndəliyi olacaq. Sonra Fələstin hökuməti ilə danışıqlar aparılacaq. Bu danışıqlardan sonra təmsilçilik səfirlik səviyyəsinə yüksələcək”.

 

Keçmiş XİN başçısı Türkiyə-İsrail əlaqələrindən də söz açıb:

 

“Türkiyə ilə İsrailin əvvəlcədən qarşılıqlı səfirlikləri olub. 2010-cu ildə əlaqələr korlandı. İndi isə həm İsrailin Ankarada, həm də Türkiyənin Təl-Əvivdə səfirliyi var. Hər iki qardaş ölkənin demək olar ki, eyni vaxtda İsraillə səfirlik əlaqələrini yaxşılaşdırması çox müsbət hadisədir. Həm Türkiyə, həm də Azərbaycanın İsraillə əlaqələrini yüksəltməsi ümumilikdə region üçün əhəmiyyətlidir. Regional sülhün təmin olunmasında bunun faydası olacaq”.

 

Qeyd edək ki, Azərbaycan İsraildə səfirlik, Fələstində Təmsilçilik Ofisi açacaq.