Öncədən xəbər verdiyimiz kimi Modern.az “Fotoların dili ilə” layihəsində siyasilərin, məmurların bədən dili və üz kodlarına əsasən onların “Fizioqnomiya” testini və bədən dillərinin təhlilini izah edəcək. Layihəyə başlamazdan əvvəl bədən dili, qeyri-verbal nitq haqqında bir neçə yazı təqdim etmişdik.
Belə bir xalq deyimi var: “Ət yeyən quş dimdiyindən bəllidir.” Məsələyə bu konteksdən yanaşsaq insanların üz kodları onların şəxsiyyəti və xarakteri haqında çox informasiya verir. Layihənin ilk hədəfi kimi daim emosional və çılğın çıxşları ilə mətbuatda və sosial şəbəkələrdə maraqla izlənən Rusiya Dumasının deputatı, Rusiya Liberal Demokrat Partiyasının lideri Vladimir Jirinovski diqqətimizi çəkməyə bilməzdi. Buna görə də NLP Master Babək Bayramovla birlikdə Vladimir Jirinovskinin “Fiziqnomiya” testini və ya üz kodlarına əsasən xarakterini oxuculara təqdim edirik. Bir məsələni də diqqətə çatdıraq ki, gələn həftədən etibarən yerli məmur və siyasilərin xarakterlərini təhlil edəcəyik.
Vladimir Volfoviç Jirinovski haqqında qısa ARAYIŞ. O, 1946-cı ildə aprelin 4-də Astanada anadan olub. Orta təhsilini Astanada alıb. Ali təhsilini bitirdikdən sonra Vladimir Jirinovski hərbiçi vəzifəsində çalışıb və polkovnik rütbəsinə qədər qalxıb. Rusiyanın dövlət xadimi, siyasətçi, hüquqşünas və türkoloqdur. Siyasi arenada daha çox emosional və millətçi çıxışları ilə diqqət çəkir.
Rusiya Liberal Demokrat Partiyasının banisi və lideridir. Rusiya Federasiyası Dövlət Dumasının sədr müavini (2000-2011) olub. Rusiya Dumasının 6 çağırışının deputatı, Avropa Şurası Parlament Assambleyasının üzvüdür. Rusiya Federasiyası Prezidenti postuna 5 dəfə namizədliyini irəli sürüb (1991, 1996, 2000, 2008, 2012) və bununla da Rusiyada rekord qırıb.
Baş - Başının əksər hallarda geriyə meylli olması təkəbbürlü, hədsiz qürurlu və özünü sevməyini göstərir.
Üz - Fikir veririsinizsə, Jirinovskidə üzün forması düzbucaqlı şəklindədir. Düzbucaqlı üz quruluşu olanlar nəcib tiplər hesab olunur. Bunlarda bir zadəgan ruhu vardır. Bunlar həssas, intellektual və balansı qoruyan tiplərdir. Liderlik bacarıqları vardır.
Alın - Geniş və küncləri olan alın onun xəyal gücünün çox qüvvətli olduğundan xəbər verir. Alnın arxaya meylli yayılması yalançı, melanxolik, eqoist və hərdəmxəyal olmasını büruzə verir. Tez hisrslənən və təkəbbürlü bir xarakter görünür. Alın qırışlarına diqqət yetirdikdə, bu qırışların alının hər tərəfinə yayıldığını görərik. Bu vəziyyət isə Jirinovskinin dərin zəkaya malik olduğunu bildirir.
Gözlər - Çox zaman geniş açılmış gözlər, dartılmış qaşlar və danışarkən əsasən müsahibin gözlərinin içinə baxılması cəsarəti bildirir. Enerjili və aktivdir.
Qulaqlar - Qulaqlara gəldikdə isə vəziyyət başqa cürdür. Yastı qulaqlar onun tədbirli, soyuqqanlı və iradəli olmasından xəbər verir.
Burun - Burun forması daha dərində olanları üzə çıxarır və onun şöhrətpərəst və təkəbbürlü olduğunu göstərir.
Dodaqlar - Fotoşəkillərə diqqət yetirdikdə Vladimir Jirinovskinin dodaqlarının nazikliyi nəzərdən qaçmır. Belə dodaqlar, öz sahibinin hiyləgər, eqoist, qəddar, sirli, yalançı, başqalarını ələ salmağı sevən və istismarçı bir insan tipi olduğunu bildirir.
Çənə - İrəli çıxmış çənə, yenə də enerjili və iradəli, dürüst, inadkar və sərt olduğunu göstərir.
Qeyd: Şəxsin üz forması və cizgilərinin xarakterlə əlaqəsi barədə qeyd olunanlar “Fizioqnomiya” testinə əsasən çıxan nəticələrdir. Rəsmi dairələrdə əsas kimi istifadə edilə bilməz.
Elçin MURAD
