Bakıda keçirilən 74-cü Beynəlxalq Astronavtika Konqresi çərçivəsində “NARGIS” jurnalının “Go Green” adlı IV eko-sərgisi açılıb.
Qeyd edək ki, sərgi ənənəvi xarakter daşıyır. Builki ekspozisiyaya Azərbaycanın tanınmış heykəltəraş və rəssamlarının tullantılardan hazırladıqları 9 installyasiya daxildir.
“Go Green” layihəsi ətraf mühitin mühafizəsinə həsr olunub və müasir ekoloji problemlərin incəsənət vasitəsilə ictimaiyyətə çatdırılması məqsədi daşıyır.
Xatırladaq ki, oktyabrın 2-6-da Azərbaycanda 74-cü Beynəlxalq Astronavtika Konqresi keçirilir. Bu nüfuzlu tədbirə Bakı ilk dəfə Ulu Öndər Heydər Əliyevin ölkəyə birinci rəhbərliyi dövründə – 1973-cü ildə ev sahibliyi edib. 50 ildən sonra konqres yenidən Azərbaycanda keçirilir.
Ülviyyə Mahmudun rəhbərlik etdiyi “NARGIS” jurnalı sosial layihələrə böyük önəm verir. İctimaiyyətin diqqətini insan fəaliyyətinin ətraf mühitə mənfi təsirlərinə cəlb etmək və istehlak mədəniyyətinin formalaşmasına təsir göstərmək məqsədilə ardıcıl olaraq sərgilər təşkil edir.
“Go Green” sərgisi Bakı Şəhər İcra Hakimiyyəti, Ekologiya və Təbii Sərvətlər Nazirliyi, Elm və Təhsil Nazirliyi, Respublika Uşaq-Gənclər İnkişaf Mərkəzi, “ASAN könüllüləri” və “Baku Bus” MMC-nin dəstəyi ilə təşkil olunub. Sponsorlar “PAŞA Holding”, “Baku Steel Company”, “Azərişıq” ASC, “AzVirt” MMC, “İmprotex Motors”, “Azərbaycan Hava Yolları” və Fövqəladə Hallar Nazirliyidir.
“Go Green” layihəsi çərçivəsində Respublika Uşaq-Gənclər İnkişaf Mərkəzinin dəstəyi ilə gənc nəslin ekoloji mədəniyyətinin formalaşması və inkişafına yönəlmiş təlimlərin keçirilməsi nəzərdə tutulur.
Sərgi Beynəlxalq Astronavtika Konqresindən sonra – oktyabrın 10-dan noyabrın 30-dək “Space_____________13” incəsənət məkanında nümayiş olunacaq.
