"Qoşulmama Hərəkatının Əlaqələndirmə Bürosunun nazirlər görüşünün Azərbaycanın paytaxtı Bakıda keçirilməsi ilə dünya beynəlxalq əməkdaşlıq və həmrəyliyin əlamətdar təzahürünün şahidi olur. Böyük ruh yüksəkliyi və qürurla Azərbaycan Qoşulmama Hərəkatına töhfələr verir”.
Bunu Modern.az-a açıqlamasında Qlobal məsələlər, Bir Kəmər və Yol Təşəbbüsü (KYT), Mərkəzi Asiya və Avrasiya üzrə beynəlxalq ekspert Qaiser Nawab Qoşulmama Hərəkatının region üçün əhəmiyyətindən bəhs edərkən bildirib.
Onun sözlərinə görə, Azərbaycanın Qoşulmama Hərəkatına sədrliyinin əlavə olaraq bir il artırılmasının əhəmiyyətini qiymətləndirməmək olmaz:
"Bu müddət ərzində Azərbaycan ədalətə, beynəlxalq hüquqa və Qoşulmama Hərəkatına üzv dövlətlərin qanuni maraqlarının “Bandunq prinsipləri”nə uyğun müdafiəsinə sarsılmaz sadiqliyini nümayiş etdirdi. Azərbaycanın rəhbərliyi dövründə, müvafiq olaraq 2021 və 2022-ci illərdə Qoşulmama Hərəkatının Parlament Şəbəkəsi və Qoşulmama Hərəkatının Gənclər Təşkilatı yaradıldı. Bu da Hərəkatın təsirinin institusionallaşdırılmasında mühüm rol oynamış oldu. İnstitusional davamlılığa doğru atılan addımlar Azərbaycanın Qoşulmama Hərəkatının təsirinin davamlılığını və effektivliyini təmin etmək, gələn sədrlər üçün uğurlu mirasa zəmin yaratmaqla bağlılığını nümayiş etdirir".
Ekspert ötən gün Azərbaycan Prezidenti İlham Əliyevin Bakıda keçirilən nazirlər toplantısındakı çıxışını yüksək qiymətləndirib və dövlət başçısının dünya ölkələrinə mühüm mesajlar verdiyini bildirib.
"Prezident Əliyev müraciətində iqlim dəyişikliyi, məcburi miqrasiya problemlərinin həllinin, mədəniyyətlərarası və dinlərarası dialoqun təşviqinin vacibliyini vurğulayıb. O, islamofobiya, ksenofobiyanı, İslamı zorakılıq və terrorla eyniləşdirmək cəhdlərini pisləməyə çağırıb. Əliyevin Azərbaycanın Vətən müharibəsində qazandığı tarixi qələbəni, ərazi bütövlüyünü və tarixi ədaləti bərpa etməsini etiraf etməsi beynəlxalq hüququn təntənəsi haqqında xatırlatma rolunu oynayır. Onun çıxışında Azərbaycanın çoxtərəfliliyə sarsılmaz sadiqliyi və Qoşulmama Hərəkatının yenidən formalaşan dünya düzənində öz yerini tapmasının zəruriliyi də vurğulanıb. Prezident Əliyev bildirdi ki, Birləşmiş Millətlər Təşkilatından sonra ən böyük beynəlxalq qurumlardan biri kimi Qoşulmama Hərəkatı “Bandunq prinsipləri”nə sadiq qalmalı və suverenliyin, ərazi bütövlüyünün pozulmasına, dövlətlərin daxili işlərinə müdaxilələrə qarşı öz səsini ucaltmalıdır. Prezidentin neokolonializmlə mübarizəyə verdiyi töhfə təqdirəlayiqdir. Bununla birlikdə Azərbaycanın Fransanı öz müstəmləkə keçmişini tanımağa, ona münasibət bildirməyə, tarixi ədalətsizliklərə görə üzr istəməyə çağırması, keçmiş səhvlərin etiraf edilməsi güclü xatırlatmağa xidmət edir", - tanınmış ekspert vurğulayıb.
Qeyd edək ki, iyulun 5-də Bakı Konqres Mərkəzində Qoşulmama Hərəkatının Əlaqələndirmə Bürosunun “Qoşulmama Hərəkatı: meydana çıxan çağırışlarla mübarizədə birgə və qətiyyətli” mövzusunda nazirlər görüşü keçirilib. Toplantıda Azərbaycan Prezidenti, Qoşulmama Hərəkatının sədri İlham Əliyev də iştirak edib. Dövlət başçısı çıxış zamanı bir çox önəmli məqamlara toxunub.
