Bir neçə gün əvvəl yaşadığı evin qarşısında silahlı hücuma məruz qalan deputat Fazil Mustafa xəstəxanadan evə buraxılıb.
Bu barədə Modern.az-a açıqlamasında Fazil Mustafa özü məlumat verib.
Deputat bildirib ki, hazırda özünü yaxşı hiss edir və müalicəsinə evdə davam edəcək: "Xəstəxanadan evə buraxılmışam, hazırda vəziyyətim stabildir. Sağlıq durumum normaldır, hər şey qaydasındadır. Müalicəm evdə davam etdirilir. Tikişlər sökülənə qədər evdə olacağam. Bundan sonra hər şey normala dönəcək”.
Fazil Mustafa təhlükəsizlik tədbirlərinin yüksək səviyyədə olduğunu söyləyib.
Qeyd edək ki, martın 28-də F.Mustafaya qarşı yaşadığı evin qarşısında "Kalaşnikov" avtomat silahından atəş açılaraq terror aktı törədilib. F.Mustafa bədənin sağ çiyin qurşağını və sağ budun aşağı üçdə birini dəlib keçən güllə yarası alıb. Ona zəruri tibbi xidmətlər göstərilib.
Faktla bağlı Dövlət Təhlükəsizliyi Xidmətinin İstintaq baş idarəsində Cinayət Məcəlləsinin 277-ci (dövlət xadiminin və ya ictimai xadimin xidməti və ya siyasi fəaliyyətinə son qoymaq və ya bu fəaliyyətə görə qisas almaq məqsədilə onun həyatına sui-qəsd etmə) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini, döyüş sursatı əldə etmə, saxlama, daşıma və gəzdirmə) maddələri ilə cinayət işi başlanılıb.
Hadisədən bir neçə gün sonra keçirilən xüsusi əməliyyat nəticəsində terror aktını törətməkdə şübhəli bilinən şəxslər müəyyən edilərək saxlanılıb.
